ဟော်မုဇ်ရေလက်ကြားပြန်ဖွင့်ရန် ပြင်သစ်နှင့် မဟာမိတ်များပြင်ဆင်နေ

အရှေ့အလယ်ပိုင်းစစ်ပွဲက ဒုတိယသီတင်းပတ်အတွင်းသို့ ဝင်ရောက်လာချိန်တွင် ပြင်သစ်နှင့် ၎င်း၏ မဟာမိတ်များသည် မဟာဗျူဟာအရ အရေးပါသော ဟော်မုဇ်ရေလက်ကြားကို ပြန်ဖွင့်ရန်အတွက် ကာကွယ်ရေးမစ်ရှင်တစ်ခုကို ပြင်ဆင်နေကြောင်း ပြင်သစ်သမ္မတ အီမန်နျူရယ် မေခရွန်က တနင်္လာနေ့တွင် ပြောကြားခဲ့သည်။

အမေရိကနှင့် အစ္စရေးတို့က ဖေဖော်ဝါရီလ ၂၈ ရက် နေ့တွင် အီရန်ကို တိုက်ခိုက်ခဲ့ သောကြောင့် ဒေသတွင်း မငြိမ်သက်မှုများဖြစ်ပေါ်ကာ စစ်ပွဲသည် ကမ္ဘာ့အခြားဒေသများအထိ ပျံ့နှံ့သွားနိုင်သည့် အန္တရာယ်ဖြစ်ပေါ်စေခဲ့ပြီးနောက် ပြင်သစ်ခေါင်းဆောင်သည် မြေထဲပင်လယ်ဒေသသို့ စေလွှတ်ထားသော ချားလ်စ်ဒီဂိုး လေယာဉ်တင်သင်္ဘောပေါ်သို့ ရဟတ်ယာဉ်ဖြင့် ဆင်းသက်ရောက်ရှိခဲ့သည်။

ဟော်မုဇ်မစ်ရှင်သည် စစ်ပွဲ၏ အပြင်းထန်ဆုံးအဆင့်ကို လွန်မြောက်ပြီးနောက် ရေလက်ကြားကို ဖြည်းဖြည်းချင်းပြန်ပွင့်စေရန်အတွက် ကွန်တိန်နာတင်သင်္ဘောများနှင့် ရေနံတင်သင်္ဘောများကို လိုက်ပါစောင့်ရှောက်ရန် ရည်ရွယ်ကြောင်း ထိုရက်အစောပိုင်းက ဆိုက်ပရပ်စ်သို့ သွားရောက်ခဲ့သည့် ခရီးစဉ်အတွင်း မေခရွန်က ပြောကြားခဲ့သည်။

“ဒါက နိုင်ငံတကာကုန်သွယ်ရေးအတွက်သာမက တစ်ချိန်မှာ ဒေသတွင်း(ပင်လယ်ကွေ့) ကနေ ပြန်ထွက်လာနိုင်ရမယ့် ဓာတ်ငွေ့နဲ့ ရေနံစီးဆင်းမှုအတွက်ပါ မရှိမဖြစ်လိုအပ်ပါတယ်” ဟု ဒေသတွင်းလုံခြုံရေးဆွေးနွေးပွဲအတွက် သွားရောက်ခဲ့သည့် ကျွန်းနိုင်ငံခရီးစဉ်တွင် မေခရွန်က ပြောကြားခဲ့သည်။

ဆိုက်ပရပ်စ်သမ္မတ နစ်ကော့စ် ခရစ်တိုဒိုလီဒီးစ်၊ ဂရိဝန်ကြီးချုပ် ကီရီယာကို့စ် မစ်ဆိုတာကစ်တို့နှင့်အတူ ပြောကြားခဲ့ရာ၌ မေခရွန်က “ကာကွယ်ရေးသက်သက်၊ ထောက်ပံ့ရေးသက်သက်မစ်ရှစ်” ကို ဥရောပနှင့် ဥရောပမဟုတ်သော နိုင်ငံများ ပူးပေါင်းဆောင်ရွက်မည်ဟု ပြောကြားခဲ့သည်။

အရှေ့အလယ်ပိုင်းရှိ ရေကြောင်းသွားလာမှုကို ကာကွယ်ရန်အတွက် ၎င်း၏ လုပ်ငန်းစဉ်များကို မြှင့်တင်ရန် အသင့်ရှိနေကြောင်း ဥရောပသမဂ္ဂက တနင်္လာနေ့တွင် ပြောကြားခဲ့သည်။

Ref: ဘန်ကောက်ပို့စ်