တနင်္သာရီတိုင်း၊ ထားဝယ်မြို့နယ်တွင် အမျိုးသားတစ်ဦးသည် ရိပ်သာဖွင့်၍ ထီးဖြူဆောင်းကာ ပလ္လင်ပေါ်တက် တရားဟောနေခြင်းကြောင့် ယမန်နေ့ စက်တင်ဘာ (၂၅) ရက် ညနေပိုင်းတွင် သက်ဆိုင်ရာက အရေးယူနိုင်ရန် ထိန်းသိမ်းလိုက်ပြီ ဖြစ်သည်။
ဦးရည်ချင်းဟု အမည်ရသည့် အဆိုပါ အမျိုးသားသည် ထားဝယ်မြို့နယ်၊ ဝဲကျွန်းထိန်လယ်ရပ်၊ လေယာဉ်ကွင်းလမ်း၌ သာသနာရေးဦးစီးဌာန၏ ခွင့်ပြုချက်မရှိဘဲ သာသနာမြေမဟုတ်သည့် နေရာ၌ သာသနာ့အဆောက်အဦးများတည်ဆောက်ကာ နေထိုင်နေခြင်းဖြစ်သည်ဟု ဆိုသည်။
အဆိုပါ အမျိုးသားကို ထားဝယ်မြို့နယ်ရဲစခန်း၌ ထိန်းသိမ်းထားပြီး အမှုဖွင့် တရားစွဲဆိုနိုင်ရန်လည်း သက်ဆိုင်ရာက ဆက်လက်လုပ်ဆောင်နေဟု သိရသည်။
“လူတိုင်းတရားဟောလို့ရပါတယ်၊ ဒါပေမဲ့ သံဃာ့အသုံးအဆောင်နဲ့ မရတဲ့ သဘောပါ၊ သံဃာ့အသုံးအဆောင်နဲ့ဆိုရင် သာသနာကို ဝင်ပေါ့နော်၊ အခုက မိသားစုနဲ့အတူနေထိုင်ပြီး ဘုန်းကြီးတွေလို နေလို့မရဘူးနော်” ဟု အုပ်ချုပ်ရေးပိုင်းနှင့် နီးစပ်သူတစ်ဦးက ပြောသည်။
ပြီးခဲ့သည့် စက်တင်ဘာလ (၂၀) ရက်လည်း မွန်ပြည်နယ်၊ မုဒုံမြို့နယ်၊ နှီးပဒေါရွာ၌ သာသနာ့အဆောက်အဦးများဆောက်ပြီး ထီးဖြူဆောင်းထားသည့် ပလ္လင်ပေါ်တက်ထိုင်ကာ တရားဟောသည့် “ပိဋကတ်သုံးပုံမယ်တော်ကြီး “ဆိုသူ အမျိုးသမီးကို သက်ဆိုင်ရာမြို့နယ်ရဲစခန်းတာဝန်ရှိသူများက အရေးယူထားသေးသည်။