ပညာရေးဝန်ကြီးဌာန အဆင့်မြင့်ပညာဦးစီးဌာနလက်အောက်ရှိ ရန်ကုန်စီးပွားရေးတက္ကသိုလ်တွင် ၂၀၂၆-၂၀၂၇ ပညာသင်နှစ်အတွက် ပါရဂူဘွဲ့ (PhD) သင်တန်းသားများကို ဘောဂဗေဒ၊ ဝါဏိဇ္ဇဗေဒနှင့် စာရင်းအင်းပညာ အထူးပြုဘာသာရပ်များဖြင့် ခေါ်ယူလျက်ရှိကြောင်း သိရသည်။
ပါရဂူဘွဲ့သင်တန်း လျှောက်ထားသူများသည် မြန်မာနိုင်ငံသားဖြစ်ရမည်ဖြစ်ပြီး ၂၀၂၆ ခုနှစ် ဇွန်လ ၁ ရက်နေ့တွင် အသက် ၄၅ နှစ်ထက် မကျော်လွန်သူဖြစ်ရမည်ဟု ကြေညာချက်တွင် ဖော်ပြထားသည်။
ထို့ပြင် ပါရဂူအကြိုသင်တန်းကို အချိန်ပြည့် တစ်နှစ်တက်ရောက်နိုင်သူ ဖြစ်ရမည်ဖြစ်ကြောင်း သိရသည်။
လျှောက်ထားသူများအနေဖြင့် အသိအမှတ်ပြုတက္ကသိုလ်တစ်ခုခုမှ သက်ဆိုင်ရာဘာသာရပ်နယ်ပယ်၌ အနည်းဆုံး မဟာဘွဲ့ရရှိထားရမည်ဖြစ်ပြီး သတ်မှတ်ထားသည့် ဘာသာရပ်ဆိုင်ရာနှင့် အင်္ဂလိပ်စာ ဝင်ခွင့်စာမေးပွဲများကို ဖြေဆိုအောင်မြင်ရမည်ဖြစ်သည်။
မဟာသုတေသနဘွဲ့ရရှိထားသူများမှာ ဝင်ခွင့်စာမေးပွဲ ဖြေဆိုရန်မလိုဘဲ လူတွေ့စစ်ဆေးမှုသာ ဖြေဆိုရမည်ဖြစ်ကြောင်း သိရသည်။
လျှောက်လွှာများကို ရန်ကုန်စီးပွားရေးတက္ကသိုလ် ကျောင်းသားရေးရာဌာနတွင် သတ်မှတ်ထားသည့် ပုံစံဖြင့် ၂၀၂၆ ခုနှစ် မေ ၁၉ ရက် နောက်ဆုံးထား လျှောက်ထားရမည်ဖြစ်သည်။
ဝင်ခွင့်စာမေးပွဲကို မေ ၂၁ ရက်တွင် သက်ဆိုင်ရာဘာသာရပ်နှင့် မေ ၂၂ ရက်တွင် အင်္ဂလိပ်စာဘာသာရပ်တို့အား နံနက် ၉ နာရီမှ မွန်းတည့် ၁၂ နာရီအထိ ကျင်းပမည်ဖြစ်ကြောင်း သိရသည်။
ရေးဖြေစာမေးပွဲအောင်မြင်သူများနှင့် မဟာသုတေသနဘွဲ့ရရှိထားသူများကို မေ ၂၈ ရက်တွင် လူတွေ့စစ်ဆေးသွားမည်ဖြစ်သည်။
အသေးစိတ်အချက်အလက်များကို သက်ဆိုင်ရာဘာသာရပ် ပါမောက္ခ/ဌာနမှူးများထံနှင့် မော်ကွန်းထိန်း (ကျောင်းသားရေးရာ) ဖုန်းနံပါတ် ၀၁-၇၅၂၆၆၁၃ နှင့် ၀၉-၂၅၀၁၈၆၈၂၉ တို့သို့ ဆက်သွယ်စုံစမ်းနိုင်ကြောင်း ထုတ်ပြန်ထားသည်။