ဝါရှင်တန်က မူကြမ်းရေးဆွဲခဲ့သော ငြိမ်းချမ်းရေးအဆိုပြုချက်ကို တေရန်နှင့် ဝါရှင်တို့ သဘောမတူကြသဖြင့် တနင်္လာနေ့တွင် ရေနံဈေးနှုန်းများသည် တစ်စည်လျှင် ၃ ဒေါ်လာမြင့်တက်ခဲ့ပြီး ဟော်မုဇ်ရေလက်ကြားသည် လည်းနေရာအများစု၌ ပိတ်ထားဆဲဖြစ်ကာ ကမ္ဘာ့စွမ်းအင်ထောက်ပံ့မှုများကို အကျပ်အတည်း ဖြစ်စေခဲ့သည်။
ဘရန့်ရေနံစိမ်းဈေးသည် ထိုင်းစံတော်ချိန် နံနက် ၆း၃၆ နာရီတွင် တစ်စည်လျှင် ဒေါ်လာ ၃ ဒဿမ ၁၈ သို့မဟုတ် ၃ ဒဿမ ၄ ရာခိုင်နှုန်းမြင့်တက်ခဲ့ကာ တစ်စည် ၁၀၄ ဒဿမ ၄၇ ဒေါ်လာဖြစ်လာခဲ့ပြီး သောကြာနေ့က မြင့်တက်ခဲ့သော ၁ ဒဿမ ၂၃ ရာခိုင်နှုန်းထက် ပိုတက်သွားခဲ့သည်။
အမေရိက အနောက်တက္ကဆပ်စ်၌ အလယ်အလတ်ရေနံဈေးနှုန်းသည် ယခင်ဖြစ်ရပ်တွင် ၀ ဒဿမ ၆၄ ရာခိုင်နှုန်းမြင့်တက်ပြီးနောက် တစ်စည်လျှင် ၃ ဒဿမ ၀၉ ဒေါ်လာ သို့မဟုတ် ၃ ဒဿမ ၂၄ ရာခိုင်နှုန်း မြင့်တက်ခဲ့ပြီး တစ်စည်လျှင် ၉၈ ဒဿမ ၅၁ ဒေါ်လာရှိလာသည်။
ငြိမ်းချမ်းရေးဆွေးနွေးပွဲအတွက် အမေရိက၏ အဆိုပြုချက်အပေါ် အီရန်၏ တုန့်ပြန်မှုသည် “လက်ခံနိုင်ဖွယ်ရာမရှိ” ဟု တနင်္ဂနွေနေ့တွင် သမ္မတဒေါ်နယ်ထရမ့်ပ်က ပယ်ချခဲ့သောကြောင့် ရက်သတ္တပတ် ၁၀ ပတ်ကြာလာသော အမေရိက-အီရန် ပဋိပက္ခ အဆုံးသတ်ပြီး ဟော်မုဇ်ရေလက်ကြားမှတဆင့် ရေနံများဖြတ်သန်းခွင့်ပြုမည့် မျှော်လင့်ချက်များ ပျက်ပြယ်ခဲ့ရပြီဖြစ်သည်။
ထရမ့်ပ်သည် ဗုဒ္ဓဟူးနေ့တွင် ပေကျင်းသို့ ရောက်ရှိရန် စီစဉ်ထားပြီး တရုတ်သမ္မတ ရှီကျင့်ဖျင်နှင့် ဆွေးနွေးမည့်အကြောင်းရာများတွင် အီရန်အရေးလည်း ပါဝင်ရန် မျှော်လင့်ရကြောင်း အမေရိကန်အရာရှိများက ပြောကြားခဲ့သည်။
“ဈေးကွက်အာရုံစိုက်မှုက ဒီတစ်ပတ်မှာ သမ္မတထရမ့်ပ်ရဲ့ တရုတ်နိုင်ငံခရီးစဉ်ဆီကို တည့်တည့်ရွေ့လျားနေပါတယ်” ဟု အိုင်ဂျီ ဈေးကွက်လေ့လာသုံးသပ်သူ တိုနီ ဆိုင်ကာမိုးက မှတ်ချက်ပြုပြောကြားခဲ့သည်။
“ပြည့်စုံတဲ့ အပ-စ်အခတ်ရပ်စဲရေးနဲ့ ဟော်မုဇ်ရေလက်ကြားမှာ လက်ရှိဖြစ်ပွားနေတဲ့ အနှောင့်အယှက်တွေအတွက် ဖြေရှင်းချက်တစ်ခုရရှိရေးအတွက် အီရန်အပေါ် ပေကျင်းရဲ့ သြဇာလွှမ်းမိုးမှုကို အသုံးချပေးဖို့ ပေကျင်းကို သူဆွဲဆောင်နိုင်မယ်လို့ မျှော်လင့်ပါတယ်” ဟု သူကဆိုသည်။
ကမ္ဘာကြီးသည် ပြီးခဲ့သည့်နှစ်လအတွင်း ရေနံစည် ၁ ဘီလျံခန့် ဆုံးရှုံးခဲ့ရပြီး ရေနံစီးဆင်းမှုများ ပြန်လည်စတင်နိုင်သည့်တိုင် စွမ်းအင်ဈေးကွက်များ တည်ငြိမ်စေရန်ကို အချိန်ယူရလိမ့်မည်ဟု Saudi Aramco ၏ စီအီးအို အမ်မင်နက်ဆာက တနင်္ဂနွေနေ့တွင် ပြောကြားခဲ့သည်။
Ref: ဘန်ကောက်ပို့စ်