ကြူးနစ်
‘မန္တလေးစကား’၊ ‘မော်လမြိုင် အစား’၊ ‘ရန်ကုန်အကြွား’ ဆိုသော စာဆိုနှင့်အညီ ရန်ကုန်လက်ပတ် နာရီသည် အကြွားသန်သည့်နေရာ တွင် ပြိုင်ဘက်မရှိ No Two ဖြစ်ရာ ကမ္ဘာကျော်စံချိန် မှတ်တမ်းစာအုပ် Guinness World Records ထဲ တွင် နှစ်စဉ်ဗိုလ်စွဲပါဝင်လျက်ရှိ သည်။ သူက လူထူထူရှိလျှင် သူ၏ လက်ပတ်နာရီကို မြှောက်၊ မြှောက် ပြလေ့ရှိကာ..
“ဒီမယ်..တွေ့ကြလားဟေ့။ ၁၇၆၁ ခုနှစ်တုန်းက ဗြိတိန်နိုင်ငံက လက်မှုပညာရှင် အကျော်အမော်John Harrison က ပထမဆုံး တီထွင်ဖန်တီးလိုက်တဲ့ လက်ပတ် နာရီ။ သက်တမ်း နှစ်ပေါင်း နှစ်ရာ ကျော်နေပြီ။ တကယ့်အန်းဒိတ် အစစ်။ တန်ဖိုးဖြတ်လို့မရဘူး။
ဂန္တဝင်လက်ပတ်နာရီ ဆိုပေမယ့် အချိန်မှန်တုန်းပဲ” ဟု အော်ဟစ် ကြွားဝါလေ့ရှိသည်။
ရန်ကုန်လက်ပတ်နာရီကို မျက်မုန်းကျိုးနေသော ဂျာနယ်လစ် ကလေးတစ်ယောက်ကတော့ မဲ့ကာ ရွဲ့ကာနှင့်..
“အလကားပါကွာ..တရုတ် တန်း ပစ္စည်းအဟောင်းဈေးတန်းထဲ ကနေ တစ်ပဲခြောက်ပြားနဲ့ ဝယ်လာ တဲ့ အပေါစားနာရီကြီးပါ” ဟု ရန်ကုန်လက်ပတ်နာရီကို အပုပ်ချ သည်။ ထိုဂျာနယ်လစ်ကလေးကို အသရေဖျက်မှုဖြင့် တရားမစွဲဘဲ မှောင်ရိပ်ထဲကနေ ချောင်းရိုက်ဖို့ ရန်ကုန်လက်ပတ်နာရီ မမောနိုင် မပန်းနိုင် လှည့်ပတ်ရှာဖွေသည်။ သို့သော် ဂျာနယ်လစ်ကလေးမှာ ရှိန်းဆာယာပိုမောက်ပြီး ကိုယ် ပျောက်အတတ်ကျွမ်းသူဖြစ်ရာ ဘယ်လိုမှ ရှာမရနိုင်။
ရန်ကုန်လက်ပတ်နာရီသည် ခရီးထွက်ရင်း မြန်မာ့နန်းမြို့တော် ဟောင်း မန္တလေးသို့ရောက်သွားကာ တွေ့ဆုံသူတိုင်းအား သူ၏ လက်ပတ် နာရီကိုပြ၍ ကြွားလုံးထုတ်နေပြန် လေသည်။ သို့ရာတွင် မန္တလေးသား ကဗျာဆရာအိုကြီး တစ်ဦးနှင့်တွေ့ သောအခါ
ရန်ကုန်လက်ပတ်နာရီ မကြွားနိုင်ဘဲ ဆွံ့အသွားတော့၏။ ‘မော်ဒန်အောင်မောင်း’ ဟု ကလောင် အမည်ခံယူထားသော ကဗျာဆရာ အိုကြီးက သူ၏လက်ကောက်ဝတ်မှ အရောင်အဆင်းမရှိတော့သည့် လက်ပတ်နာရီကြီးကို မြှောက်ဝင့်၍ ပြသည်။ သူကလည်း
