ပူတင်နှင့် ရှီ မတွေ့ဆုံမီလေးတွင် ယူကရိန်းကမ်းလွန်၌ တရုတ်သင်္ဘောတစ်စင်းကို ရုရှားဒရုန်း ထိမှန်

ရုရှားသမ္မတ ဗလာဒီမာပူတင်သည် တရုတ်နိုင်ငံသမ္မတ ရှီကျင့်ဖိန်နှင့် တွေ့ဆုံရန် ပေကျင်းသို့ မသွားရောက်မီ တစ်ရက်အလိုတွင် ရုရှားဒရုန်းများသည် ယူကရိန်းနိုင်ငံ အိုဒက်ဆာ ဒေသရှိ ဆိပ်ကမ်းများသို့ ဦးတည်မောင်းနှင်နေသည့် ပင်လယ်နက်အတွင်းရှိ တရုတ်ပိုင် ကုန်တင်သင်္ဘောတစ်စင်းအပါအဝင် သင်္ဘောနှစ်စင်းကို တိုက်ခိုက်ခဲ့သည်။

ဆိပ်ကမ်းဒေသသို့ ဦးတည်မောင်းနှင်နေသည့် မာရှယ်ကျွန်းစု(Marshall Islands) အလံစိုက်ထူထားသော သင်္ဘောတစ်စင်းနှင့် ဂီနီဘစ်ဆော(Guinea-Bissau) အလံစိုက်ထူထားသော အခြားသင်္ဘောတစ်စင်း စသည့် အရပ်ဘက်သုံးသင်္ဘောနှစ်စင်း ယနေ့တွင် တိုက်ခိုက်ခံခဲ့ရကြောင်း ယူကရိန်းဆိပ်ကမ်းအာဏာပိုင်အဖွဲ့က ပြောကြားခဲ့သည်။

ယူကရိန်းရေတပ်၏ ထုတ်ပြန်ချက်အရ မာရှယ်ကျွန်းစုအလံစိုက်ထူထားပြီး တရုတ်အမှုထမ်းများ လိုက်ပါလာသည့် တရုတ်ပိုင်ကုန်တင်သင်္ဘော “KSL Deyang” တိုက်ခိုက်ခံခဲ့ရကြောင်း သိရသည်။ ရေတပ်သည် အဆိုပါသင်္ဘော၏အမည်နှင့် ဘေးတစ်ဖက်တစ်ချက်တွင် မီးလောင်ကျွမ်းထားသည့် ဒဏ်ရာများပါရှိသော ဓာတ်ပုံတစ်ပုံကိုလည်း လူမှုကွန်ရက်ပေါ်တွင် တင်ခဲ့သည်။

ရုရှားသည် ယူကရိန်း၏ စိုက်ပျိုးရေးထွက်ကုန်များ တင်ပို့ရာ အဓိကရေကြောင်းအချက်အချာကျသည့် အိုဒက်ဆာဆိပ်ကမ်းဧရိယာရှိ အရပ်ဘက်သုံးသင်္ဘောများကို ပုံမှန်တိုက်ခိုက်လေ့ရှိသည်။ ယနေ့တွင် ဖြစ်ပွားခဲ့သော အဆိုပါတိုက်ခိုက်မှုသည် ပူတင်က တရုတ်သမ္မတ ရှီကျင့်ဖိန်နှင့် ဆွေးနွေးပွဲများ ပြုလုပ်မည့် ပေကျင်းသို့ နှစ်ရက်ကြာ ခရီးစဉ်မစတင်မီလေးတွင် ဖြစ်ပွားခဲ့ခြင်းဖြစ်သည်။

“ဒရုန်းတွေက အိုဒက်ဆာကို တိုက်ခိုက်ခဲ့ပြီး မောင်းသူမဲ့လေယာဉ် ဒရုန်းတစ်စင်းဟာ တရုတ်ပိုင်သင်္ဘောတစ်စင်းကို ထိမှန်ခဲ့ပါတယ်” ဟု ယူကရိန်းသမ္မတ ဇလန်းစကီးက လူမှုကွန်ရက်စာမျက်နှာပေါ်တွင် ရေးသားခဲ့သည်။ “ရုရှားတွေအနေနဲ့ ပင်လယ်ထဲမှာ ဘယ်သင်္ဘောရှိနေလဲဆိုတာ မသိဘဲ မနေပါဘူး။”ဟုလည်း သူကဆိုသည်။

တရုတ်နိုင်ငံသားများဖြစ်ကြသည့် သင်္ဘောအမှုထမ်းများအနက် မည်သူမျှ ထိခိုက်ဒဏ်ရာရရှိခြင်းမရှိကြောင်းနှင့် တရုတ်ပိုင်သင်္ဘောသည်လည်း ၎င်း၏ခရီးစဉ်ကို ဆက်လက်မောင်းနှင်ခဲ့ကြောင်း ယူကရိန်းရေတပ်ပြောရေးဆိုခွင့်ရှိသူတစ်ဦးက AFP သတင်းဌာနသို့ ပြောကြားခဲ့သည်။ ထို့အပြင် “Deyang” သင်္ဘောသည် အိုဒက်ဆာဒေသရှိ ယူကရိန်း၏ ပစ်ဗ်ဒန်းနီး (Pivdennyi) ဆိပ်ကမ်းတွင် သံရိုင်းအမှုန့်များ သွားရောက်တင်ဆောင်ရန် မောင်းနှင်နေခြင်းဖြစ်သောကြောင့် တိုက်ခိုက်ခံရချိန်တွင် ကုန်စည် တင်ဆောင်ထားခြင်းမရှိကြောင်း သတင်းရင်းမြစ်တစ်ခုက Reuters သတင်းဌာနသို့ ပြောကြားခဲ့သည်။

“သင်္ဘောက ကုန်တင်ဖို့အတွက် ဆိပ်ကမ်းကို ဝင်ရောက်လာတာပါ။ ညဘက်မှာ ရှာဟစ်(Shahed) ဒရုန်းနဲ့ သင်္ဘောအောက်ပိုင်း ထိမှန်ခံရပြီးနောက် အမှုထမ်းတွေက နောက်ဆက်တွဲအခြေအနေတွေကို သူတို့ဘာသာသူတို့ ဖြေရှင်းနိုင်ခဲ့ကြပါတယ်။ ကံကောင်းထောက်မစွာနဲ့ ဘယ်သူမှ ဒဏ်ရာမရရှိခဲ့ဘဲ သင်္ဘောကလည်း သူ့ရဲ့ဦးတည်ရာဆိပ်ကမ်းကို ဆက်လက်ထွက်ခွာသွားခဲ့ပါတယ်” ဟု ယူကရိန်းရေတပ် ပြောရေးဆိုခွင့်ရှိသူ ဒီမစ်ထရို ပလက်တင်ချုပ်(Dmytro Pletenchuk) က ပြောကြားခဲ့သည်။

ရုရှားတပ်ဖွဲ့များသည် ယူကရိန်းပိုင်နက်ကို ဒရုန်း ၅၂၄ စင်း၊ ဘာလစ်စတစ်နှင့် ခရုဇ်ဒုံးကျည်များအပါအဝင် ဒုံးကျည် ၂၂ စင်းတို့ဖြင့် ညကတိုက်ခိုက်ခဲ့ကြောင်း ဇလန်းစကီးက ပြောကြားခဲ့သည်။

တရုတ်နိုင်ငံသည် ယူကရိန်းစစ်ပွဲကို အဆုံးသတ်ရေး ဆွေးနွေးပွဲများ ပြုလုပ်ရန် ပုံမှန်တောင်းဆိုလေ့ရှိသည်။