ဗြိတိန်နိုင်ငံခြားရေးဝန်ကြီး တရုတ်နှင့် အိန္ဒိယ သွားမည်

ဗြိတိန်နိုင်ငံခြားရေးဝန်ကြီး ယက်တီကူးပါးသည် ဇွန်လ ၁ ရက်နေ့တွင် တရုတ်နိုင်ငံကို သွားရောက်မည်ဖြစ်ပြီး ထို့နောက် သီတင်းပတ်နှောင်းပိုင်းတွင် အိန္ဒိယနိုင်ငံကို ဆက်လက်သွားရောက်မည်ဖြစ်ကာ ဟော်မုဇ်ရေလက်ကြားနှင့် ရုရှား-ယူကရိန်းစစ်ပွဲမှသည် အီဘိုလာရောဂါဖြစ်ပွားမှုအထိပါဝင်သော ကမ္ဘာ့အရေးများကို အဓိကဆွေးနွေးမည့် ခရီးစဉ်ဖြစ်သည်။
        
မစ္စစ်ကူးပါးသည် ဇွန်လ ၂ ရက်နေ့တွင် တရုတ်နိုင်ငံခြားရေးဝန်ကြီး ဝမ်ယိ၊ ဒုတိယသမ္မတ ဟန်ကျန်းတို့နှင့် တွေ့ဆုံမည်ဖြစ်ပြီး နောက်တစ်ရက်အကြာတွင် သိပ္ပံနှင့် နည်းပညာကို အဓိကထားသော အစီအစဉ်တစ်ခုအတွက် တောင်ပိုင်းနည်းပညာအချက်အချာ ရှန်ကျန်းသို့ သွားရောက်မည်ဖြစ်ကြောင်း အစိုးရက ပြောကြားခဲ့သည်။
        
ပထဝီနိုင်ငံရေးတင်းမာမှုများ မြင့်တက်လာချိန်၊ အမေရိက-အစ္စရေးနှင့် အီရန်စစ်ပွဲကြောင့် ရေနံဈေးနှုန်းများ မြင့်တက်နေချိန်နှင့် ဗြိတိန်နိုင်ငံ၏ စီးပွားရေးတိုးတက်မှု နှေးကွေးနေချိန်တွင် ကမ္ဘာ့ဒုတိယနှင့် ဆဋ္ဌမစီးပွားရေးအင်အားကြီးနိုင်ငံများဖြစ်သော တရုတ်နှင့် အိန္ဒိယသို့ မစ္စကူးပါး၏ ခရီးစဉ်ပေါ်ပေါက်လာခြင်းဖြစ်သည်။
       
သူသည် ဇွန်လ ၄ ရက်နေ့တွင် အိန္ဒိယသို့ ရောက်ရှိမည်ဟု မျှော်လင့်ရပြီး နိုင်ငံခြားရေးဝန်ကြီး အက်စ် ဂျေးရှန်ကာအပြင် UK-India Vision 2035 အစီအစဉ်တွင် ပါဝင်ဆောင်ရွက်နေသော စွန့်ဦးတီထွင်သူများ၊ ပညာရှင်များ၊ အစိုးရမိတ်ဖက်များနှင့် တွေ့ဆုံရန် စီစဉ်ထားသည်။
         
နှစ်နိုင်ငံကုန်သွယ်မှုကို မြှင့်တင်ရန်နှင့် ကဏ္ဍအသီးသီးတွင် ဈေးကွက်ဝင်ရောက်ခွင့် တိုးတက်စေရန် ရည်ရွယ်၍ နှစ်နိုင်ငံသည် ၂၀၂၅ ခုနှစ်တွင် လွတ်လပ်သော ကုန်သွယ်ရေးသဘောတူညီချက်တစ်ရပ်ကို လက်မှတ်ရေးထိုးခဲ့သည်။
       
သို့သော် လန်ဒန်၏ သံမဏိတင်သွင်းမှုအပေါ် ကန့်သတ်ချက်အသစ်များကြောင့် ထိုသဘောတူညီချက်အကောင်အထည်ဖော်မှုသည် အဟန့်အတားနှင့် ရင်ဆိုင်ခဲ့ရကြောင်း အိန္ဒိယကုန်သွယ်ရေးဝန်ကြီး ရာဂျက်ရှ် အဂရာဝေါလ်က ဧပြီလအတွင်း ပြောကြားခဲ့သည်။
         
မစ္စစ်ကူးပါး၏ ဤအင်အားကြီးနှစ်နိုင်ငံနှင့် ထိတွေ့ဆက်ဆံမှုများသည် အရေးကြီးဆုံး ကမ္ဘာလုံးဆိုင်ရာ စိန်ခေါ်မှုများကို ကိုင်တွယ်ဖြေရှင်းရေးကို အာရုံစိုက်ရန် မျှော်လင့်ရကြောင်း ဗြိတိန်အစိုးရက ပြောကြားခဲ့သည်။

Ref: သယ်စထရိတ်တိုင်းမ်စ်