နိုင်ငံတော်အစီအစဉ်ဖြင့် ပေးပို့သည့် ကျောင်းသုံးစာအုပ်နှင့် စာရေးကိရိယာများ ပူတာအိုသို့ ထပ်မံရောက်ရှိ

ကချင်ပြည်နယ် ပူတာအိုခရိုင်အတွင်းရှိ အခြေခံပညာကျောင်းများအတွက် နိုင်ငံတော်အစီအစဉ်ဖြင့် ပေးပို့လာသည့် ကျောင်းသုံးဗလာစာအုပ်များ၊ ပြဋ္ဌာန်းစာအုပ်များနှင့် စာရေးကိရိယာများ တင်ဆောင်လာသော မော်တော်ယာဉ်သုံးစီးသည် ယမန်နေ့ ညနေပိုင်းတွင် ပူတာအိုမြို့သို့ ထပ်မံရောက်ရှိခဲ့ကြောင်း သိရသည်။

အဆိုပါ ကျောင်းသုံးပစ္စည်းများကို မြစ်ကြီးနား–ဆွမ်ပရာဘွမ်–ပူတာအို ပြည်ထောင်စုကားလမ်းမကြီးအတိုင်း သယ်ဆောင်ပို့ဆောင်လာခြင်းဖြစ်ပြီး၊ ရောက်ရှိလာသည့် ပစ္စည်းများအား သိုလှောင်ရုံတွင် စနစ်တကျ ထိန်းသိမ်းနိုင်ရေးအတွက် သက်ဆိုင်ရာဌာနဆိုင်ရာများက ပူးပေါင်းဆောင်ရွက်ခဲ့ကြသည်။

သိုလှောင်ရုံသို့ ရွှေ့ပြောင်းသယ်ယူရာတွင် အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့၊ ပညာရေးဌာနနှင့် သစ်တောဦးစီးဌာနတို့မှ ဝန်ထမ်းများ ပါဝင်ဆောင်ရွက်ခဲ့ကြသည်။

ထို့ပြင် ပစ္စည်းများ သိုလှောင်ရုံသို့ စနစ်တကျ ရောက်ရှိရေးနှင့် ထိန်းသိမ်းထားရှိရေး လုပ်ငန်းစဉ်များကို ခရိုင်နှင့် မြို့နယ် စီမံခန့်ခွဲရေးနှင့် အုပ်ချုပ်ရေးကော်မတီဥက္ကဋ္ဌများနှင့် အဖွဲ့ဝင်များက ကြီးကြပ်ဆောင်ရွက်ခဲ့ကြောင်း သိရသည်။