ကာကွယ်ရေးနှင့် ပတ်သက်ပြီး ငွေကိုပိုမိုသုံးစွဲရန် အမေရိကန်သမ္မတ ဒေါ်နယ်ထရမ့်ပ် အစိုးရအဖွဲ့က တောင်းဆိုခဲ့သဖြင့် ဂျပန်သည် ၎င်း၏ အဓိကမဟာမိတ် အမေရိကနှင့် အဆင့်မြင့်အရာရှိအဆင့် အစည်းအဝေးကို ဖျ-က်သိမ်းလိုက်ကြောင်း သိရသည်။
အမေရိကန် နိုင်ငံခြားရေးဝန်ကြီးမာကို ရူဘီယိုနှင့် ကာကွယ်ရေးဝန်ကြီး ပက်တေဟက်ဆက်တို့သည် နှစ်စဉ် လုံခြုံရေးဆွေးနွေးပွဲအတွက် ဇူလိုင် ၁ ရက်တွင် ဂျပန်နိုင်ငံခြားရေးဝန်ကြီး တာကီရှီ အီဝါယာ၊ ကာကွယ်ရေးဝန်ကြီး ဗိုလ်ချုပ်ကြီး ဂျန်နာကာတာနီတို့နှင့် တွေ့ဆုံရန် မျှော်လင့်ထားသည်။
သို့သော် ဖင်နန်ရှယ်တိုင်မ်းစ်က ကာကွယ်ရေးအသုံးစရိတ်ကို အစောပိုင်းက တောင်းဆိုထားသည့် ဂျီဒီပီ၏ ၃ ရာခိုင်နှုန်းထက်ပို၍ ၃ ဒဿမ ၅ ရာခိုင်နှုန်း တိုးမြှင့်သုံးစွဲရန် အမေရိက,က ဂျပန်ကို တောင်းဆိုခဲ့သဖြင့် တိုကျိုသည် အစည်းအဝေးကို ဖျ-က်သိမ်းခဲ့သည်ဟု ဖော်ပြခဲ့သည်။
အမေရိကန်သမ္မတဒေါ်နယ်ထရမ့်ပ် အစိုးရသည် ကာကွယ်ရေး အသုံးစရိတ်ကို ဂျီဒီပီ၏ ၅ ရာခိုင်နှုန်းအထိ သုံးစွဲသွားရန် ဂျပန်အပါအဝင် ၎င်း၏ အာရှမဟာမိတ်များကို တောင်းဆိုနေသည်ဟု ဂျပန် နစ်ခေးအေးရှက စနေနေ့တွင် သတင်းဖော်ပြခဲ့သည်။
လွန်ခဲ့သည့် ရက်သတ္တပတ်များက ပြုလုပ်ခဲ့သော ဆုံးဖြတ်ချက်တွင် ဂျပန်သည် အစည်းအဝေးကို ရွှေ့ဆိုင်းခဲ့သည်ဟု အမည်မဖော်လိုသည့် အမေရိကန်အရာရှိတစ်ဦးက ရိုက်တာကို ပြောကြားခဲ့သည်။ ဂျပန်သည် အစည်းအဝေးမှ နုတ်ထွက်ခဲ့သည်ဟု ကြားသိရကြောင်းနှင့် ယင်းသို့လုပ်ရသည့် အကြောင်းရင်းကိုမူ မသိရကြောင်း ယင်းကိစ္စနှင့် နီးစပ်သည့် အစိုးရမဟုတ်သော သတင်းရင်းမြစ်တစ်ခုက ပြောဆိုခဲ့သည်။
တရုတ်ကို တန်ပြန်ရန်အတွက် ဂျပန်အနေဖြင့် ကာကွယ်ရေးအသုံးစရိတ်ကိုပိုသုံးရန် ပင်တဂွန် တတိယမြောက်ဝါအရင့်ဆုံးအရာရှိ အဲလ်ဘရစ် ကိုလ်ဘီက ၎င်း၏ ရာထူးခန့်အပ်မှုဆိုင်ရာ ကြားနာမှုအတွင်း တောင်းဆိုခဲ့ပြီးနောက် ဂျပန်၏ ကာကွယ်ရေးအသုံးစရိတ်ကို အခြားနိုင်ငံများက ဆုံးဖြတ်စရာမလိုဟု ဝန်ကြီးချုပ် ရှီဂီယူ အီရှီဘာက မတ်လအတွင်းက ပြောကြားခဲ့သည်။
ယဟျူးနူးစ်