ကျောက်ဆည်၊ မြစ်သားနှင့် ကူမဲမြို့တို့တွင် ဓာတ်အားခွဲရုံ ပြုပြင်ထိန်းသိမ်းရေးကြောင့် ယာယီဓာတ်အားပြတ်တောက်မည်

နိုင်ငံတော်ဓာတ်အားစနစ်၏ ဝန်အားမျှတတည်ငြိမ်စွာ ဓာတ်အားပို့လွှတ်ဖြန့်ဖြူးနိုင်ရေးအတွက် ၁၃၂ ကေဗွီ အင်းကုန်းပင်မဓာတ်အားခွဲရုံ၌ ပြုပြင်ထိန်းသိမ်းရေးလုပ်ငန်းများ ဆောင်ရွက်မည်ဖြစ်ရာ မန္တလေးတိုင်းဒေသကြီးအတွင်းရှိ ကျောက်ဆည်၊ မြစ်သားနှင့် ကူမဲမြို့တို့တွင် ယာယီဓာတ်အားပြတ်တောက်မည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနက ထုတ်ပြန်သည်။

လက်ရှိတွင် ၁၃၂ ကေဗွီ အင်းကုန်းပင်မဓာတ်အားခွဲရုံရှိ ၃၃ ကေဗွီ စက်မှုလိုင်း၏ ဓာတ်အားဖြတ်ခလုတ် (Circuit Breaker) (B-Phase) တွင် ဓာတ်ငွေ့ယိုစိမ့်မှု ဖြစ်ပေါ်နေသဖြင့် အရန်ပစ္စည်းများဖြင့် အစားထိုးလဲလှယ်နိုင်ရေးအတွက် အဆိုပါခွဲရုံရှိ ၃၃ ကေဗွီ Main Bus ကို ဇူလိုင် ၅ ရက် မွန်းလွဲ ၃ နာရီမှ ညနေ ၆ နာရီအထိ ယာယီဓာတ်အားပိတ်ကာ ပြုပြင်ထိန်းသိမ်းရေးလုပ်ငန်းများ ဆောင်ရွက်သွားမည်ဖြစ်ကြောင်း သိရသည်။

အဆိုပါလုပ်ငန်းများ ဆောင်ရွက်နေစဉ်အတွင်း ကျောက်ဆည်မြို့၊ မြစ်သားမြို့နှင့် ကူမဲမြို့တို့ရှိ ရပ်ကွက်များနှင့် ကျေးရွာများတွင် ယာယီဓာတ်အားပြတ်တောက်မည်ဖြစ်ပြီး၊ သက်ဆိုင်ရာ ဓာတ်အားသုံးစွဲသူများအား မြို့နယ်လျှပ်စစ်အင်ဂျင်နီယာရုံးများမှတစ်ဆင့် ကြိုတင်အသိပေးထားပြီးဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာနက အသိပေးထားသည်။