ဩဂုတ်လ ၅ ရက်
အင်ချွန်း အပြည်ပြည်ဆိုင်ရာ လေဆိပ်မှတစ်ဆင့် တောင်ကိုရီးယားနိုင်ငံသို့ လာရောက်သည့် နိုင်ငံခြားသား ခရီးသွားများသည် လူဝင်မှုကြီးကြပ်ရေးကောင်တာများတွင် အချိန်အတော်ကြာ စောင့်ဆိုင်းရလျက်ရှိကြောင်းသိရသည်။
သောကြာနေ့က အင်ချုံး အပြည်ပြည်ဆိုင်ရာ လေဆိပ် Terminal 1 ၌ နိုင်ငံခြားသား ခရီးသွားများသည် စစ်ဆေးမှုခံယူရန် တန်းစီစောင့်ဆိုင်းနေကြစဉ် အတန်းများသည် အလွန်အမင်း ရှည်လျားနေသည်ကို တွေ့ရသည်။ ခရီးသွား ၃၀၀ မှ ၄၀၀ ခန့်အထိ တန်းစီဧရိယာအတွင်း တိုးဝှေ့ဝင်ရောက်လာသဖြင့် ဝင်ပေါက်အနီးတွင် ရှုပ်ထွေးမှုများ ဖြစ်ပေါ်ခဲ့သည်။ လေဆိပ်နှင့် လူဝင်မှုကြီးကြပ်ရေး လမ်းညွှန်ဝန်ထမ်းများ ကူညီပေးနေသော်လည်း ရှုပ်ထွေးမှုကို မထိန်းချုပ်နိုင်ခဲ့ပါ။
မွန်းလွဲ ၁၂ နာရီခန့်တွင် စတင်တန်းစီသူများသည် မွန်းလွဲ ၁၃:၂၀ နာရီမှသာ စစ်ဆေးမှု ပြီးမြောက်ခဲ့သဖြင့် မိနစ် ၈၀ ခန့် ကြာမြင့်ခဲ့သည်။ ယင်းမှာ ယခုနှစ် ဖေဖော်ဝါရီလ တရုတ်နှစ်သစ်ကူး အားလပ်ရက်အတွင်း ၁ နာရီနှင့် ၅၄ မိနစ်အထိ ကြာမြင့်ခဲ့သော “လူဝင်မှုကြီးကြပ်ရေး အကျပ်အတည်း” ပြီးလျှင် အဆိုးရွားဆုံး ကြန့်ကြာမှု ဖြစ်သည်။ နိုင်ငံတကာ အရပ်ဘက် လေကြောင်းအဖွဲ့အစည်း (ICAO) ၏ စံချိန်စံညွှန်းအရ လူဝင်မှုကြီးကြပ်ရေး စောင့်ဆိုင်းချိန်ကို ၄၅ မိနစ်အတွင်းသာ ကန့်သတ်ထားရန် အကြံပြုထားသည်။
ကျပ်ညှပ်မှု ဖြစ်ပွားရသည့် အဓိကအကြောင်းရင်းမှာ တောင်ကိုရီးယားသို့ လာရောက်သည့် နိုင်ငံခြားသား ခရီးသွား အရေအတွက်က ရုတ်တရက် မြင့်တက်လာခြင်း ကြောင့်ဖြစ်သည်။ တောင်ကိုရီးယား လူဝင်မှုကြီးကြပ်ရေးဌာန၏ သတင်းထုတ်ပြန်ချက်အရ ဇွန်လအတွင်း နိုင်ငံခြားသား ဝင်ရောက်မှု သည် ၂.၀၄ သန်းအထိ ရှိခဲ့ပြီး ယခင်နှစ် အလားတူကာလထက် သိသိသာသာ တိုးတက်လာခဲ့သည်။
ထို့အပြင် လူဝင်မှုကြီးကြပ်ရေး ကောင်တာများကို လုံလောက်စွာ မဖွင့်လှစ်နိုင်ခြင်းကလည်း ကြန့်ကြာမှုကို ပိုမိုဆိုးရွားစေသည်။ သောကြာနေ့ မွန်းလွဲ ၁ နာရီတွင် နိုင်ငံခြားသားများအတွက် သီးသန့်ကောင်တာ ၂၀ အနက် ၁၁ ခုသာ ဖွင့်လှစ်ထားနိုင်ခဲ့သည်။
တရားရေးဝန်ကြီးဌာနအနေဖြင့် ဝန်ထမ်းအင်အား တိုးမြှင့်ရန် စီစဉ်နေသော်လည်း သင်တန်းများ ပေးရဦးမည်ဖြစ်၍ ယခုနှစ်ကုန်ပိုင်းမှသာ အင်အားဖြည့်တင်းနိုင်မည် ဖြစ်သည်။ လက်ရှိတွင် ခရီးသွားလာမှု အများဆုံး အချိန်များ၌ အရန်ဝန်ထမ်းများ ကူညီပေးရေးနှင့် ကောင်တာများကို တတ်နိုင်သမျှ အပြည့်အဝ ဖွင့်လှစ်ပေးနိုင်ရေး ဆောင်ရွက်လျက်ရှိသည်။
Ref: ဆော့သ်ချိုင်းနားမောနင်းပို့စ်