ပဲခူးတိုင်းဒေသကြီးအတွင်း၌ လျာထားမိုးသီးနှံများ အပြည့်အဝစိုက်ပျိုးရန်နှင့် သဘာဝဘေး ကြိုတင်ကာကွယ်ရန် ဝန်ကြီးချုပ် ဦးမျိုးဆွေဝင်းက လမ်းညွှန်မှာကြားလိုက်သည်။
ပဲခူးတိုင်းဒေသကြီးအစိုးရအဖွဲ့ရုံး တော်ဝင်ဟံသာအစည်းအဝေးခန်းမ၌ ဇူလိုင်လ ၃ ရက်က ပြုလုပ်သည့် တိုင်းဒေသကြီးအဆင့် ဌာနဆိုင်ရာလုပ်ငန်းညှိနှိုင်းအစည်းအဝေးတွင် ဝန်ကြီးချုပ်က ထည့်သွင်းပြောကြားခဲ့ခြင်းဖြစ်သည်။
ဝန်ကြီးချုပ် ဦးမျိုးဆွေဝင်းက မိုးရာသီတွင် ဖြစ်ပေါ်တတ်သည့် သဘာဝဘေးအန္တရာယ်များကို ကြိုတင်ကာကွယ်ရန် လိုအပ်သလို၊ ရေကြီးရေလျှံမှုကြောင့် ထိခိုက်ပျက်စီးနိုင်သည့် စိုက်ပျိုးသီးနှံများအတွက်လည်း အချိန်မီ ပြန်လည်
ကုစားစိုက်ပျိုးနိုင်ရေး ကြိုတင်ပြင်ဆင်ထားရမည် ဖြစ်သည်ဟုလည်း ဆိုသည်။
ထို့အပြင် ဒေသအလိုက် စားရေရိက္ခာ ဖူလုံစေရန်အတွက် စိုက်ပျိုးရေရရှိရေးနှင့် မွေးမြူရေးလုပ်ငန်းများကိုပါ တိုးချဲ့ဆောင်ရွက်သွားရမည်ဖြစ်ကြောင်း ပြောကြားသည်။
အဆိုပါ အစည်းအဝေးတွင် နိုင်ငံတော်သမ္မတ၏ လမ်းညွှန်ချက်များကို ဖတ်ကြားရှင်းလင်းခဲ့ပြီး ဒေသတွင်း MSME လုပ်ငန်းများ ဖွံ့ဖြိုးတိုးတက်ရေးအတွက် မြို့နယ်အလိုက် သင်တန်းများဖွင့်လှစ်ပေးရန်၊ နည်းပညာနှင့် အရင်းအနှီးများ ပံ့ပိုးကူညီရန်နှင့် တင်ဒါလုပ်ငန်းများကို လုပ်ထုံးလုပ်နည်း၊ စံချိန်စံညွှန်းများနှင့်အညီ စနစ်တကျ ဆောင်ရွက်ရန်တို့ကိုလည်း ဝန်ကြီးချုပ်က တိုက်တွန်းခဲ့သည်။