ခပ်ကြွားကြွား ပင် ဖြစ်သည်။
“ငါဆယ်တန်းကျောင်းသားဘဝ ကတည်းက ပတ်ထားခဲ့တဲ့နာရီကွ။ ရေချိုးချိန်ကလွဲလို့ ငါအမြဲတမ်း ပတ် ထားခဲ့တာ။ ငါ အခု အသက် ၇ဝ ပြည့်တော့မယ်။ နာရီသက်တမ်း ရွှေရတုရောက်ပြီ ငါ့လူ”
“ဟား..မော်ဒန်အောင်မောင်း နာရီကြီးက အစုတ်ကြီး။ စက္ကန့် လက်တံလည်း မရှိတော့ဘူး။ ရပ် လည်း ရပ်နေသေးတယ်။ အခု နေ့ခင်း ၂ နာရီထိုးပြီ။ ခင်ဗျား နာရီ ကြီးက ၆ နာရီခွဲမှာရပ်နေတယ်။ လွှင့်ပစ်လိုက်ပါတော့ဗျာ” ဟု ရန်ကုန်လက်ပတ်နာရီက သရော်သံ ဖြင့် ပြောလိုက်သောအခါ မော်ဒန် အောင်မောင်း မျက်နှာပျက်သွား သည်။ “ဟေ့ကောင်..ရန်ကုန် လက်ပတ်နာရီ၊ ငါ့ကိုစိတ်ဆိုးစေတဲ့ အကြောင်း သုံးပါးရှိတယ်။ မင်း မှတ်ထားပါ။
(၁) ဆရာကြီး သခင် ကိုယ်တော်မှိုင်းကို ဝေဖန်ရင် ငါ စိတ်ဆိုးတယ်။
(၂) ဆရာဒဂုန်တာရာ ကို ဝေဖန်ရင် ငါစိတ်ဆိုးတယ်။
(၃) င့ါလက်ပတ်နာရီကိုဝေဖန်ရင် ငါ စိတ်ဆိုးတယ်”
“အင်း..ခင်ဗျားတို့ ကဗျာ ဆရာတွေကိုတော့ ကြောက်မိပါရဲ့ ဗျာ။ တစ်ယောက်ကိုထိတာနဲ့ ကျီးကန်းတွေလို ဝိုင်းအာကြတော့ တာကိုး”
ရန်ကုန်လက်ပတ်နာရီသည် မန္တလေးမှ ရန်ကုန်သို့ပြန်လည်ရောက် ရှိလာပြီး မကြာမီ မော်ဒန်ကဗျာ ဥက္ကဋ္ဌဆိုသူနှင့် ကံဆိုးလှစွာ တွေ့ ဆုံ မိပြန်သည်။ မော်ဒန်ကဗျာဥက္ကဋ္ဌ ဆိုသူမှာ ‘ပါလေရာ ပဲခူးဆား၊ ခပ်တိုင်းငန်’ ပုဂ္ဂိုလ်ထူးကြီး ဖြစ် သည်။ သူက စာမျိုးစုံရေးသလို ပန်းချီလည်းဆွဲပြီး လက်ပတ်နာရီ အမျိုးမျိုးကိုလည်း ထည်လဲနှင့် ပတ် နေသည်။ သူ၏တစ်ကိုယ်တော် ပန်းချီလက်ရာပြပွဲသို့ ရန်ကုန် လက်ပတ်နာရီကို ဖိတ်ကြားသဖြင့် ကျွန်ုပ်တို့၏ဇာတ်လိုက်ကျော်ကြီး ရန်ကုန်လက်ပတ်နာရီသည် ‘နား မလည်ဘဲ နားလည်ချင်ယောင် ဆောင်ရသော၊ မခံစားရပါဘဲ ခံစား ချင်ယောင်ဆောင်ရသော’ ပြပွဲခန်းမ ကြီးထဲသို့ အူတူတူနှင့် ရောက်ရှိ သွား လေသည်။
