ထိုင်ဝမ်၏ကိုဗစ်စည်းမျဉ်းနောက်ဆုံးဖြေလျှော့မှုအနေဖြင့် နိုင်ငံအချို့ဗီဇာကင်းလွတ်ခွင့်ပြန်ရမည်ဟုဆို
တိုင်ပေ၊စက်တင်ဘာ ၅
ထိုင်ဝမ်တွင် ကိုဗစ်ပြန့်ပွားမှုထိန်းချုပ်ရေးဆိုင်ရာ စည်းမျဉ်းများကို ဖြေလျှော့လိုက်သဖြင့် လာမည့်အပတ်မှစတင်ကာ အမေရိကနှင့်ကနေဒါနိုင်ငံများမှ ခရီးသွားများအတွက် ဗီဇာကင်းလွတ်ခွင့်ကိုပြန် ပေးတော့မည်ဖြစ်ကြောင်း ထိုင်ဝမ်အစိုးရက စက်တင်ဘာလ ၅ ရက် တနင်္လာနေ့ကပြောကြားခဲ့သည်။
ထိုင်ဝမ်အစိုးရသည် ဇွန်လက ကွာရန်တင်းရက်အား ခုနစ်ရက်မှသုံးရက်သို့လျှော့ချလိုက်ခြင်းမှလွဲ၍ အခြားအာရှနိုင်ငံအများအပြားတွင်ကဲ့သို့ ကိုဗစ်စည်းမျဉ်းများ ကိုဖြေလျှော့မပေးဘဲ ထိုင်ဝမ်ကဆက်လက်တင်းကျပ်ထားဆဲဖြစ်သည်။
ထိုင်ဝမ်တွင် ကူးစက်လွယ်အိုမီခရွန်မျိုးကွဲများကြောင့် ယခုနှစ်စောပိုင်းမှစတင်ကာ ပြည်တွင်းကူးစက်မှုပေါင်း ၅ ဒသမ ၃ သန်းကျော်ရှိကြောင်းထုတ်ပြန်ခဲ့သည်။သို့သော်ရောဂါလက္ခဏာ မပြင်းထန်မှုများကြောင့် ကန့်သတ်ချက်မှုများကိုယခုကဲ့ သို့ ဖြေလျှော့ပေးခဲ့ခြင်းဖြစ်သည်။
အမေရိက၊ကနေဒါ၊နယူးဇီလန်၊ဩစတြေးလျ၊ဥရောပနှင့် သံတမန်ရေးရာမဟာမိတ်နိုင်ငံများမှ ဧည့်သည်များအား နောက်တပတ်တနင်္လာမှစကာ ဗီဇာကင်းလွတ်ခွင့်ဖြင့်ပြန်လည်ဝင်ရောက်ခွင့်ပြုတော့မည့်အကြောင်းကို ထိုင်ဝမ်ကူးစက်ရောဂါကွပ်ကဲရေးဗဟိုဌာနက ပြောကြားခဲ့သည်။
ကမ္ဘာတစ်ဝန်းရှိနိုင်ငံအများစုသည် ၎င်းတို့၏နယ်စပ်များကို ပြန်လည်ဖွင့်လှစ်ထားပြီး ကူးစက်ရောဂါမဖြစ်ပွားမီကချမှတ်ထားေသာနယ်စပ်အစီအမံများကိုပြန်လည်စတင်ကာ ကပ်ရောဂါကာကွယ်ရေး၊စီးပွားရေးနှင့်လူမှုရေးလုပ်ငန်းများအပါအဝင် နိုင်ငံတကာအပြန်အလှန်ဖလှယ်မှုများ ဟန်ချက်ညီရန်ကြိုးပမ်းမှုများပြန်လည်လုပ်ဆောင်နေသည့် အချက်အပေါ်မူတည်ကာ ယခုကဲ့သို့ပြန်လည်ဖွင့်လှစ်ရန်ဆုံးဖြတ်ချက်ကိုချမှတ်ခဲ့ခြင်းဖြစ်သည်ဟုဆိုသည်။
အဆိုပါနိုင်ငံပေါင်း ၄၅ နိုင်ငံကျော်မှ ဧည့်သည်များသည် ထိုင်ဝမ်တွင်ရက်ပေါင်း ၉၀ အထိနေထိုင်နိုင်ပြီး Nauru, Saint Lucia နှင့် အခြားနိုင်ငံသုံးနိုင်ငံမှသူများသည် ရက် ၃၀ အထိနေထိုင်နိုင်ကြောင်း ထိုင်ဝမ်ကောင်စစ်ရေးရာဗျူရိုက ထုတ်ပြန်သည့်စာရင်းအရသိရသည်။
စင်္ကာပူနှင့်မလေးရှားအပါအဝင် နိုင်ငံအများအပြားမှ လာရောက်လည်ပတ်သူများအတွက်ကိုမူ ထိုင်ဝမ်အနေဖြင့် ဗီဇာကင်းလွတ်ခွင့်ကိုယာယီရပ်ဆိုင်းထားသေးကြောင်း ဗျူရို၏အင်္ဂါနေ့ ထုတ်ပြန်ချက်စာရင်းအရသိရှိရသည်။ကပ်ရောဂါကာလတစ်လျှောက် ထိုင်ဝမ်နိုင်ငံသားများနှင့် နိုင်ငံခြားခရီးသွားများအား နိုင်ငံမှထွက်ခွာခွင့်နှင့်ပြန်လည်ဝင်ရောက်ခွင့်များကို မတားမြစ်ထားသော်လည်း ၎င်းတို့အနေဖြင့် မိမိနေအိမ်တွင်ဖြစ်စေ ဟိုတယ်တွင်ဖြစ်စေကွာရန်တင်းဝင်ရန်လိုအပ်ကြောင်းဖော်ပြထားသည်။
ကပ်ရောဂါမတိုင်မီက ထိုင်ဝမ်သည် အာရှခရီးသွားများ အဓိကလာရောက်လည်ပတ်ရန်ရေပန်းစားသည့် နေရာတစ်ခုဖြစ်ပြီး ဂျပန်၊တောင်ကိုရီးယားနှင့် အရှေ့တောင်အာရှနိုင်ငံများသည် ထိုင်ဝမ်ခရီးသွားလုပ်ငန်းအတွက် အရေးပါသောနိုင်ငံများဖြစ်သည်။
Source –Reuters/rc