ပင်လယ်ပြင်သို့ပို့ဆောင်မည့် ငွေကျပ်ဘီလီယံ(၂၀) ကျော်တန်ဖိုးရှိ အိုက်စ်များကို ပြစ်မှုကျူးလွန်သူများနှင့်အတူ လယ်ဝေးနှင့် ဒလမြို့နယ်တို့တွင်ဖမ်းဆီးရမိခဲ့ကြောင်း သိရသည်။
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များပါ ဝင်သောပူးပေါင်းအဖွဲ့သည် ဇူလိုင် ၆ ရက်ည ၁၀ နာရီခွဲခန့်က လယ်ဝေးမြို့နယ်၊ တောင်စဉ်အေးကျေးရွာအနီးတွင် ကျော်ဦး မောင်းကာ ဇော်ဇော်ထွန်း လိုက်လာသည့် GOVZCT ၆ ဘီးကားပေါ်မှ အိုက်စ်(မက်သ်အဖက်တမင်း) ၅၀၀ ကီလိုအား ဖမ်းဆီးရမိခဲ့ကြောင်း သိရသည်။
စစ်ဆေးချက်များအရ ဇူလိုင် ၇ ရက်ည ၇ နာရီခွဲခန့်တွင် အိုက်စ်(မက်သ်အဖက်တမင်း)များသယ်ဆောင်ရောင်းဝယ်ရာ၌ပူးပေါင်းပါဝင်သူများဖြစ်သည့် ဇေယျာလင်းနှင့် ထွေးမင်းဇော်၊ ဇူလိုင် ၈ ရက်နံနက် ၈ နာရီခွဲခန့်တွင် မျိုးသန်းတို့အား ထပ်မံဖမ်းဆီးရမိခဲ့ကြောင်း သိရသည်။
ထို့ပြင် နံနက် ၁၁ နာရီခွဲခန့်၌ ဝေထွန်း ပိုင်ဆိုင်သည့် ဒလမြို့၊ မှောက်စက်ရပ်ကွက်၊ ရန်ကုန်မြစ်ကမ်းတွင်ဆိုက်ကပ်ထားသော မိဘမေတ္တာ(၁)စက်လှေပေါ်မှ ခင်မောင်ထွန်း၊ စမျိုးမင်း၊ ကျော်ကျော်ဝင်း၊ ဝင်းနိုင်ဦး၊ မိုးဇော်ဦး၊ မောင်မောင်၊ ချိုလွင်၊ သန်းဝေ၊ လှမျိုးခိုင်၊ မြင့်ခိုင်တို့အား အိုက်စ်(မက်သ်အဖက်တမင်း) ၃၁၀ ကီလိုနှင့်အတူ ထပ်မံဖမ်းဆီးရမိခဲ့ပြီး အိုက်စ်(မက်သ်အဖက်တမင်း)များကို ပင်လယ်ပြင်သို့သယ်ဆောင်ရာတွင် ပူး ပေါင်းပါဝင်သူ ကျော်ဦးနှင့် ရာဇာဟိန်းတို့ကိုလည်း ဖမ်းဆီးရမိခဲ့ကြောင်း သိရသည်။
စစ်ဆေးချက်များအရ အိုက်စ်(မက်သ်အဖက်တမင်း) များအား ရှမ်းပြည်နယ်(မြောက်ပိုင်း)မှ ရန်ကုန်သို့ တာ ဝန်ခံသယ်ဆောင်သူမှာ လားရှိုးမြို့နယ်နေ ရန်ကြားရှော (ခ)ရန်ကုလား(ဖမ်းဆီးရန်ကျန်)၊ ရန်ကုန်မှ ပင်လယ်ပြင်သို့တင်ပို့ရာတွင် အဓိကစီမံခန့်ခွဲသူမှာ မှော်ဘီမြို့နယ်နေ ဝီလျံထွန်း ကုမ္ပဏီပိုင်ရှင် ဝေထွန်း(ဖမ်းဆီးရန်ကျန်) ၊ ပူးပေါင်းပါဝင်သူများဖြစ်သည့် ဝီလျံထွန်းကုမ္ပဏီဒါရိုက်တာအဖွဲ့ဝင်များဖြစ်သည့် မြတ်သူ(ဖမ်းဆီးရန်ကျန်)၊ ရာဇာဟိန်း(ခ)ရာဇာ၊ မျိုးသန်းတို့ဖြစ်ကြောင်းဖော်ထုတ်သိရှိခဲ့ရသည်။
ထို့ကြောင့် ဖမ်းဆီးရမိသူများနှင့် တိမ်းရှောင်နေသူများအား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရအရေးယူထားကာ ၎င်းတို့၏မူးယစ်ဆေးဝါးသယ်ဆောင်ရောင်းဝယ်ရာမှရရှိသည့် ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေ ကြေးခဝါချမှုတိုက်ဖျက်ရေးဥပဒေဖြင့်လည်း ဆက် လက်အရေးယူထားကြောင်း သိရသည်။
