မလေးရှားနိုင်ငံတွင် ဒူးရင်းသီး ကို နှစ်ခြိုက်မှုသည်အလွန်ရေပန်းစားလာသဖြင့် ဇူလိုင်လ ၄ ရက်က “ကွာလာလမ်ပူရ် ဒူးရင်းသီးအတွေ့ အကြုံမျှဝေရေးစင်တာ” (Kuala Lumpur Durian Experience Centre – KLDEX) ကို တရားဝင် ဖွင့်လှစ်ခဲ့သည်။ စင်တာဖွင့်ပွဲကို စနွေ၊ တနင်္ဂနွေ ပိတ်ရက်များတွင် ကျင်းပသည့် မလေးရှား ဒူးရင်းသီးပွဲတော် ၂၀၂၆ နှင့်အတူ ပူးတွဲကျင်းပခဲ့ခြင်း ဖြစ်သည်။
ဂျလန်အမ်ပန်း လမ်းမပေါ်တွင် တည်ရှိပြီး အာရှ၏ ပထမဆုံးသော ဘက်စုံသုံး ဒူးရင်းသီး အတွေ့ အကြုံမျှဝေရေးစင်တာဖြစ်သည့် KLDEX ကို မလေးရှား ခရီးသွားလာရေး၊ အနုပညာနှင့် ယဉ်ကျေးမှုဝန်ကြီးဌာန၏ ပံ့ပိုးကူညီမှုဖြင့် MyBolehBoleh အဖွဲ့က တည်ဆောက်ခဲ့ခြင်း ဖြစ်သည်။ ၎င်းသည် မလေးရှားနိုင်ငံ၏ အထင်ကရ ဒူးရင်းသီးစိုက်ပျိုးထုတ်လုပ်မှုကဏ္ဍကို မြှင့်တင်ပေးရန်နှင့် ကမ္ဘာ့အဆင့်မီ အချက်အပြုတ်နှင့် ခရီးသွားလာရေး အချက်အချာနေရာတစ်ခုအဖြစ် နိုင်ငံ၏ ရပ်တည်ချက်ကို ပိုမိုခိုင်မာစေရန် ရည်ရွယ်သည်။
စတုရန်းမီတာ ၁,၉၀၀ ကျယ်ဝန်းသော KLDEX တွင် ဒူးရင်းသီးပြတိုက်၊ အဆင့်မြင့်အာရုံခံစားမှုပြဇာတ်ရုံ၊ အစားအသောက်နှင့် အဖျော်ယမကာဆိုင်များ၊ အပြန်အလှန်အလုပ်ရုံဆွေးနွေးပွဲများနှင့် ယဉ်ကျေးမှုဆိုင်ရာ ပုံပြင်ပြောပြခြင်း အစီအစဉ်များ ပါဝင်သည်။ ဒူးရင်းသီး မြည်းစမ်းမှု အစီအစဉ်များအတွက်မူ ကြိုတင်စာရင်းပေးသွင်းရန် လိုအပ်သည်။ ယင်းစင်တာသည် ဒူးရင်းသီး၏ သမိုင်းကြောင်း၊ စိုက်ပျိုးမှုပုံစံ၊ သိပ္ပံနည်းကျ တိုးတက်မှုများနှင့် တီထွင်ဆန်းသစ်မှုများကို လေ့လာနိုင်မည့် ခရီးစဉ်တစ်ခုကို ပေးစွမ်းမည်ဖြစ်သည်။ ပြတိုက်ကို နေ့စဉ် နံနက် ၁၀၃၀ နာရီမှ ည ၁၀၃၀ နာရီအထိ ဖွင့်လှစ်ထားပြီး လက်မှတ်စျေးနှုန်းမှာ မလေးရှားရင်းဂစ် RM31 မှ RM49 (စင်ကာပူဒေါ်လာ ၉.၈၀ ဝန်းကျင်) အတွင်း ရှိသည်။
