မြန်မာ-ကာဇက်စတန်နှစ်နိုင်ငံ စိုက်ပျိုးရေးကဏ္ဍ၊ သတ္တုတူးဖော်ရေးကဏ္ဍ၊ သယ်ယူပို့ဆောင်ရေးကဏ္ဍနှင့် စွမ်းအင်ကဏ္ဍများ၌ အဆင့်မြှင့်တင်နိုင်ရန် နည်းပညာပိုင်းဆိုင်ရာပူးပေါင်းဆောင်ရွက်မှုများလိုအပ်နေရာ ယင်းနယ်ပယ်များတွင် ရင်းနှီးမြှုပ်နှံပါက နှစ်နိုင်ငံလုံးအတွက် အပြန်အလှန်အကျိုးဖြစ်ထွန်းစေမည်ဟု မြန်မာနိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ကာဇက်စတန်နိုင်ငံပိုင် PTRK သတင်းဌာန၏မေးမြန်းမှုအား ပြန်လည်ဖြေကြားခဲ့ခြင်းဖြစ်သည်။
ကာဇက်စတန်နိုင်ငံသည် သဘာဝအရင်းအမြစ်ပေါများပြီး ရေနံနှင့် သဘာဝငွေ့ကို အဓိကထုတ်လုပ်ရောင်းချပြီး ဓာတ်သတ္တုတူးဖော်ရေး၊ သယ်ယူပို့ဆောင်ရေးနှင့် ဂျုံစိုက်ပျိုးရေးတို့ကို အဓိကလုပ်ကိုင်သကဲ့သို့ မြန်မာနိုင်ငံသည်လည်း စိုက်ပျိုးရေးကိုအခြေခံသည့် နိုင်ငံဖြစ်ကာ မြေပေါ်မြေအောက်သယံဇာတများကိုပိုင်ဆိုင်၍ တရုတ်၊ အိန္ဒိယနိုင်ငံများနှင့် နယ်နိမိတ်ချင်းထိစပ်ပြီး အရှေ့တောင်အာရှ၊ တောင်အာရှနိုင်ငံများကြားတွင် ပေါင်းကူးတံတားသဖွယ်ရှိနေသော နိုင်ငံဖြစ်သည်ဟု ပြောသည်။
” မြန်မာနိုင်ငံဟာ စိုက်ပျိုးရေး၊ မွေးမြူရေးအတွက် ကောင်းမွန်တဲ့ ရေ၊ မြေနဲ့ ရာသီဥတုကိုပိုင်ဆိုင်သလို ကမ္ဘာ့ဆန်တင်ပို့မှုထိပ်တန်းနိုင်ငံတွေထဲမှာလည်းပါပါတယ်။ ကမ္ဘာ့ပဲတင်ပို့မှုမှာဆိုရင်လည်း ဒုတိယအမြင့်ဆုံးနိုင်ငံဖြစ်ပါတယ်။ ဒါ့ကြောင့် မြန်မာနိုင်ငံရဲ့ စိုက်ပျိုးရေး၊ သတ္တုတူးဖော်ရေး၊ သယ်ယူပို့ဆောင်ရေးနဲ့ စွမ်းအင်ကဏ္ဍတွေမှာရင်းနှီးမြှုပ်နှံမယ်ဆိုရင် နှစ်နိုင်ငံလုံး အပြန်အလှန်အကျိုးဖြစ်ထွန်းမှာပါ”ဟု မြန်မာနိုင်ငံတော် ယာယီသမ္မတက ပြောသည်။
ထို့ပြင် မြန်မာနိုင်ငံနှင့် ကာဇက်စတန်နိုင်ငံတို့သည် မတူညီသည့် ရာသီဥတု၊ တည်နေရာ၊ ယဉ်ကျေးမှု၊ ထွက်ကုန်များရှိခြင်းကြောင်း ယင်းမတူညီမှုများကို ပေါင်းစည်းနိုင်ခြင်းသည် အင်အားဖြစ်၍ ချစ်ကြည်ရင်းနှီးသည့် ဆက်ဆံရေး ရေရှည်တည်တံ့ခိုင်မြဲစေရန် အစိုးရချင်းဆက်ဆံရေးသာမက ပြည်သူအချင်းချင်းဆက်ဆံရေးကိုလည်း တိုးချဲ့ဆောင်ရွက်ရမည်ဖြစ်၍ ယင်းကဏ္ဍများဖွံ့ဖြိုးတိုးတက်လာရေးသည် အလွန်အရေးပါသည့်ကိစ္စဖြစ်သည်ဟု ပြောသည်။
ထို့အတူ နိုင်ငံတကာအဖွဲ့အစည်းများအားလုံးသဘောတူညီရေးဆွဲထားသည့် အဖွဲ့အစည်း၏ ပဋိဉာဉ်များ၊ စည်းမျည်းစည်းကမ်းများကို ၎င်းတို့ကိုယ်တိုင်ပြန်လည်မချိုးဖောက်မိစေရန်လိုသကဲ့သို့ ကမ္ဘာ့နိုင်ငံတိုင်း၏ အချုပ်အခြာအာဏာကိုလေးစားရန်လိုပြီး ထိုအချက်များကို အဖွဲ့အစည်းတော်တော်များများမှချိုးဖေ-ာက်နေကြခြင်းများမှာ ပြုပြင်သင့်သည့်အချက်များဖြစ်၍ မြန်မာ-ကာဇက်စတန်နှစ်နိုင်ငံ ပူးပေါင်းလေ့လာဆောင်ရွက်နိုင်သည်ဟု မြန်မာနိုင်ငံတော် ယာယီသမ္မတက ပြောကြားခဲ့သည်။