ဇူလိုင်လအတွင်းက အိန္ဒိယဝန်ကြီးချုပ် နာရင်ဒြာမိုဒီ၏ ပို့စ်တစ်ခုကို ခဏတာ ကန့်သတ်မိခဲ့မှုအတွက် အိန္ဒိယသတင်းအချက်အလက်နည်းပညာဝန်ကြီးကို တောင်းပန်ခဲ့ကြောင်း Meta ပလက်ဖောင်း၏ ကမ္ဘာ့ရေးရာ အရာရှိချုပ် ဂျိုးလ် ကက်ပလန်က ဗုဒ္ဓဟူးနေ့က သတင်းထုတ်ပြန်ချက်တွင် ပြောကြားခဲ့သည်။
“ဝန်ကြီးချုပ် မိုဒီရဲ့ ပို့စ်ကို ကန့်သတ်မိခဲ့တဲ့ အမှားအယွင်းအတွက် မက်တာကိုယ်စား ဝန်ကြီးကို တောင်းပန်ခဲ့ပါတယ်” ဟု ကက်ပလန်က ပြောကြားခဲ့သည်။
မိုဒီ၏ ပို့စ်တစ်ခုကို ဖေ့စ်ဘုတ်က ခဏတာကန့်သတ်ခဲ့ပြီးနောက် အိန္ဒိယသတင်းအချက်အလက်နှင့် နည်းပညာဝန်ကြီးဌာနက ပြီးခဲ့သည့်လတွင် မက်တာ အမှုဆောင်အရာရှိများကို ဆင့်ခေါ်ခဲ့သည်။ လုပ်ဆောင်ချက်အမှားတစ်ခုကြောင့် ပို့စ်ကို မတော်တဆ ပိတ်မိခဲ့ကြောင်း မက်တာက ဖြေရှင်းခဲ့သည်။
မိုဒီကို အလွဲသုံးစားပြုလုပ်ထားသည့် ပုံစံဖြင့် ပုံဖော်ထားသည့် ဖေ့စ်ဘုတ်တွင် တင်ထားသော ဗီဒီယိုများနှင့်ပတ်သက်၍ အိန္ဒိယတောင်ပိုင်း ဟိုက်ဒရာဘတ်မြို့ရဲတပ်ဖွဲ့က မက်တာအိန္ဒိယ အကြီးအကဲ အေရွန် ဆရီနီဗက်စ်ကို အမှုဖွင့်ခဲ့ကြောင်း အကြီးတန်းရဲအရာရှိတစ်ဦးကို ကိုကား၍ ပြီးခဲ့သည့် သီတင်းပတ်တွင် ရို-က်တာသတင်းဌာနက ဖော်ပြခဲ့သည်။
အိန္ဒိယနိုင်ငံတွင် ဆယ်စုနှစ်တစ်ခုကျော်အတွင်း လူငယ်များဦးဆောင်သည့် အကြီးမားဆုံး ဆန္ဒပြပွဲများနှင့် ရင်ဆိုင်ရချိန်တွင် အဆိုပါဗီဒီယိုများ ပျံ့နှံ့သွားခဲ့သည်။ အစိုးရစစ်စာမေးပွဲတွင် မေးခွန်းပေါက်ကြားမှုများနှင့် ပတ်သက်၍ ဆန္ဒပြပွဲများဖြစ်ပွားခဲ့ခြင်းဖြစ်ပြီး ပညာရေးဝန်ကြီးသည် ရာထူးမှ နုတ်ထွက်ခဲ့ရသည်အထိဖြစ်ခဲ့သည်။
ယင်းဖြစ်ရပ်များသည် ဝန်ကြီးချုပ်နှင့် သက်ဆိုင်သည့် အကြောင်းအရာနှင့် ပတ်သက်၍ မက်တာနှင့် မိုဒီအစိုးရအကြား မကြာသေးမီက ဖြစ်ပေါ်ခဲ့သော တင်းမာမှုများ၏ တစ်စိတ်တစ်ပိုင်းဖြစ်သည်။ မိုဒီသည် မကြာသေးမီ ရက်သတ္တပတ်များအတွင်း တွင် ဆန္ဒပြသူများ၏ အွန်လိုင်းမှ ဝေဖန်မှုများ၊ ပြက်လုံးများနှင့် လှောင်ပြောင်မှုများကို အဆက်အပြတ်ရင်ဆိုင်နေခဲ့ရသည်။
ကုမ္ပဏီ၏ ပလက်ဖောင်းများတွင် ကလေးသူငယ်လိင်ပိုင်းဆိုင်ရာ အလွဲသုံးစားပြုသည့် အကြောင်းအရာများ၊ ဆိုးရွားသောအကြောင်းအရာအတုများနှင့် အခြားလုပ်ငန်းပိုင်းဆိုင်ရာ ပေါ့လျော့မှုများအတွက် မက်တာစီအီးအို မာ့ခ်ဇူကာဘတ်က အိန္ဒိယအစိုးရကို တောင်းပန်ခဲ့ကြောင်း ယနေ့အစောပိုင်းတွင် ဒေသခံမီဒီယာများက သတင်း ရေးသားဖော်ပြခဲ့ကြသည်။
Ref: အန်တာနာဇီယွန်းနားလ်