အာဂျင်တီးနားနှင့် ကိတ်ဗာဒီအကြား သွားလာနေသော အပျော်စီးသင်္ဘောတစ်စီးပေါ်တွင် အသက်ေ-သဆုံးနိုင်ပြီး ကူးစက်တတ်သော ဟန်တာဗိုင်းရပ်စ် ကူးစက်မှုများနှင့် ပတ်သက်၍ ကမ္ဘာ့ကျန်းမာရေးအဖွဲ့(ဒဗ္ဗလျူအိတ်ခ်ျအို) က သတိပေးချက်ထုတ်ပြန်ပြီးနောက် ထိုင်းနိုင်ငံရှိ နိုင်ငံတကာ ကူးစက်ရောဂါစစ်ဆေးရေးဂိတ်များတွင် စောင့်ကြည့်ရေးအစီအမံများကို ပိုမိုတင်းကျပ်ခဲ့သည်။
ထိုင်းနိုင်ငံတွင် ကူးစက်မှုတစ်စုံတရာ မတွေ့ရှိရသေးကြောင်းကို အလေးပေးပြောကြားသော်လည်း ခရီးသွားများကို စေ့စေ့စပ်စပ် စစ်ဆေးရန်နှင့် ဆိုက်ရောက်လာသော ယာဉ်များနှင့် သင်္ဘောများကို စောင့်ကြည့်ရန် နိုင်ငံတစ်ဝန်းရှိ စစ်ဆေးရေးဂိတ်အရာရှိများကို ရောဂါထိန်းချုပ်ရေးဌာနက ညွှန်ကြားထားကြောင်း ဌာနညွှန်ကြားရေးမှူးချုပ် ဒေါက်တာ မွန်တီယန် ကနာဆာဝပ်က စနေနေ့တွင် ပြောကြားခဲ့သည်။
ေ-သဆုံးခဲ့သူ သုံးဦးအပါအဝင် သောကြာနေ့အထိ အပျော်စီးသင်္ဘောနှင့် ဆက်စပ်သော ဗိုင်းရပ်စ်ကူးစက်ခံရသူ ရှစ်ဦးရှိပြီဖြစ်ကြောင်း ဒဗ္ဗလျူအိတ်ခ်ျအို က အစီရင်ခံသည်။ ခြောက်ဦးကို ဟန်တာဗိုင်းရပ်စ်ကူးစက်မှုအဖြစ် ဓာတ်ခွဲခန်းအတည်ပြုချက်ရထားပြီး ၎င်းတို့အားလုံးသည် တောင်အမေရိကတွင် တွေ့ရှိခဲ့ပြီး အဓိကအားဖြင့် ပိုးကူးစက်ထားသော ကြွက်များနှင့် ထိတွေ့ခြင်းမှတဆင့် လူသားများထံ ကူးစက်သော အန်ဒီးစ်ဗိုင်းရပ်စ်(ANDV) ကူးစက်ခံရမှုအဖြစ် သတ်မှတ်ခဲ့သည်။
ဗိုင်းရပ်စ်ကူးစက်မှုဖြစ်စဉ်ကို ကမ္ဘာတစ်ဝန်းရှိ ပြည်သူများအန္တရာယ်ရှိနိုင်ခြေ အနိမ့်ဆုံးအဆင့်အဖြစ် ဒဗ္ဗလျူအိတ်ခ်ျအို က အကဲဖြတ်ထားပြီး ကူးစက်ရောဂါဗေဒဆိုင်ရာ အခြေအနေကို ဆက်လက်စောင့်ကြည့်၍ အန္တရာယ်အကဲဖြတ်ချက်ကို အချိန်နှင့်တပြေးညီ ဆောင်ရွက်သွားမည်ဖြစ်သည်။
Ref: ဘန်ကောက်ပို့စ်
