ဧရာဝတီ FC အမျိုးသမီးအသင်းက ကစားသမား မေထက်လူသည် ပညာရေးနှင့် ကွင်းပြင်ပလုပ်ငန်းတာဝန်များကြောင့် လာမည့် လိဂ်ပွဲစဉ် (၄)၊ (၅) နှင့် (၆) တို့တွင် အသင်းအတွက် ပါဝင်ကစားနိုင်မည် မဟုတ်ကြောင်း အသင်းက တရားဝင် ထုတ်ပြန်ကြေညာထားသည်။
အသင်း၏ ထုတ်ပြန်ချက်အရ မေထက်လူသည် လက်ရှိတွင် ပြည်ပ၌ ပညာသင်ကြားနေပြီး မြန်မာနိုင်ငံနှင့် ပညာသင်ကြားနေသည့် နိုင်ငံအကြား အချိန်ကွာဟမှုအပြင် အသင်းသို့မရောက်ရှိမီကတည်းက စီစဉ်ထားခဲ့သည့် လုပ်ငန်းတာဝန်များနှင့် တိုက်ဆိုင်နေခြင်းကြောင့် ယင်းပွဲစဉ်များတွင် အပြည့်အဝ အာရုံစိုက် ပါဝင်ယှဉ်ပြိုင်နိုင်ရန် အခက်အခဲများ ရှိနေကြောင်း ဆိုသည်။
ဧရာဝတီ FC အမျိုးသမီးအသင်း ကစားသမားများ၏ ကွင်းတွင်းစွမ်းဆောင်ရည်သာမက ရေရှည်ပညာရေးနှင့် ဘဝတိုးတက်ရေးကိုလည်း အစဉ်တစိုက် အားပေးပံ့ပိုးသည့် မူဝါဒအတိုင်း မေထက်လူ၏ ပညာရေးနှင့် လုပ်ငန်းတာဝန်များ အဆင်ပြေချောမွေ့စေရန် နားလည်ညှိနှိုင်းပေးခဲ့ကြောင်း ဖော်ပြထားသည်။
ထို့အပြင် မေထက်လူသည် ပညာရေးနှင့် လုပ်ငန်းကိစ္စများကို စနစ်တကျ ပြီးမြောက်သည့်အခါ ရာသီပိတ်လက်ကျန် အရေးကြီးပွဲစဉ်များတွင် အသင်းနှင့် ပြန်လည်ပူးပေါင်းကာ အစွမ်းကုန်ပါဝင်က စားသွားမည်ဖြစ်ကြောင်းလည်း အသင်းက အသိပေးထားသည်။
ဧရာဝတီ FC အမျိုးသမီးအသင်းအနေ ဖြင့် ကျန်ရှိသည့် ပွဲစဉ်များတွင်လည်း ပရိသတ်များအတွက် ရလဒ်ကောင်းများရရှိစေရန် အကောင်းဆုံးဆက်လက်ကြိုးပမ်းသွားမည်ဖြစ်ပြီး မေထက်လူ၏ ပညာရေးနှင့် လုပ်ငန်းကိစ္စများ အောင် မြင်ချောမွေ့စေရန်လည်း ဆုမွန်ကောင်းတောင်းထားသည်။
မေထက်လူကို ချစ်သည့် ပရိတ်သတ်များအကြားတွင်လည်း မေထက်လူပါဝင် မကစားနိုင်သည့်ပွဲစဥ်များအတွက် အားမလိုအားမရ ဖြစ်နေကြသော်လည်း သူမ၏ပညာရေးအတွက်အကောင်းဆုံးကျော်ဖြတ်နိုင်ပြီး အကြိတ်အနယ်ယှဉ်ပြိုင်ရမည့် ရာသီပိတ်ပွဲစဉ်များတွင်ပါဝင်ကစားစေလိုသည့် ဆန္ဒများရှိနေကြကြောင်း သိရသည်။
