အိန္ဒိယက ပထမဆုံး ပုဂ္ဂလိက ကမ္ဘာပတ်ဒုံးပျံ လွှတ်တင်

အိန္ဒိယ အာကာသစွန်းဦးတီထွင်ကုမ္ပဏီ Skyroot Aerospace သည် နိုင်ငံ၏ ပထမဆုံး ပုဂ္ဂလိကပိုင် ကမ္ဘာပတ်ဒုံးပျံကို လွှတ်တင်ခဲ့ပြီး ကမ္ဘာ့စီးပွားဖြစ် ဒုံးပျံလွှတ်တင်ရေးဈေးကွက်၏ ပိုမိုကြီးမားသော ဈေးကွက်ဝေစုအတွက် ယှဉ်ပြိုင်ရန် နိုင်ငံအဆင့်ကြိုးပမ်းအားထုတ်မှု၏ အဓိကစမ်းသပ်မှုတစ်ခုဖြစ်သည်။

ဗစ်ကရမ်-၁ ဒုံးပျံကို ဂရင်းနစ်စံတော်ချိန် နံနက် ၆း၃၅ နာရီတွင် စရီဟာရီကိုတာ ရှိ ဆာတစ်ရှ် ဒါဝမ် အာကာသစင်တာ က လွှတ်တင်ခဲ့သည်။ မစ်ရှင်အဂ္ဂမန် ဟု အမည်ပေးထားသော ၎င်း၏ ပထမဆုံး ကမ္ဘာပတ်လမ်းကြောင်းမစ်ရှင်တွင် ဖောက်သည်များ၏ ပစ္စည်းကိရိယာများနှင့် ဂြိုဟ်ပတ်လမ်းကြောင်းအတွင်း စမ်းသပ်ချက်များကို သယ်ဆောင်သွားခဲ့သည်။
      
အဆိုပါ မစ်ရှင်သည် အနာဂတ်စီးပွားဖြစ် လွှတ်တင်မှုများအတွက် ဒေတာများစုဆောင်းရင်း ဒုံးပျံ၏ မောင်းနှင်အား၊ လေကြောင်းဆိုင်ရာ ကိရိယာများ၊ တယ်လီမက်ထရီ၊ လမ်းညွှန်မှု၊ လမ်းကြောင်းပြစနစ်များနှင့် ထိန်းချုပ်စနစ်များကို အတည်ပြုရန် ရည်ရွယ်ထားကြောင်း Skyroot က ပြောကြားခဲ့သည်။
        
“မစ်ရှင်အဂ္ဂမန်သည် အလွန်အောင်မြင်ပါသည်” ဟု သတင်းထုတ်ပြန်ချက်တွင် ကုမ္ပဏီက ပြောကြားခဲ့သည်။ “ဒါက စမ်းသပ်ပျံသန်းမှုတစ်ခုပါ၊ ပုံမှန် စီးပွားဖြစ်ပျံသန်းတာတွေ မပြုလုပ်ခင်မှာ ဒီလို ပျံသန်းမှုအနည်းငယ်ကို ကျွန်တော်တို့ လုပ်ဆောင်သွားမှာဖြစ်ပါတယ်” ဟု ဆက်လက်ပြောကြားခဲ့သည်။
       
၂၀၁၈ ခုနှစ်တွင် စတင်တည်ထောင်ခဲ့သော စကိုင်းရုတ်သည် အိန္ဒိယအာကာသ စွန့်ဦးတီထွင် မျိုးဆက်သစ်များထဲမှ တစ်ခုဖြစ်ပြီး အာကာသကဏ္ဍကို လွတ်လပ်ခွင့်ပေးပြီးနောက် ကမ္ဘာလုံးဆိုင်ရာ ရင်းနှီးမြှုပ်နှံသူများထံမှ ထောက်ခံမှုကို ဆွဲဆောင်နိုင်ခဲ့သည်။
        
၎င်းသည် ယခုနှစ်အစောပိုင်းတွင် ဒေါ်လာ ၁ ဘီလျံတန်ဖိုးရှိသော နိုင်ငံ၏ ပထမဆုံး အာကာသကဏ္ဍ ကုမ္ပဏီဖြစ်လာခဲ့သည်။
       
ကမ္ဘာတစ်ဝန်း အသေးစားဂြိုဟ်တုလွှတ်တင်ရေးဈေးကွက်တွင် ပြိုင်ဆိုင်မှုပြင်းထန်လာချိန်၌ အိန္ဒိယမစ်ရှင် ပေါ်ပေါက်လာခြင်းဖြစ်ပြီး စွန့်ဦးတီထွင်ကုမ္ပဏီများသည် အယ်လွန်မတ်စ်၏ SpaceX ဦးဆောင်သော လက်ရှိ ကုမ္ပဏီများကို စိန်ခေါ်နိုင်ရန် ကြိုးပမ်းနေကြသည်။

Ref: သယ်စထရိတ်တိုင်းမ်စ်