ကန်-တရုတ်တင်းမာစဉ် ဥရောပ-အာရှ ညီညွတ်ရန် မက်ခရွန် တိုက်တွန်း

ဥရောပနှင့် အာရှသည် ခိုင်မာအားကောင်းသော မဟာမိတ်ဖွဲ့ရန်နှင့် အမေရိကနှင့် တရုတ်အကြား အကွဲအပြဲအတွင်း မကျရောက်ရေးကိုရှောင်ရှားရန် ပြင်သစ်သမ္မတ အီမန်နျူဝယ် မက်ခရွန်က သောကြာနေ့တွင် ပြောကြားခဲ့သည်။

စင်ကာပူတွင် နှစ်စဉ်ကျင်းပမြဲဖြစ်သည့် ကာကွယ်ရေးဖိုရမ် ရှန်ဂရီလာဆွေးနွေးပွဲတွင် မိန့်ခွန်းပြောကြားရာ၌ ကြီးထွားလာသော အမေရိက-တရုတ် ပြိုင်ဆိုင်မှုမှပေါ်ပေါက်လာသည့် ကန့်သတ်ချက်များနှင့် ဘေးထွက်ဆိုးကျိုးများကို တန်ပြန်ရန်အတွက် မဟာမိတ်အသစ်ဖွဲ့စည်းရန် တက်ရောက်လာသော အင်ဒို-ပစိဖိတ်နိုင်ငံများ၏ ဝန်ကြီးချုပ်များနှင့် ကာကွယ်ရေးဝန်ကြီးများကို မက်ခရွန်က အထက်ပါအတိုင်းတိုက်တွန်းခဲ့သည်။

ပြင်သစ်သည် အမေရိကန်ပြည်ထောင်စု၏ မိတ်ဆွေ၊ မဟာမိတ်နိုင်ငံတစ်ခုဖြစ်ပြီး တစ်ခါတရံတွင် တရုတ်နှင့် သဘောထားကွဲလွဲမှု၊ ပြိုင်ဆိုင်မှုရှိလျှင်ပင် မိတ်ဆွေနိုင်ငံအဖြစ် ပူးပေါင်းဆောင်ရွက်ကြောင်း မက်ခရွန်က ပြောကြားလိုက်ပြီး မိမိတို့အကျိုးစီးပွားနှင့် ကိုက်ညီသော ကိစ္စရပ်များတွင် ထိုသို့လုပ်ဆောင်သည်ဟု ဆက်လက်ပြောကြားခဲ့သည်။

စူပါပါဝါနှစ်နိုင်ငံအကြား သဘောထားကွဲလွဲခြင်းသည် ကမ္ဘာကြီးကရင်ဆိုင်ရမည့် အဓိကအန္တရာယ်ဖြစ်သည်ဟု မက်ခရွန်က ပြောသည်။

ဗီယက်နမ်နှင့် အင်ဒိုနီးရှားနိုင်ငံများသို့လည်း သွားရောက်ခဲ့သည့် ဒေသတွင်းခရီးစဉ်တွင် မက်ခရွန်က ထိုကဲ့သို့ ပြောကြားခဲ့ခြင်းဖြစ်သည်။ အမေရိကန်-တရုတ် ကုန်သွယ်ရေးစစ်ပွဲနှင့် ပေကျင်းနှင့် ဆက်လက်ဖြစ်ပေါ်နေသည့် ပထဝီနိုင်ငံရေး အငြင်းပွားမှုများကြောင့် ကတိကဝတ်ထားရှိမှုများ ပျ-က်စီးလာမည်ကို စိုးရိမ်သော ဥရောပနိုင်ငံခေါင်းဆောင်သည် အခြားနိုင်ငံများနှင့် ကာကွယ်ရေးဆိုင်ရာ ပူးပေါင်းဆောင်ရွက်မှုကို မြှင့်တင်ရန် ကြိုးပမ်းနေသည်။

စည်းကြပ်ခွန်သစ်များနှင့် ကုန်သွယ်မှုတွင် စည်းမျဉ်းအခြေပြု အစီအစဉ်အဆုံးသတ်ခြင်း၏ မှန်းဆမရမှုကြောင့် အာဆီယံနှင့် ဥရောပကို သက်ရောက်မှုရှိခဲ့ကြောင်း မက်ခရွန်ကပြောကြားခဲ့ပြီး ယင်းသည် နိုင်ငံများ၏ စီးပွားရေးနှင့် ကာကွယ်ရေးဆိုင်ရာ အားထုတ်မှုများအတွက် ငွေကြေးထည့်ဝင်နိုင်စွမ်းအပေါ်ကို အကျိုး သက်ရောက်လိမ့်မည်ဟု မက်ခရွန်က သတိပေးသည်။

မကြာခင်က စည်းကြပ်ခွန်များနှင့်ပတ်သက်၍ ယာယီပြေငြိမ်းမှုများ ရခဲ့သော်လည်း တရုတ်နှင့် အမေရိကအကြား တင်းမာမှုများ တဖန်ပြန်လည်ဖြစ်ပွားလာချိန်တွင် မက်ခရွန်က ဒေသတွင်းနှင့် ပြန်လည်ထိတွေ့ဆက်ဆံမှု လုပ်လာခြင်းဖြစ်သည်။

Ref: စီအင်န်ဘီစီ