မြန်မာနိုင်ငံ အမျိုးသားလူ့အခွင့်အရေးကော်မရှင်က ဇန်နဝါရီမှ ဇွန်လအထိ တိုင်ကြားစာ (၂၉၅) မှုကို စိစစ်ဆောင်ရွက်ခဲ့ပြီး အမှုအချို့ကို သက်ဆိုင်ရာဌာနများသို့ လွှဲပြောင်းအကြံပြုခဲ့ကြောင်း ကော်မရှင်က ဇူလိုင် ၁၄ ရက်တွင် ထုတ်ပြန်သည်။
ကော်မရှင်ထံ ၂၀၂၆ ခုနှစ် ဇန်နဝါရီလမှ ဇွန်လအထိ ရောက်ရှိလာသည့် မီဒီယာသတင်းများအပါအဝင် တိုင်ကြားစာ (၂၉၅) မှုကို ကော်မရှင်ဥပဒေဆိုင်ရာ လုပ်ထုံးလုပ်နည်း အပိုဒ် ၇ အရ စုံစမ်းစစ်ဆေးရေးအဖွဲ့ အစည်းအဝေး (၂၁) ကြိမ်ကျင်းပ၍ စိစစ်ဆောင်ရွက်ခဲ့ကြောင်း သိရသည်။
စိစစ်ဆောင်ရွက်ခဲ့သည့် အမှုများအနက် (၆၄) မှုကို သက်ဆိုင်ရာ အစိုးရဌာနနှင့် အဖွဲ့အစည်းများထံ စစ်ဆေးဆောင်ရွက်ပေးရန် အကြံပြုတိုက်တွန်းခဲ့ပြီး (၃၃) မှုကို တိုင်ကြားသူများထံ အကြံပြုပြန်ကြားခဲ့ကြောင်း ထုတ်ပြန်ချက်တွင် ဖော်ပြထားသည်။
ကျန်ရှိသည့် တိုင်ကြားစာ (၁၉၆) မှုမှာ ကော်မရှင်ဥပဒေပုဒ်မ ၃၇ အရ တရားရုံးတွင် စစ်ဆေးကြားနာဆဲအမှုများ၊ အယူခံ သို့မဟုတ် ပြင်ဆင်မှုဆောင်ရွက်ဆဲအမှုများ၊ တရားရုံးက အပြီးသတ်စီရင်ဆုံးဖြတ်ပြီးသော အမှုများ၊ တိုင်ကြားချက်အင်္ဂါရပ်နှင့် မကိုက်ညီသည့် အမှုများနှင့် ယခင်ဆောင်ရွက်ပြီးဖြစ်သည့် အမှုများဖြစ်သဖြင့် မှတ်တမ်းတင်ထားရှိခဲ့ကြောင်း၊ ထို့ပြင် ကာယကံရှင်၏ သဘောဆန္ဒဖြင့် အမှုပိတ်သိမ်းခဲ့သည့် အမှု (၂) မှုလည်း ပါဝင်ကြောင်း သိရသည်။
ထို့အပြင် ကော်မရှင်သည် ကော်မရှင်ဥပဒေပုဒ်မ ၄၃ အရ အကျဉ်းကျနေသူများ၊ အချုပ်အနှောင်ခံနေရသူများနှင့် ထိန်းသိမ်းစောင့်ရှောက်ထားသူများ၏ လူ့အခွင့်အရေးအခြေအနေကို စစ်ဆေးနိုင်ရန် ၂၀၂၆ ခုနှစ် ပထမခြောက်လအတွင်း ဗဟိုအကျဉ်းထောင် (၂) ခု၊ အချုပ်ထောင် (၁) ခု၊ အကျဉ်းစခန်း (၄) ခု၊ ရဲစခန်းအချုပ်ခန်း (၇) ခု၊ တရားရုံးအချုပ်ခန်း (၂) ခု၊ လူငယ်သင်တန်းကျောင်း (၃) ခုနှင့် ဘိုးဘွားရိပ်သာ (၃) ခုကို သွားရောက်ကြည့်ရှုစစ်ဆေးခဲ့ကြောင်း ထုတ်ပြန်ထားသည်။
စစ်ဆေးမှုများအပြီးတွင် သက်ဆိုင်ရာဝန်ကြီးဌာနများထံ အကြံပြုချက်များ ပေးပို့ခဲ့သည့်အပြင် အကျဉ်းထောင်၊ အကျဉ်းစခန်းနှင့် အချုပ်ခန်းများ၌ အကျဉ်းသားနှင့် အချုပ်သား စုစုပေါင်း (၉၈) ဦးကို တစ်ဦးချင်း သီးခြားတွေ့ဆုံမေးမြန်း၍ ၎င်းတို့၏ တင်ပြချက်များကို မှတ်တမ်းတင်ခဲ့ကြောင်း မြန်မာနိုင်ငံ အမျိုးသားလူ့အခွင့်အရေးကော်မရှင်၏ ထုတ်ပြန်ချက်တွင် ဖော်ပြထားသည်။