တရုတ်ကစွမ်းအားမြင့်မိုက်ခရိုဝေ့ဖ်လက်နက်ပိုင်ဆိုင်မှုကိုထုတ်ဖော်

တရုတ်နိုင်ငံ၏ စွမ်းအားမြင့် မိုက်ခရိုဝေ့ဖ် (High-Power Microwave – HPM) လက်နက်များသည် ပါဝါထုတ်လွှတ်မှု ဂီဂါဝပ် ၁၀၀ (100 GW) အထိ စွမ်းဆောင်နိုင်ပြီဖြစ်ကြောင်း စစ်ဘက်ဆိုင်ရာ သိပ္ပံပညာရှင်များက ပြောကြားခဲ့သည်။ အဆိုပါမှတ်တိုင်စိုက်ထူနိုင်မှုသည် အနာဂတ်စစ်ဆင်ရေးပုံစံများကို ပြောင်းလဲပစ်နိုင်သည့်အပြင် အရပ်ဘက်ဆိုင်ရာ သုတေသနနှင့် စက်မှုကဏ္ဍများ တိုးတက်မှုကိုလည်း တွန်းအားပေးနိုင်မည် ဖြစ်သည်။

ယခုလထုတ် “High Power Laser and Particle Beams” ဂျာနယ်တွင် ဖော်ပြထားသော သုတေသနစာတမ်း၌ တရုတ်အမျိုးသား ကာကွယ်ရေးနည်းပညာတက္ကသိုလ် (NUDT) မှ သုတေသီများက တရုတ်စစ်တပ်က မကြာသေးမီနှစ်များအတွင်း တည်ဆောက်ခဲ့သည့် အချိန်တိုအတွင်း စွမ်းအားမြင့်လျှပ်စစ်စွမ်းအင် ထုတ်လွှတ်သည့် စက်များ (Pulsed-power devices) အကြောင်းကို အသေးစိတ် ဖော်ပြထားသည်။ ၎င်းသည် တရုတ်စစ်တပ်အနေဖြင့် ၎င်းတို့၏ စွမ်းအားမြင့် မိုက်ခရိုဝေ့ဖ်လက်နက် အင်အားစုကို လူသိရှင်ကြား အလွန်ရှားရှားပါးပါး ထုတ်ဖော်ပြသခဲ့ခြင်း ဖြစ်သည်။

NUDT ၏ အဆင့်မြင့် ဘာသာရပ်ပေါင်းစုံ လေ့လာရေးကောလိပ်မှ Zhang Jun ဦးဆောင်သော သုတေသီများက “မကြာသေးမီနှစ်များအတွင်း စဉ်ဆက်မပြတ်ရှိနေသော နိုင်ငံတော်၏ မဟာဗျူဟာမြောက် လိုအပ်ချက်များကြောင့် တရုတ်နိုင်ငံ၏ Pulsed-power နည်းပညာသည် လျင်မြန်စွာ တိုးတက်လာခဲ့သည်။ ယခုအခါ ယင်းနယ်ပယ်တွင် သုတေသနပြုလုပ်မှု၏ အကျယ်အဝန်းနှင့် အတိမ်အနက်သည် ကမ္ဘာ့အရှေ့တန်းအဆင့်တွင် ရပ်တည်နေပြီဖြစ်သည်” ဟု ရေးသားထားသည်။

၎င်းတို့က ဆက်လက်၍ “HPM ထုတ်လွှတ်ရန်အတွက် အသုံးပြုသည့် Pulsed-power drivers များသည် ဓာတ်ခွဲခန်းသုံး ရှေ့ပြေးပုံစံအဆင့်မှ လက်တွေ့အသုံးချနိုင်သည့် အဆင့်သို့ ကူးပြောင်းလာပြီဖြစ်ပြီး လုပ်ဆောင်ချက်ရှိရုံမျှ အဆင့်မှသည် စွမ်းဆောင်ရည်မြင့်မားခြင်း နှင့် ရေရှည်ခံနိုင်ရည်ရှိခြင်း တို့ဆီသို့ တဖြည်းဖြည်း တိုးတက်ပြောင်းလဲလာခဲ့သည်” ဟု ဖော်ပြထားသည်။

အဆိုပါစာတမ်းသည် ကြီးမားသော ဂြိုဟ်တုအစုအဝေးအလိုက်စေလွှတ်ထားရှိများ၏ ထိခိုက်လွယ်နိုင်စွမ်းကို ဆန်းစစ်သုံးသပ်နေကြသည့် အခြားနိုင်ငံများအတွက် ကိုးကားစရာ အချက်အလက်တစ်ခု ဖြစ်လာနိုင်ကြောင်း သိရသည်။

Ref: ဆော့သ်ချိုင်းနားမောနင်းပို့စ်