လာရောက်လည်ပတ်သူများသည် သမိုင်းဝင်မော်ကွန်းများနှင့် အပြန်အလှန်ပြသကွက်များကို ကြည့်ရှုပြီးနောက် တစ်ရက်လျှင် ၄ ကြိမ် ပြသပေးမည့် ပြဇာတ်ရုံသို့ သွားရောက်နိုင်သည်။ ယင်းပြဇာတ်သည် ဒူးရင်းသီး ကုန်သည်ပြိုင်ဘက်နှစ်ဦးအကြား အကြိတ်အနယ် ယှဉ်ပြိုင်ရာမှ နောက်ဆုံးတွင် သူငယ်ချင်းများ ဖြစ်သွားကြသည့်အကြောင်းကို ရပ်ပ်သီချင်း၊ ဟာသများနှင့် မလေးရှားနိုင်ငံ၏ နာမည်ကြီး ဒူးရင်းသီးမျိုးစိတ်များကို ထည့်သွင်းကာ သစ်သီးဝလံယဉ်ကျေးမှုအမွေအနှစ်ကို သက်ဝင်လှုပ်ရှားစွာ တင်ဆက်ထားခြင်း ဖြစ်သည်။
KLDEX ကို အန်းကင်းဝီ နှင့် အက်ဒီဆင် အန်းဝေဖန်း တို့က ပူးတွဲတည်ထောင်ခဲ့ပြီး အန်ဇိုဆင် က ပြတိုက်မှူးအဖြစ် စီမံကာ “သစ်သီးဝလံတို့၏ ဘုရင်” ဟု တင်စားကြသည့် မလေးရှားဒူးရင်းသီးကို ဂုဏ်ပြုသည့် မိသားစုအလိုက် လည်ပတ်နိုင်သော နေရာတစ်ခုအဖြစ် ပုံဖော်ထားသည်။
ပညာရေးဗဟိုဌာနတစ်ခုအဖြစ် ရည်ရွယ်သည့် အဆိုပါပြတိုက်တွင် ၁၅ ရာစုနှစ်အတွင်း အာဆီယံဒေသသို့ ရောက်ရှိလာခဲ့သော ကမ္ဘာလှည့်ခရီးသည်များနှင့် တရုတ်ရေတပ်ဗိုလ်ချုပ်ကြီး ကျန်းဟီ တို့၏ မလက္ကာ ခရီးစဉ်အတွင်း ဒူးရင်းသီးနှင့် ပတ်သက်၍ မှတ်တမ်းတင်ထားသော ရှေးဟောင်းလက်ရေးမူများ၊ ဒူးရင်းစိုက်ခင်း ပုံတူငယ်များနှင့် အပြန်အလှန်ပြသကွက်များ ပါဝင်သည်။ ၎င်းတို့သည် မလေးရှားနိုင်ငံ၏ စိုက်ပျိုးရေးကဏ္ဍတွင် အဓိက ပို့ကုန်ဖြစ်လာသည့် Black Thorn နှင့် Musang King ကဲ့သို့သော ကမ္ဘာကျော် ဒူးရင်းသီးမျိုးစိတ်များ၏ သမိုင်းကြောင်းနှင့် စိုက်ပျိုးရေးတိုးတက်မှု ဖြစ်စဉ်များကို ခရီးသွားများအား ထင်ဟပ်စေမည် ဖြစ်သည်။
ယခုနှစ်အတွင်း ကွာလာလမ်ပူမြို့၌ Galeri PETRONAS၊ Merdeka Textile Museum နှင့် Muara Arts ကဲ့သို့သော အနုပညာပြတိုက်ကြီးများ ဖွင့်လှစ်ရန် ရှိနေသည့်အပြင်၊ ယခုကဲ့သို့ ဒူးရင်းသီးပြတိုက်တစ်ခု ပေါ်ပေါက်လာခြင်းသည် ထူးဆန်းသည့်အရာ မဟုတ်ဘဲ မလေးရှားနိုင်ငံ၏ ယဉ်ကျေးမှုနှင့် အမြဲတစေ ဆီလျော်စွာ ပေါင်းစပ်တည်ရှိနေသည့် သဘာဝတစ်ခုဖြစ်ကြောင်း သိရသည်။
Ref: သယ်စရိတ်တိုင်းမ်စ်