မတ် ၁၆ ရက်
အရှေ့အလယ်ပိုင်းတွင် လျင်မြန်စွာ အရှိန်မြင့်လာသော ပဋိပက္ခများသည် ယခုသီတင်းပတ်အတွင်း ကျင်းပမည့် ဂျပန်ဝန်ကြီးချုပ် ဆနားအဲ တာကအိချိနှင့် အမေရိကန်သမ္မတ ဒေါ်နယ်ထရမ့်ပ်တို့၏ တွေ့ဆုံမှုကို လွှမ်းမိုးသွားနိုင်ဖွယ်ရှိကြောင်း သိရသည်။
ခေါင်းဆောင်နှစ်ဦးသည် စီးပွားရေး ပူးပေါင်းဆောင်ရွက်မှုနှင့် သင်္ဘောတည်ဆောက်ရေးကဏ္ဍတွင် ပိုမိုနက်ရှိုင်းစွာ လက်တွဲရန် မျှော်လင့်ထားကြသော်လည်း ယခုအခါ အခြေအနေမှာ ပြောင်းလဲသွားခဲ့ပြီဖြစ်ပေသည်။
ကြာသပတေးနေ့တွင် အိမ်ဖြူတော်၌ ကျင်းပပြုလုပ်မည့် ထိပ်သီးဆွေးနွေးပွဲသည် တာကအိချိကို အခက်တွေ့စေမည်ဖြစ်ပေသည်။ သူသည် ဟော်မုဇ်ရေလက်ကြား ပြန်လည်ဖွင့်လှစ်ရန်အတွက် တိုကျိုနှင့် အခြားနိုင်ငံများအနေဖြင့် စစ်သင်္ဘောများစေလွှတ်ရန် ထရမ့်ပ်၏ တောင်းဆိုမှုနှင့် ပြည်ပစစ်ဆင်ရေးများတွင် ပါဝင်ခြင်းကို ကန့်သတ်ထားသည့် သူ့နိုင်ငံ၏ ဖွဲ့စည်းပုံအခြေခံဥပဒေဆိုင်ရာ ကန့်သတ်ချက်များအကြား ကြားညပ်နေပေသည်။
ပြီးခဲ့သည့်လက အီရန် ကို အမေရိက-အစ္စရေးတို့၏ တိုက်ခိုက်မှုနှင့် နောက်ဆက်တွဲအနေဖြင့် အရေးပါသော ရေလမ်းကြောင်းရှိ သင်္ဘောအများအပြားကို အီရန်က တိုက်ခိုက်ခဲ့ပြီးနောက် ထရမ့်ပ်အနေဖြင့် ဤတွေ့ဆုံမှုကို အသုံးပြုကာ ဂျပန်ကို မဟာမိတ်တစ်ဦးအနေဖြင့် ပိုမိုတာဝန်ယူရန် ဖိအားပေးလာနိုင်ကြောင်း လေ့လာသူများက ဆိုကြသည်။
ထရမ့်ပ်က လူမှုကွန်ရက်တွင် ရေးသားရာ၌ “ဒီလိုအတုအယောင် ကန့်သတ်မှုတွေကြောင့် ထိခိုက်နေရတဲ့ တရုတ်၊ ပြင်သစ်၊ ဂျပန်၊ တောင်ကိုရီးယား၊ ဗြိတိန်နဲ့ တခြားနိုင်ငံတွေအနေနဲ့ ဒီဒေသကို သင်္ဘောတွေ စေလွှတ်ကြလိမ့်မယ်လို့ မျှော်လင့်ပါတယ်။ ဒါမှလည်း ဟော်မုဇ်ရေလက်ကြားဟာ ခေါင်းဆောင်ပိုင်း ပြတ်တောက်သွားတဲ့ နိုင်ငံတစ်ခုရဲ့ ခြိမ်းခြောက်မှုကို ခံနေရတော့မှာ မဟုတ်ပါဘူး” ဟု ဖော်ပြခဲ့သည်။
“ထရမ့်ပ်က အီရန်ကိစ္စမှာ အမေရိကဟာ တစ်ယောက်တည်း မဟုတ်ဘူးဆိုတာရယ်၊ သူ့ရဲ့ မဟာမိတ်တွေက ပခုံးချင်းယှဉ် ရပ်တည်နေတယ်ဆိုတာရယ်ကို ပြချင်နေတာပါ” ဟု တမ်ပယ်တက္ကသိုလ် (တိုကျိုဌာနခွဲ) မှ အာရှရေးရာလေ့လာမှု ဒါရိုက်တာ ဂျက်ဖ် ကင်းစတန်က ပြောသည်။ “ဒါပေမဲ့ တာကအိချိဘက်ကတော့ ထရမ့်ပ်အနေနဲ့ ဂျပန်ရဲ့ စစ်ရေးအရ ကတိကဝတ်ပြုမှုကို ထည့်မပြောလာရင်ပဲ အလွန်ဝမ်းသာနေလိမ့်မယ်လို့ ကျွန်တော် သေချာပေါက် ပြောနိုင်ပါတယ်” ဟု ၎င်းက ဆိုသည်။
Ref: ဆော့သ်ချိုင်းနားမောနင်းပို့စ်