အာရှဘောလုံးအဖွဲ့ချုပ် (AFC) ၏ တရားဝင်ထုတ်ပြန်ချက်အရ လာမည့် ၂၀၂၆-၂၀၂၇ ရာသီ အာရှတိုက်အဆင့်ကလပ်ပြိုင်ပွဲတစ်ခုဖြစ်သည့် AFC Challenge League (ACGL) တွင် မြန်မာနိုင်ငံမှ ပြိုင်ပွဲဝင်ခွင့်နေရာ (၂) နေရာရရှိခဲ့ကြောင်း သိရသည်။
ဝင်ခွင့်သတ်မှတ်ချက်များအရ မြန်မာနိုင်ငံကိုယ်စားပြုအဖြစ် ပြီးခဲ့သည့်ရာသီ မြန်မာနေရှင်နယ်လိဂ်(MNL) ချန်ပီယံ ရှမ်းယူနိုက်တက်အသင်းနှင့် ဒုတိယရရှိခဲ့သော ရန်ကုန်ယူနိုက်တက်အသင်းတို့က ဝင်ရောက်ယှဉ်ပြိုင်ခွင့်ရရှိခဲ့ခြင်းဖြစ်ကြောင်း သိရသည်။
ထို့ပြင် ပြိုင်ပွဲပုံစံသတ်မှတ်ချက်များအရ မြန်မာလိဂ်ချန်ပီယံ ရှမ်းယူနိုက်တက်အသင်းသည် ACGL ပြိုင်ပွဲ ၏ အုပ်စုအဆင့်မှစတင်ကာ ဝင်ရောက်ယှဉ်ပြိုင်ခွင့်ရရှိခဲ့ပြီး ရန်ကုန်ယူနိုက်တက်အသင်းမှာမူ အုပ်စုအဆင့်တက်လှမ်းနိုင်ရန် ခြေစစ်ပွဲအဆင့်မှစတင်ယှဉ်ပြိုင်ရမည်ဖြစ်ကြောင်း သိရသည်။
အာရှဘောလုံးအဖွဲ့ချုပ် (AFC) သည် ၂၀၂၆-၂၀၂၇ ရာ သီအတွက် အာရှအဆင့်မြင့်ကလပ်ပြိုင်ပွဲများဖြစ်သော ACL Elite၊ ACL Two နှင့် ACGL ပြိုင်ပွဲများတွင် ပါဝင်ယှဉ်ပြိုင်ရန် သတ်မှတ်ချက်နှင့်ကိုက်ညီသည့် ကလပ်အသင်းစာရင်းများကို ပြီးခဲ့သည့် မေ ၃၁ ရက်က နောက်ဆုံးထားလက်ခံခဲ့ပြီးနောက် ဘောလုံးအဖွဲ့ချုပ်အသီးသီးကတင်သွင်းလာသည့် လိုင်စင်စံနှုန်းများနှင့် ကိုက်ညီသည့် ကလပ်အသင်းစာရင်းများကို အသေးစိတ်စိစစ်အတည်ပြုပြီး၍ မြန်မာကလပ် (၂) သင်း ပါဝင်ခွင့်ရရှိခြင်းကို အတည်ပြုထုတ်ပြန်ခဲ့ခြင်းဖြစ်ကြောင်း သိရသည်။
အာရှအဆင့်ပြိုင်ပွဲကြီးတွင်အားပြိုင်ရမည့် မြန်မာ့ထိပ်သီးကလပ်နှစ်သင်း၏ ပွဲစဉ်အသေးစိတ်နှင့် အုပ်စုမဲခွဲပွဲရက်များကို AFC က ဆက်လက်ထုတ်ပြန်သွားမည်ဖြစ် ကြောင်း သိရသည်။