မြန်မာ့စိန်တလုံးသရက်သီးများကို တရုတ်နိုင်ငံဈေးကွက်သို့ တင်ပို့နိုင်မှု အောင်မြင်လာသည့်အတွက် ပြည်တွင်းဈေးကွက်အတွင်း သရက်သီးဈေးနှုန်းများ အနည်းငယ်မြင့်တက်လာကြောင်း သရက်စိုက်ပျိုးထုတ်လုပ်ရောင်းချသူများထံမှ သိရသည်။
စိန်တလုံးသရက်သီးများ စတင်ပေါ်ထွက်ချိန်တွင် ဈေးနှုန်းမရရှိသဖြင့် စိုက်တောင်သူများအနေဖြင့် ဈေးလျှော့ရောင်းချမှုများ ပြုလုပ်ခဲ့ရသော်လည်း၊ တရုတ်နိုင်ငံသို့ တင်ပို့ခွင့်ရရှိလာပြီးနောက် ဈေးကွက်အခြေအနေ ပြန်လည်ကောင်းမွန်လာကြောင်း သိရသည်။
“အစပိုင်းမှာ ဈေးမရလို့ ဈေးပြိုင်လျှော့ရောင်းခဲ့ရတယ်။ အခု တရုတ်ဘက်ကို တင်ပို့နိုင်တော့ ဈေးနည်းနည်းပြန်တက်လာတယ်။ ပေါ်ဦးပေါ်ဖျားမှာ ဈေးမကောင်းခဲ့ပေမယ့် နောက်ပိုင်းမှာတော့ ဈေးကောင်းရလာနိုင်တယ်” ဟု မန္တလေးတိုင်းဒေသကြီး ကျောက်ဆည်ခရိုင် စဥ့်ကိုင်မြို့နယ်မှ စိန်တလုံးသရက်စိုက်တောင်သူတစ်ဦးက ပြောသည်။
လက်ရှိတွင် မြန်မာ့စိန်တလုံးသရက်သီး တန်ချိန် ၈၀ ကျော်ကို တရုတ်နိုင်ငံရှိ ကူမင်း၊ ချန်ဒူနှင့် ချုံချင့်မြို့များရှိ သစ်သီးဈေးကွက်များသို့ တင်ပို့နိုင်ခဲ့ကြောင်း သိရသည်။
အဆိုပါ သရက်သီးများကို တရုတ်-မြန်မာနယ်စပ်ရှိ ချင်းရွှေဟော်ဂိတ်နှင့် ဝမ်တိန်ဂိတ်တို့မှတစ်ဆင့် ပြီးခဲ့သည့် မေလ ၉ ရက်နှင့် ၁၀ ရက်တို့တွင် တရားဝင်တင်ပို့ခဲ့ခြင်းဖြစ်ကြောင်း သိရသည်။
ထို့ပြင် လက်ကျန်သရက်သီးများအနက် အရည်အသွေးကောင်းမွန်သည့် အသီးများကို ဆက်လက်ရွေးချယ်ကာ တရုတ်ဈေးကွက်သို့ ထပ်မံတင်ပို့နိုင်ရေး စီစဉ်နေကြောင်း စိုက်တောင်သူများနှင့် သရက်လုပ်ငန်းရှင်များက ပြောဆိုထားသည်။