ရန်ကုန်၊ မေ ၁၉
ကပ္ပလီပင်လယ်ပြင်နှင့် ဘင်္ဂလားပင်လယ်အော် အရှေ့တောင်ပိုင်းတို့တွင် မုတ်သုံလေ အားကောင်းနေခြင်းကြောင့် ယနေ့ (မေလ ၁၉ ရက်) ညနေပိုင်းအထိ ရန်ကုန်တိုင်းဒေသကြီးအပါအဝင် တိုင်းနှင့် ပြည်နယ်အချို့တွင် မိုးထစ်ချုန်းရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာန (မိုးဇလ) မှ သိရသည်။
မိုးရွာသွန်းနိုင်မှု အခြေအနေ
နေရာအနှံ့အပြား
တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်။
နေရာကျဲကျဲ
ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ကယားပြည်နယ်၊ ချင်းပြည်နယ်နှင့် ရှမ်းပြည်နယ် (တောင်ပိုင်း)။
နေရာကွက်ကျား
ကျန်တိုင်းဒေသကြီးနှင့် ပြည်နယ်များတွင် မိုးထစ်ချုန်းရွာသွန်းနိုင်ကြောင်း ခန့်မှန်းထားသည်။
မိုးတိမ်တောင် သတိပေးချက် လက်ရှိတွင် တနင်္သာရီတိုင်း၊ ကချင်ပြည်နယ်နှင့် ရခိုင်ပြည်နယ်တို့တွင် မိုးတိမ်တောင်များ ဖြစ်ထွန်းလျက်ရှိပြီး၊ ယင်းမိုးတိမ်တောင်များ ရွေ့လျားရာ လမ်းကြောင်းတစ်လျှောက်တွင် လေပြင်းတိုက်ခတ်ခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်း စသည့် မိုးလေဝသဖြစ်စဉ်များ ပြင်းထန်စွာ ဖြစ်ပေါ်နိုင်သဖြင့် ဒေသခံပြည်သူများအနေဖြင့် ကြိုတင်သတိပြုကြရန် မိုးဇလက အသိပေးနှိုးဆော်ထားသည်။
ပင်လယ်ပြင်အခြေအနေ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီ ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်းများ ကျရောက်နိုင်ပြီး လှိုင်းအမြင့် (၇) ပေမှ (၉) ပေခန့်အထိ ရှိနိုင်ကာ လှိုင်းအသင့်အတင့်မှ လှိုင်းကြီးနိုင်ကြောင်း သိရသဖြင့် ရေလုပ်ငန်းလုပ်ကိုင်သူများနှင့် သင်္ဘောလိုင်းများအနေဖြင့်လည်း အထူးသတိပြု သွားလာကြရန် သတင်းရရှိသည်။