အသက်ပြည့်မှီသည့် ကျောင်းသား၊ ကျောင်းသူများအနေဖြင့် ဆန္ဒမဲပေးကြရန် နိုင်ငံတော်လုံခြုံရေးနှင့် အေးချမ်းသာယာရေးကော် မရှင် ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းက တိုက် တွန်းပြောကြားခဲ့သည်။
ယနေ့ သြဂုတ် ၂၄ ရက်နံနက်ပိုင်းကကျင်းပသည့် ၂၀၂၅ ခုနှစ်၊ တက္ကသိုလ်ဝင်စာမေးပွဲတွင် ဘာသာစုံဂုဏ်ထူးနှင့် ဘာသာတွဲအလိုက် အမှတ်အများဆုံးဖြင့် ထူးချွန်စွာအောင်မြင်ခဲ့ကြသော ကျောင်းသား၊ ကျောင်းသူများအား ဂုဏ်ပြုဆုချီးမြှင့်ပွဲတွင်ပြောကြားခဲ့ခြင်းဖြစ်သည်။
ပါတီစုံဒီမိုကရေစီအထွေထွေ ရွေးကောက်ပွဲကြီးအား ယခုနှစ် ဒီဇင်ဘာ ၂၈ ရက်မှစတင်ကာကျင်းပသွားမည်ဖြစ်ပြီး ရွေးကောက်ပွဲပြီးပါက ထွက်ပေါ် လာသည့်အစိုးရကို နိုင်ငံ့တာဝန်လွှဲပေးသွားမည်ဖြစ်ရာ ဆန္ဒမဲပေးပိုင်ခွင့်ရှိသူအားလုံး ဆန္ဒမဲပေးနိုင်ရန်၊ လွတ်လပ်ပြီးတရားမျှတသည့် ရွေးကောက်ပွဲဖြစ်ရန်၊ မသမာမှုကင်းရှင်းသည့် ရွေးကောက်ပွဲဖြစ်ရန်၊ သိက္ခာရှိသည့် ရွေးကောက်ပွဲ၊ သိက္ခာရှိသည့် လွှတ်တော်များဖြစ်စေရေးတို့အတွက် တတ်နိုင်သမျှ ပြည့်စုံအောင် ကြိုတင်စီမံဆောင်ရွက်နေသည်ဟု ပြောသည်။
” အသက်ပြည့်မှီသည့် ကျောင်းသား ကျောင်းသူတွေအပါအဝင် မိဘပြည်သူတွေ၊ တိုင်းရင်းသားပြည်သူတွေအားလုံးအနေနဲ့ ရွေးကောက်ပွဲရဲ့ အခြေ အနေနဲ့ အနှစ်သာရကိုသိရှိကြပြီး မဲပေးခွင့်ရှိသူတွေရဲ့ အခွင့်အရေးမဆုံးရှုံးရအောင် ဆန္ဒမဲပေးကြပါ။ နိုင်ငံတော်ကို ဒီမိုကရေစီစနစ်ကူးပြောင်းရေးမှာ နိုင်ငံသားတစ်ယောက်ရသင့်သည့် အခွင့်အရေးကို လက်လွတ်မခံသင့်ပါဘူး”ဟု ဒု-ဗိုလ်ချုပ်မှူးကြီးစိုးဝင်းက တိုက်တွန်းပြောကြားသည်။
ထို့ပြင် ဒီမိုကရေစီနိုင်ငံတော်တည်ဆောက်ရန် အဓိကဖြစ်သည့် ရွေးကောက်ပွဲအောင်မြင်ရေးအတွက် အဖျက်အမှောင့်လုပ်ရပ်များကို ထိန်းသိမ်းကာကွယ်ကြရန်၊ ပြည်သူအားလုံးပါဝင်ရန်နှင့် တိုင်းရင်းသားပြည်သူအားလုံးမှ ရွေးကောက်ပွဲ အောင်မြင်စွာကျင်းပနိုင်ရေးအတွက် ပူးပေါင်းပါဝင်ဆောင်ရွက်ကြရန်လည်း ဒု-ဗိုလ်ချုပ်မှူးကြီးစိုးဝင်းက တိုက်တွန်းပြောကြားခဲ့သည်။