ယူကရိန်းစစ်ရေးလှုပ်ရှားမှုများ မပေါက်ကြားစေရန်သတိထားဖို့ အရာရှိများအား သမ္မတသတိပေး
ကိဗ်၊ဩဂုတ် ၁၂
ယူကရိန်းသမ္မတ ဇလန်းစကီးသည် စစ်ရေးနည်းဗျူဟာများနှင့်ပတ်သက်၍ သတင်းထောက်များအား ပြောဆိုနေခြင်းကို ရပ်တန့်ရန် တာဝန်ရှိသူများကို ဩဂုတ်လ ၁၁ ရက် ကြာသပတေးနေ့က သတိပေးခဲ့ပြီး ယခုကဲ့သို့ ထုတ်ဖော်ပြောဆိုခြင်းသည် လုံးဝတာဝန်မဲ့သည့်လုပ်ရပ်မျိုးဖြစ်သည် ဟုဆိုခဲ့သည်။
အင်္ဂါနေ့က ခရိုင်းမီးယားရှိရုရှားလေတပ်စခန်းတစ်ခု ဗုံးခွဲတိုက်ခိုက်ခံရမှုသည် ယူကရိန်းတပ်ဖွဲ့ဝင်များကပြုလုပ်ခြင်းဖြစ်သည်ဟု တိုက်ခိုက်မှုအပြီးတွင် New York Times နှင့် Washington Post သတင်းစာများက အမည်မဖော်လိုသူယူကရိန်းအရာရှိများ၏ ဖြေကြားချက်အရသိရှိရကြောင်းရေးသားခဲ့ကြသည်။သို့သော် ကိဗ်အစိုးရသည် ဗုံးပေါက်ကွဲမှုများ နောက်ကွယ်တွင် ၎င်းပါဝင်ခြင်းရှိမရှိကို ပြောဆိုရန်ငြင်းဆိုခဲ့သည်။
“စစ်တိုက်နေချိန်မှာ ကိုယ်ဘယ်ခြေလှမ်းလှမ်းမယ်ဆိုတာ လုံအောင်ထိန်းနိုင်လေလေ အောင်မြင်မှုရနိုင်လေလေပါပဲ၊ဒါကိုမထိန်းနိုင်ပဲ တစ်ဖက်ရန်သူသိအောင် ထုတ်ပြောပြီးဂုဏ်ယူပြနေတာဟာ မဖြစ်သင့်ဘူး” ဟု၎င်း၏မိန့်ခွန်း၌ထည့်သွင်းပြောကြားခဲ့သည်။
“အခုလို လူသိရှင်ကြားထုတ်ထုတ်ပြောနေတာက ရှင်းရှင်းပြောရရင်တာဝန်မဲ့တဲ့လုပ်ရပ်တစ်ခုပဲ၊ ယူကရိန်းအတွက် အောင်ပွဲတကယ်ယူပေးချင်ရင် ကာကွယ်ရေးနှင့်တန်ပြန်တိုက်ခိုက်ရေးအစီအစဉ်တွေအတွက် ကိုယ်ပြောလိုက်တဲ့စကားလုံးတစ်လုံးစီတိုင်းအတွက် ကိုယ့်မှာတာဝန်အပြည့်အဝရှိတယ်ဆိုတာ သိထားပါ” ဟုလည်း သမ္မတကမှာကြားခဲ့သည်။
ဆက်လက်၍ ကာကွယ်ရေးဒုဝန်ကြီးကလည်း တာဝန်ရှိသူအချို့ သတင်းစာများနှင့်အင်တာဗျူးဖြေစဉ် စကားကျွံ့ခဲ့သည့်ကိစ္စများထဲမှတစ်ခုကို လုံခြုံရေးဌာနက စုံစမ်းစစ်ဆေးလျက်ရှိသည်ဟုဆိုသည်။
ထို့ပြင်သူက “အခုလိုပေါက်ကြားမှုတွေကတစ်ဆင့် ရန်သူကကိုယ့်လှုပ်ရှားမှုကို သိရှိပြီး ပြင်ဆင်ချိန်ရသွားတာကြောင့် ယူကရိန်းတပ်ဖွဲ့တွေရဲ့ လှုပ်ရှားမှုတွေကိုအနှောင့်အယှက်ဖြစ်စေပါတယ်” ဟုလည်း၎င်း၏ ဖေ့စ်ဘွတ်တွင်ရေးသားခဲ့သည်။
ဂြိုလ်တုကုမ္ပဏီတစ်ခုက ထုတ်ပြန်သည့် ဓာတ်ပုံများတွင် ရုရှားလေတပ်စခန်းရှိ အဆောက်အအုံများ ထိမှန်ခဲ့စဉ်က မီးတောင်အဝနှင့်ဆင်သည့် ချိုင့်ကြီးသုံးခု၏ပုံများအထင်အရှားပါရှိသည်။စစ်လေယာဉ်အနည်းဆုံး ရှစ်စီးခန့်ပျက်စီးသွားသည်ကိုလည်း ထင်ထင်ရှားရှားမြင်နိုင်သည်။
ဇလန်းစကီးက ၎င်း၏ယခုမိန့်ခွန်းသည် ပြည်နယ်၊ ဒေသန္တရနှင့် စစ်ဘက်ဆိုင်ရာ အရာရှိများအပြင် ရှေ့တန်းမှအဖြစ်အပျက်များကို မှတ်ချက်ပေးနေကြသည့်သူများကိုလည်း ရည်ရွယ်ကြောင်းပြောကြားခဲ့သည်။
သမ္မတဇလန်းစကီးသည် ရုရှားသူလျှိုများကို အမြစ်ပြတ်မချေမှုန်းနိုင်ခဲ့၍ လုံခြုံရေးဌာနအကြီးအကဲလည်းဖြစ်၊မိတ်ဆွေဟောင်းလည်းဖြစ်သူတစ်ဦးအပါအဝင် အခြားအစိုးရရှေ့နေတစ်ဦးကိုလည်း ပြီးခဲ့သည့်လက ရာထူးမှဖယ်ရှားခဲ့သည်။
Source – Reuters/ec