တတိယသုံးလပတ်အတွင်း ကမ္ဘာ့စီးပွားရေးနှေးကွေးဟု IMF ပြော
ဝါရှင်တန်၊စက်တင်ဘာ ၁၅
ဘေးထွက်ဆိုးကျိုးအန္တရာယ်များသည် ကမ္ဘာ့စီးပွားရေးအလားအလာကို ဆက်လက်လွှမ်းမိုးထားပြီး အချို့သောနိုင်ငံများသည် ၂၀၂၃ ခုနှစ်တွင် စီးပွားရေးကျဆင်းမှုသို့ရောက်ရှိသွားနိုင်သော်လည်း ကမ္ဘာလုံးဆိုင်ရာဆုတ်ယုတ်မှုသည် ယခုထက်ပို၍ကျယ်ကျယ်ပြန့်ပြန့် ဖြစ်လာနိုင်ခြင်းရှိမရှိကိုမူ ပြောရန်စောလွန်းသည်ဟု IMF ၏ပြောရေးဆိုခွင့်ရှိသူ Gerry Rice က ကြာသပတေးနေ့ကပြောကြားခဲ့သည်။
ငွေကြေးဖောင်းပွမှု၊ထောက်ပံ့ဖြည့်တင်းမှုကွင်းဆက်ပြဿနာများနှင့် ပိုမိုတင်းကျပ်သော ဘဏ္ဍာရေးဈေးကွက်အခြေအနေများကြောင့် တတိယသုံးလပတ်တွင် အရှိန်အဟုန်ဖြင့်ဆုံးရှုံးမှုကိုညွှန်ပြနေသော်လည်း နိုင်ငံတကာငွေကြေးရန်ပုံငွေအဖွဲ့၏ ယူဆချက်နှင့်ပတ်သက်၍နောက်ထပ်ပြန်လည်ပြင်ဆင်မှုအသေးစိတ်ကိုမူ ပြောကြားခြင်းမရှိသေးပေ။
ဇူလိုင်လက IMF ၏ခန့်မှန်းချက်အရ ၂၀၂၂ ခုနှစ်အတွက် ကမ္ဘာလုံးဆိုင်ရာတိုးတက်မှုနှုန်းကို ၃ ဒသမ ၂ ရာခိုင်နှုန်းအဖြစ်ခန့်မှန်းထားပြီး ၂၀၂၃ ခုနှစ်အတွက်ကိုမူ ၂ ဒသမ ၉ ရာခိုင်နှုန်းအထိလျှော့ချခဲ့သည်။ရှေ့လတွင် အလားအလာအသစ်ကိုထုတ်ပြန်မည်ဖြစ်သည်။
“ကျွန်တော်တို့သတ်မှတ်ထားတဲ့ ကမ္ဘာ့စီးပွားရေးနှေးကွေးမှုဟာ အခုလပိုင်းတွေမှာပိုမိုပြင်းထန်လာပါတယ်” ဟု Rice က အွန်လိုင်းသတင်းစာရှင်းလင်းပွဲတစ်ခုတွင်ပြောကြားခဲ့သည်။ဆက်လက်၍ ကိုဗစ်ပိတ်ဆို့မှုနှင့် အိမ်ခြံမြေပြဿနာများသည် တရုတ်နိုင်ငံ၏စီးပွားရေးလုပ်ဆောင်မှုအပေါ်ဖိစီးနေချိန်တွင် ဒေါ်လာဈေးအားကောင်းနေသည့်အတွက် နိုင်ငံများစွာအပေါ်ဂယက်ရိုက်ခတ်မှုများရှိသည်ဟု၎င်းကဆိုသည်။
“ဘေးထွက်ဆိုးကျိုးအန္တရာယ်များသည် ထည့်သွင်းစဉ်းစားရန်လိုအပ်ပြီး မသေချာမရေရာမှုများစွာဖြင့် ဆက်လက်လွှမ်းမိုးနေသည်” ဟု ၎င်းကဆိုသည်။ “၂၀၂၃ ခုနှစ်မှာ စီးပွားရေးကျဆင်းမှုနှင့်ရင်ဆိုင်ရမယ့်နိုင်ငံအချို့ကို ကျွန်တော်တို့မျှော်လင့်ထားပါတယ်၊ဒါပေမဲ့ ဒီအခြေအနေက ကမ္ဘာလုံးဆိုင်ရာဆုတ်ယုတ်ကျဆင်းမှု ဖြစ်မဖြစ်ပြောဖို့ကတော့စောလွန်းပါတယ်” ဟု ၎င်းကထပ်မံပြောကြားခဲ့သည်။
အာဖရိကတစ်တိုက်တည်းမှာပင် လွန်ခဲ့သည့်နှစ်နှစ်အတွင်းငတ်မွတ်မှုမှာ သုံးပုံတစ်ပုံအထိမြင့်တက်လာခဲ့ပြီး လူပေါင်း ၁၂၃ သန်းကိုထိခိုက်ခဲ့ကြောင်း မစ္စတာ Rice ကပြောကြားခဲ့သည်။“ဘယ်လိုပဲအမည်တပ်တပ် ဒီလူတွေအတွက်ကတော့ကြောက်စရာအခြေအနေပါပဲ” ဟုလည်း၎င်းကဆိုသည်။
Source -Reuters