မြန်မာ့ပညာရေး ဖွံ့ဖြိုးတိုးတက်ရေး အစွမ်းကုန်ကူညီပံ့ပိုးပေးသွားလိုကြောင်း မြန်မာနိုင်ငံဆိုင်ရာ တရုတ်သံအမတ်ကြီး Ms. Ma Jia က မေလ ၂၉ ရက်က နေပြည်တော်တွင် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာချောချောစိန်နှင့် တွေ့ဆုံစဥ် ပြောကြားခဲ့သည်။
အဆိုပါတွေ့ဆုံပွဲသို့ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်နှင့် မြန်မာနိုင်ငံဆိုင်ရာ တရုတ်သံရုံးမှ သံမှူး Mr. Li Qianguo တို့လည်း တက်ရောက်ခဲ့ကြသည်။
တွေ့ဆုံစဉ် သံအမတ်ကြီး Ms. Ma Jia က ပညာရေးသည် နိုင်ငံတည်ဆောက်ရေး၏ အခြေခံအုတ်မြစ်ဖြစ်ကြောင်း ပြောကြားခဲ့ပြီး နှစ်နိုင်ငံအစိုးရများအနေဖြင့် ပညာရေးကဏ္ဍ ဖွံ့ဖြိုးတိုးတက်ရေးကို အထူးအလေးထားဆောင်ရွက်လျက်ရှိကြောင်း ဆိုသည်။
ထို့ပြင် တရုတ်နိုင်ငံအနေဖြင့် ပညာရေးကဏ္ဍတွင် နှစ်နိုင်ငံအကြား နှီးနှောဖလှယ်မှုနှင့် ပူးပေါင်းဆောင်ရွက်မှုများကို ဆက်လက်မြှင့်တင်သွားမည်ဖြစ်ပြီး မြန်မာ့ပညာရေး ဖွံ့ဖြိုးတိုးတက်ရေးအတွက်လည်း အစွမ်းကုန် ကူညီပံ့ပိုးပေးသွားလိုကြောင်း ပြောကြားခဲ့သည်။
ပြည်ထောင်စုဝန်ကြီး ဒေါက်တာချောချောစိန်ကလည်း မြန်မာ့ပညာရေးကဏ္ဍအပေါ် တရုတ်နိုင်ငံမှ ကာလရှည်ကြာစွာ ဂရုတစိုက် ကူညီပံ့ပိုးပေးခဲ့မှုများအတွက် ကျေးဇူးတင်ရှိကြောင်း ပြောကြားခဲ့သည်။
ထို့အပြင် ဆရာ၊ ဆရာမများ လေ့ကျင့်ပျိုးထောင်ရေး၊ ပညာရပ်ဆိုင်ရာ သုတေသနလုပ်ငန်းများနှင့် စာအုပ်စာတမ်း ပြုစုရေးကဏ္ဍများတွင် ပူးပေါင်းဆောင်ရွက်မှုများ ပိုမိုတိုးမြှင့်နိုင်ရန် မျှော်လင့်ကြောင်းလည်း ထည့်သွင်းပြောကြားခဲ့သည်။