ပေကျင်း၊ မတ်လ ၃၀ ရက်
လက်ဘနွန်နိုင်ငံရှိ ကုလသမဂ္ဂ ယာယီငြိမ်းချမ်းရေးတပ်ဖွဲ့ (ယူနီဖီးလ်) ကိုတိုက်ခိုက်မှုကို တရုတ်နိုင်ငံက ပြင်းထန်စွာ ရှုတ်ချကြောင်းနှင့် ကုလသမဂ္ဂ ငြိမ်းချမ်းရေးတပ်ဖွဲ့ဝင်များ ကို တိုက်ခိုက်မှုမှန်သမျှကို ချက်ချင်းရပ်တန့်ရန် တိုက်တွန်းကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင် က တနင်္လာနေ့ က ကျင်းပပြုလုပ်သော ပုံမှန်သတင်းစာရှင်းလင်းပွဲတွင် ပြောကြားခဲ့သည်။
လက်ဘနွန်တောင်ပိုင်းရှိ ကျေးရွာတစ်ရွာအနီး ယူနီဖီးလ် တပ်စခန်းတစ်ခုတွင် ပေါက်ကွဲမှုဖြစ်ပွားခဲ့ရာ ငြိမ်းချမ်းရေးတပ်ဖွဲ့ဝင် တစ်ဦးသေဆုံးပြီး တစ်ဦးဒဏ်ရာရရှိခဲ့ကြောင်း ယူနီဖီးလ် က တနင်္လာနေ့အစောပိုင်းတွင် သတင်း ထုတ်ပြန်ခဲ့ပြီးနောက် မော်နင်က ယခုကဲ့သို့ တုံ့ပြန်ပြောကြားခဲ့ခြင်း ဖြစ်သည်။
“သေဆုံးသွားတဲ့ တပ်ဖွဲ့ဝင်အတွက် ဝမ်းနည်းကြေကွဲရသလို ဒဏ်ရာရရှိသူတွေနဲ့လည်း ထပ်တူထပ်မျှ ခံစားရပါတယ်” ဟု မော်နင်က ဆိုသည်။
ကုလသမဂ္ဂ ငြိမ်းချမ်းရေးတပ်ဖွဲ့ဝင်များကို ရည်ရွယ်ချက်ရှိရှိ တိုက်ခိုက်ခြင်းသည် နိုင်ငံတကာ လူသားချင်းစာနာထောက်ထားမှုဆိုင်ရာ ဥပဒေနှင့် ကုလသမဂ္ဂ လုံခြုံရေးကောင်စီ ဆုံးဖြတ်ချက် ၁၇၀၁ ကို ပြင်းထန်စွာ ချိုးဖောက်ခြင်းဖြစ်ကြောင်း၊ ယင်းမှာ လုံးဝလက်ခံနိုင်ဖွယ်မရှိဘဲ ချက်ချင်းရပ်တန့်ရမည်ဖြစ်ကြောင်း ၎င်းက အလေးပေးပြောကြားခဲ့သည်။
“သက်ဆိုင်ရာ အဖွဲ့အစည်းတွေအနေနဲ့ အခြေအနေတွေကို အရှိန် လျှော့ချဖို့နဲ့ ကုလသမဂ္ဂ ငြိမ်းချမ်းရေးတပ်ဖွဲ့ဝင်တွေရဲ့ ဘေးကင်းလုံခြုံရေးကို အာမခံနိုင်ဖို့အတွက် လက်တွေ့ကျတဲ့ အစီအမံတွေကို လုပ်ဆောင်ကြဖို့ တရုတ်နိုင်ငံက တိုက်တွန်းပါတယ်” ဟု မော်နင်က ဆက်လက်ပြောကြားခဲ့သည်။
Ref:ဆင် ဟွာ