ဆော်ဒီအာရေဗျနိုင်ငံမှ အိမ်ရှင်အဖြစ်လက်ခံကျင်းပလျက်ရှိသည့် အာရှဖလား ယူ-၁၇ နောက်ဆုံးအဆင့်ပွဲစဉ်များတွင် မြန်မာ့လက်ရွေးစင် အမျိုးသား ယူ-၁၇ အသင်းသည် နှစ်ပွဲဆက်အရှုံးရလဒ်ထွက်ပေါ်ခဲ့ရသည်။
မြန်မာ့လက်ရွေးစင် အမျိုးသား ယူ-၁၇ အသင်းသည် အုပ်စု (A) တွင် အိမ်ရှင်ဆော်ဒီအာရေဗျ ယူ-၁၇၊ တာဂျီကစ္စတန် ယူ-၁၇၊ ထိုင်း ယူ-၁၇ အသင်းတို့နှင့် တစ်အုပ် စုတည်းကျရောက်ခဲ့ကာ မေ ၅ ရက်ကယှဥ်ပြိုင်ခဲ့သည့် အိမ်ရှင်ဆော်ဒီအာရေဗျ ယူ-၁၇ အသင်းအား ၄ ဂိုး ဂိုးမရှိရလဒ်ဖြင့်ရှုံးနိမ့်ခဲ့ရသည်။
ထို့ပြင် မေ ၉ ရက်ကယှဥ်ပြိုင်ခဲ့သည့် တာဂျီကစ္စတန် ယူ-၁၇ အသင်းကိုလည်း ၁ ဂိုး ဂိုးမရှိရလဒ်ဖြင့် ထပ်မံရှုံးနိမ့်ခဲ့ရကာ အုပ်စုတွင်း၌ပင်လှည့်ပြန်ရမည့်အခြေအနေရှိနေပြီး လာမည့် မေ ၁၂ ရက်တွင် ထိုင်း ယူ-၁၇ အသင်းနှင့် ထပ်မံယှဥ်ပြိုင်ကစားရမည်ဖြစ်သည်။ မြန်မာ့လက်ရွေးစင် အမျိုးသား ယူ-၁၇ အသင်းမှာ ယှဥ်ပြိုင်ခဲ့သည့် ပွဲစဥ် (၂) ခုလုံး၌ ဂိုးသွင်းယူနိုင်ခြင်းမရှိသေးပေ။
မြန်မာ့လက်ရွေးစင် အမျိုးသား ယူ-၁၇ အသင်း၌ ဂိုး- ထက်ဝေယံ၊ လင်းလတ်ထွန်း၊ ရှင်းသန့်ထူး။ နောက် တန်း-အောင်သီဟ၊ မျိုးခန့်ကျော်၊ မြင့်မြတ်ကိုကို၊ ဝင်းဇော်၊ ပိုင်စိုးကျော်၊ အောင်ဆက်ပိုင်၊ ဖုန်းခန့်အောင်၊ မြတ်မင်းသူ။ အလယ်တန်း-ကောင်းခန့်၊ ဝင်းမင်းသန့်၊ ဟန်ထူးလွင်၊ အံ့ထူးပိုင်၊ ချန်လန်းတိန်း၊ အောင်မြတ်သာ၊ စိုင်းမြတ်မင်း၊ လင်းရောင်၊ နေမျိုးသူ၊ အောင်ကောင်းမြတ်။ ရှေ့တန်း-ညီညီသန့်၊ ဒီဝေယံတို့ဝင်ရောက်ယှဥ်ပြိုင်ကစားလျက်ရှိသည်။