မန္တလေး၊ ဩဂုတ် ၁၅
မန္တလေးမြို့၌ ကျင်းပသည့် Mountain Bike (MTB) လူသစ်တန်း စက်ဘီးစီးပြိုင်ပွဲတွင် အသက် ၆၀ နှင့်အထက် ၁၂ ဦးအပါအဝင် အားကစားသမား စုစုပေါင်း ၄၉၁ ဦး ဝင်ရောက်ယှဉ်ပြိုင်ခဲ့ကြောင်း သိရသည်။
အဆိုပါပြိုင်ပွဲကို မန္တလေးတိုင်းဒေသကြီးအစိုးရအဖွဲ့၊ တိုင်းဒေသကြီး သစ်တောဦးစီးဌာနနှင့် အားကစားနှင့်ကာယပညာဦးစီးဌာနတို့ ပူးပေါင်း၍ ဩဂုတ် ၁၄ ရက် နံနက်ပိုင်းက ကျင်းပခဲ့ခြင်းဖြစ်ပြီး နံနက် ၅ နာရီခွဲတွင် တိရစ္ဆာန်ဥယျာဉ် (ရတနာပုံ) ရှေ့မှ တာလွှတ်ခဲ့သည်။
ပြိုင်ပွဲတွင် အသက် ၁၆ နှစ်နှင့်အထက် အမျိုးသား၊ အမျိုးသမီးများ ပါဝင်ယှဉ်ပြိုင်ခဲ့ကြပြီး စုစုပေါင်း ပြိုင်ပွဲဝင် ၄၉၁ ဦးအနက် အသက် ၆၀ နှင့်အထက် ပြိုင်ပွဲဝင် ၁၂ ဦးလည်း ပါဝင်ခဲ့သည်။
ပြိုင်ပွဲဝင်များသည် မန္တလေးမြို့ရှိ တိရစ္ဆာန်ဥယျာဉ် (ရတနာပုံ) မှ ပြင်ဦးလွင်မြို့ရှိ အမျိုးသားကန်တော်ကြီးဥယျာဉ်အထိ ၄၃ မိုင်ခရီးကို သတ်မှတ်လမ်းကြောင်းအတိုင်း စီးနင်းယှဉ်ပြိုင်ခဲ့ကြပြီး ပြိုင်ပွဲအပြီးတွင် ဆုရရှိသူများအား တာဝန်ရှိသူများက ဆုများပေးအပ်ချီးမြှင့်ခဲ့သည်။
ယင်းပြိုင်ပွဲကို စက်ဘီးစီးအားကစားလှုပ်ရှားမှု မြှင့်တင်ရန်၊ နိုင်ငံ့ဂုဏ်ဆောင် ထူးချွန်အားကစားသမားများ ပေါ်ထွက်လာစေရန်၊ သဘာဝပတ်ဝန်းကျင်နှင့် တောရိုင်းတိရစ္ဆာန် ထိန်းသိမ်းရေးဆိုင်ရာ အသိပညာများ ပိုမိုရရှိလာစေရန်နှင့် ဒေသတွင်းခရီးသွားလုပ်ငန်း ဖွံ့ဖြိုးတိုးတက်ရေးကို အထောက်အကူပြုနိုင်ရန် ရည်ရွယ်ကျင်းပခဲ့ခြင်းဖြစ်ကြောင်း သိရသည်။