ရန်ကုန်၊ ဩဂုတ် ၅
မြန်မာနိုင်ငံတွင် အရည်အသွေးမြင့် ဆန်စပါးမျိုးစေ့များ ထုတ်လုပ်ဖြန့်ဖြူးနိုင်ရေးနှင့် မျိုးစေ့ကဏ္ဍ ဖွံ့ဖြိုးတိုးတက်ရေးအတွက် မြန်မာနိုင်ငံဆန်စပါးအသင်းချုပ် (MRF) ကိုယ်စားလှယ်အဖွဲ့သည် ဗီယက်နမ်နိုင်ငံသို့ သွားရောက်ကာ မျိုးစေ့ထုတ်လုပ်ရေး နည်းပညာများကို လေ့လာခဲ့ပြီး ဗီယက်နမ်နိုင်ငံရှိ ထိပ်တန်းမျိုးစေ့ကုမ္ပဏီများနှင့် နားလည်မှုစာချွန်လွှာ (MoU) များ ရေးထိုးခဲ့ကြောင်း သိရသည်။
Senior Project Consultant ဦးသက်ဇင်မောင်နှင့် Senior Advisor ဦးလွင်ဦးတို့ ဦးဆောင်သည့် ကိုယ်စားလှယ်အဖွဲ့ဝင် ၂၀ ဦးသည် ဇူလိုင် ၂၅ ရက်မှ ၃၁ ရက်အထိ ဗီယက်နမ်နိုင်ငံသို့ သွားရောက်ခဲ့ပြီး Loc Troi Seeds Joint Stock Company နှင့် Vietnam National Seed Group JSC (VINASEED) တို့ကို သီးခြားစီ တွေ့ဆုံခဲ့သည်။
ခရီးစဉ်အတွင်း မျိုးစေ့သန့်စင်စက်ရုံများ၊ စိုက်ပျိုးရေးစမ်းသပ်စိုက်ခင်းများ၊ သုတေသနနှင့် ဖွံ့ဖြိုးရေးဌာနများကို လေ့လာခဲ့ကြပြီး အရည်အသွေးမြင့် ဆန်စပါးမျိုးစေ့ ထုတ်လုပ်ရေး၊ မျိုးစေ့နည်းပညာနှင့် မျိုးစပ်နည်းပညာ ဖလှယ်ရေး၊ သုတေသနပူးပေါင်းဆောင်ရွက်ရေး၊ လေ့ကျင့်ပညာပေးရေးနှင့် မြန်မာနိုင်ငံတွင် မျိုးစေ့ထုတ်လုပ်ရေးလုပ်ငန်းများ၌ ရင်းနှီးမြှုပ်နှံနိုင်ရေးတို့ကို ဆွေးနွေးညှိနှိုင်းခဲ့ကြသည်။
ထို့ပြင် နှစ်ဖက်ပူးပေါင်း၍ မြန်မာနိုင်ငံအတွင်း အရည်အသွေးမြင့် ဆန်စပါးမျိုးစေ့ ထုတ်လုပ်ရေးနှင့် မျိုးစေ့ကဏ္ဍ ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်ရန် နားလည်မှုစာချွန်လွှာ (MoU) များကိုလည်း ရေးထိုးခဲ့ကြကြောင်း သိရသည်။
မြန်မာနိုင်ငံဆန်စပါးအသင်းချုပ်အနေဖြင့် နိုင်ငံတော်၏ လမ်းညွှန်ချက်နှင့်အညီ တန်ဖိုးမြင့်ဆန်များ စိုက်ပျိုးထုတ်လုပ်တင်ပို့နိုင်ရေးကို ဦးတည်ဆောင်ရွက်လျက်ရှိပြီး နိုင်ငံတကာဈေးကွက်တွင် ယှဉ်ပြိုင်နိုင်သည့် အရည်အသွေးမြင့်၊ အနံ့အရသာကောင်းပြီး ရှည်သွယ်သည့် Aromatic, Long and Slender Grain ဆန်မျိုးများကို ပြည်တွင်း၌ ထုတ်လုပ်ဖြန့်ဖြူးနိုင်ရေးအတွက် ကြိုးပမ်းဆောင်ရွက်လျက်ရှိကြောင်း သိရသည်။
ထို့အပြင် နိုင်ငံတော်အစိုးရ၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ လမ်းညွှန်အကြံပြုချက်များနှင့်အညီ မြန်မာနိုင်ငံ၏ မျိုးစေ့ကဏ္ဍ ဖွံ့ဖြိုးတိုးတက်ရေးကို ပုဂ္ဂလိကကဏ္ဍမှ ဦးဆောင်အကောင်အထည်ဖော် ဆောင်ရွက်လျက်ရှိကြောင်း မြန်မာနိုင်ငံဆန်စပါးအသင်းချုပ်က ထုတ်ပြန်ထားသည်။