ရန်ကုန်လက်ပတ်နာရီသည် လက်နှစ်ဖက်စလုံးတွင် လက်ပတ် နာရီနှစ်လုံးစီ ပတ်ထားသော မော်ဒန်ကဗျာဥက္ကဋ္ဌကို ကြည့်ပြီး နှာခေါင်းရှုံ့လိုက်မိသည်။ “တော် တော် ရူးတဲ့ငနဲပါကလား။ ရွာသာ ကြီးဆေးရုံနဲ့တော့ နီးနေပြီ” ဟု လည်း တွေးလိုက်မိသေးသည်။
“ကျွန်တော့်ရဲ့ မော်ဒန်လွန် ဖန်တီးမှု လက်ရာတွေကို ရှုစားတော် မူပါ၊ ခံစားတော်မူပါ၊ သုံးသပ်တော် မူပါ” ဟု မော်ဒန်ကဗျာဥက္ကဋ္ဌက လက်ကိုင်အော်လံကလေးဖြင့် ခန်းမ ထဲမှာ အရှက်မရှိ မိမိကိုယ်မိမိ ကြော်ငြာနေသည်။
“ဟာ..ဒါက ဘယ်လိုဖြစ်တာ လဲ” ဟု ရန်ကုန်လက်ပတ်နာရီသည် နားဝေတိမ်တောင်နှင့် မြည်တမ်း လိုက်သည်။ ကော်ပီကူးဆွဲထား ပုံတူသော ကမ္ဘာကျော် မိုနာလီဇာMona Lisa ပန်းချီပုံကြီးထဲတွင် မိုနာလီဇာမှာ လက်ပတ်နာရီ ပတ်လျက်သားကြီး ဖြစ်နေသည်။
“ဟေ့..ဟေ့..မိုနာလီဇာပုံ ကိုဆွဲတဲ့ ပန်းချီဆရာကြီး လီယိုနာဒို ဒါဗင်ချီက ၁၅ ရာစုထဲမှာ ပေါ်ထွန်း ခဲ့တာကွ။ သူသေတဲ့ ၁၆ ရာစုအစ ၁၅၁၉ ခုနှစ်အထိ လက်ပတ်နာရီ ဆိုတာ အိပ်မက်ထဲမှာတောင် ရှိခဲ့ သေးတာမဟုတ်ဘူး။ အခုတော့ မိုနာလီဇာကို လက်ပတ်နာရီ ကြီး ပေးပတ်ထားတာတော့ မကြောင် လွန်းဘူးလားကွာ” ဟု ရန်ကုန် လက်ပတ်နာရီက အော်ပြောလိုက် သောအခါ ကာယကံရှင်ဖြစ်ေ သာ မော်ဒန်ကဗျာဥက္ကဋ္ဌ ဆိုသူသည် ပျာပျာသလဲပြေးလာသည်။
“ကျွန်တော်သိပါတယ်ဆရာ။ မိုနာလီဇာပန်းချီကားခေတ်က လက်ပတ်နာရီ မပေါ်သေးပါဘူး။ ၂ဝ ရာစုအစပိုင်းမှာ ပြင်သစ် မော်ဒန် ပန်းချီဆရာကြီး ‘မာစယ် ဒူးချမ်း’ က မိုနာလီဇာမူရင်းနဲ့ ထပ်တူထပ်မျှ တူအောင်ဆွဲပြီး မိုနာလီဇာ့မျက်နှာမှာ နှုတ်ခမ်းမွေး ကားကားကြီး တပ်ပေးခဲ့ဖူးပါတယ်။ အဲသဟာကို အားကျအတုယူပြီး ကျွန်တော်က မိုနာလီဇာပုံမှာ လက်ပတ်နာရီ ထည့်ဆွဲပေးလိုက်တာ ပါ။ အခုခေတ်မှာ လက်ပတ်နာရီ တွေကလည်း ခေတ်စားတယ်မဟုတ် လား ဆရာရဲ့”
