ယူနစ် ၇ သန်းကျော် အလွဲသုံးစားပြုလုပ်ခဲ့ကြောင်း စစ်ဆေးတွေ့ရှိ
နေပြည်တော်၊ ဇူလိုင်-၁၅
လျှပ်စစ်နှင့် စွမ်းအင်ဝန်ကြီးဌာနသည် ပြည်သူများထံသို့ လျှပ်စစ်ဓာတ်အား ပိုမိုတိုးမြှင့်ဖြန့်ဖြူးပေးနိုင်ရေးအတွက် ကြိုးပမ်းဆောင်ရွက်လျက်ရှိရာ မသမာသောနည်းလမ်းဖြင့် လျှပ်စစ်ဓာတ်အား ခိုးယူသုံးစွဲမှုများ ပပျောက်စေရန် အဖွဲ့များခွဲ၍ အထူးအလေးထား စစ်ဆေးဖော်ထုတ်လျက်ရှိကြောင်း သိရသည်။
ထိုသို့ စစ်ဆေးဆောင်ရွက်ခဲ့ရာ ရက် ၁၀၀ စီမံချက်ကာလအတွင်း စုစုပေါင်း တရားမဝင် ဓာတ်အားခိုးယူသုံးစွဲမှု အမှုပေါင်း ၃၄၀ ကို စိစစ်တွေ့ရှိခဲ့ကြောင်း သိရသည်။
ယင်းအမှုများတွင် စုစုပေါင်း လျှပ်စစ်ယူနစ် ၇ ဒသမ ၇ သန်းကျော်ကို အလွဲသုံးစားပြုလုပ်ခဲ့ကြသဖြင့် နိုင်ငံတော်မှ နစ်နာဆုံးရှုံးခဲ့ရသည့်အတွက် လျော်ကြေးနှင့် ဒ-ဏ်ကြေးငွေ စုစုပေါင်း ကျပ် ၆၇၄၅ သန်းကျော်ကို ပြန်လည်ကောက်ခံရရှိခဲ့ကြောင်း သိရသည်။
အဆိုပါ မသမာမှုဖြစ်စဉ်များကို ကျူးလွန်ခဲ့ကြသည့် မီတာပိုင်ရှင်များနှင့် လုပ်ငန်းရှင်များကို လျှပ်စစ်ဥပဒေဖြင့် ထိရောက်စွာ အရေးယူဆောင်ရွက်လျက်ရှိပြီး၊ ပါဝင်ပတ်သက်မှုရှိသည့် တာဝန်ရှိဝန်ထမ်းများကိုလည်း ထိရောက်စွာ အရေးယူဆောင်ရွက်ထားရှိပြီး ဖြစ်ကြောင်းလည်း အသိပေးထုတ်ပြန်ထားသည်။
လျှပ်စစ်နှင့် စွမ်းအင်ဝန်ကြီးဌာနအနေဖြင့် Control Center များမှတစ်ဆင့် စောင့်ကြည့်စစ်ဆေး၍ သံသယဖြစ်ဖွယ်တွေ့ရှိရသည်နှင့် မြေပြင်သို့ အမြန်ဆုံးသွားရောက်စစ်ဆေးခြင်း၊ ပြည်သူများ၏ တိကျသော သတင်းပေးတိုင်ကြားချက်များအပေါ် ထိရောက်စွာ စစ်ဆေးအရေးယူခြင်းတို့ကို လုပ်ဆောင်လျက်ရှိသည်။
လျှပ်စစ်ဓာတ်အား လေလွင့်ပျေ-ာက်ဆုံးမှုများ လျော့နည်းပပျေ-ာက်ပြီး ပြည်သူများထံ ဓာတ်အား ပိုမိုဖြန့်ဖြူးပေးနိုင်ရေးအတွက် ပြည်သူလူထုအနေဖြင့် ပိုမိုပူးပေါင်းဆောင်ရွက်ပေးကြရန် အသိပေးနှိုးဆော်ထားကြောင်း သိရှိရသည်။