မော်ဒန်ကဗျာဥက္ကဋ္ဌက သွား ဖြီးကလေးဖြင့် ဖြေရှင်းချက်ထုတ် သော်လည်း ရန်ကုန်လက်ပတ်နာရီ သည် ဘဝင်မကျနိုင်ဘဲ မျက်နှာထား တင်း၊ မျက်မှောင်ကြုတ်ထားသည်။
“မင်းက ဘာကြီးပဲပြောပြော လက်ပတ်နာရီက ခေတ်ကုန်ခါနီးနေ ပြီ။ အခု မိုဘိုင်းဖုန်းတွေက လက်ပတ် နာရီကို ဝါးမျိုတော့မယ်။ မိုဘိုင်းဖုန်း ဆောင်ထားရင် လက်ပတ်နာရီ မလို တော့ဘူး။ နားလည်လား”
ရန်ကုန်လက်ပတ်နာရီက အာဏာရှင်လေသံဖြင့် ပြောလာ ခြင်းကိုတော့ မော်ဒန်ကဗျာဥက္ကဋ္ဌ ငြိမ်မခံနိုင်တော့ပေ။
“လက်ပတ်နာရီဆိုတာ လူ့ခန္ဓာ ကိုယ်ဆိုင်ရာ ယဉ်ကျေးမှုအဆင် တန်ဆာတစ်မျိုးဆိုတာတော့ လူကြီး မင်း နားလည်ပေးနိုင်ပါလိမ့်မယ်။ လူကြီးမင်းကိုယ်တိုင် ဘယ်လက်ရော၊ ညာလက်မှာပါ လက်ပတ်နာရီကြီး တွေ ပတ်ထားတယ်မဟုတ်လား။ လက်ပတ်နာရီမှ မဟုတ်ပါ ဘူး။ အိုင် ပက်ကိုင်ထားတာဟာလည်း လူ့ခန္ဓာ ကိုယ်ဆိုင်ရာ ယဉ်ကျေးမှု အဆင်တန် ဆာတစ်မျိုးပါပဲ” ဟု မော်ဒန်ကဗျာ ဥက္ကဋ္ဌက ကက်ကက်လန်အောင် ရန် ထောင်စကားပြောရာ ရန်ကုန် လက် ပတ်နာရီလည်း ‘ဆိတ်ဆိတ်နေက ထောင်တန်၏’ ဟူသော ဆိုရိုးစကား အတိုင်း တုံဏှိဘာဝေဆိတ်ဆိတ် သာနေလိုက်လေ၏။
ရန်ကုန်လက်ပတ်နာရီ၏ ထိပ် တန်းလျှို့ဝှက်ချက်ကိုကား မည်သူမျှ မသိနိုင်ကြပေ။ ရန်ကုန်လက်ပတ် နာရီ၏ လက်နှစ်ဖက်စလုံးမှ လက် ပတ်နာရီများတွင် နာရီအိမ်၌ Patek Phillipe ဟူသော စာတန်းများ ပါရှိ ကြသော်လည်း နာရီအိမ်များအတွင်း မှာ မည်သည့်စက် အစိတ်အပိုင်းမျှ မပါရှိကြဘဲ ဗလာခွံတွေချည်းဖြစ်ကြ သည်။ နာရီအိမ်နှင့် လက်ပတ်ကြိုး များမှာလည်း အပေါစား အတုချည်း သာဖြစ်ကြ သည်။
မကြာမီ ရန်ကုန်လက်ပတ် နာရီမှာ နာရီအတုလိမ်လည်ရောင်း ချမှုဖြင့် အဖမ်းခံလိုက်ရရှာသည်။ သူ့လက်ကောက်ဝတ်နှစ်ဖက်တွင် လက်ပတ်နာရီအစား နီကယ်ရောင် တဝင်းဝင်းနှင့် လက်ထိပ်သံမဏိကွင်း တွေက ခံ့ညားထည်ဝါစွာ နေရာယူလိုက်ကြပါပြီတည်း။
ကြူးနှစ်
