လေဒီဂါဂါပွဲဗုံးဖောက်ဖို့ကြံစည်မှုဖြင့်သံသယရှိသူနှစ်ဦးကိုဘရာဇီးရဲကဖမ်း

မေလ ၄ ရက်

ရီယိုဒီဂျနေရိုးတွင် လူပေါင်း နှစ်သန်းကျော် တက်ရောက်ခဲ့သော လေဒီဂါဂါဖျော်ဖြေပွဲ၌ ဖောက်ခွဲရန် ကြံစည်မှုဖြင့် လူနှစ်ဦးကို ဘရာဇီးရဲတပ်ဖွဲ့က ဖမ်းဆီးလိုက်သည်။

စနေနေ့ကနာမည်ကျော် ကိုပါကာဘာနာ ကမ်းခြေမှာ ကျင်းပသော အခမဲ့ဖျော်ဖြေပွဲ၌ ဗုံးခွဲတိုက်ခိုက်မှုကို တားဆီးပိတ်ပင်နိုင်ခဲ့သည်ဟု ရီယိုဒီဂျနေရိုးမြို့ပြရဲတပ်ဖွဲ့က တနင်္ဂနွေနေ့မှာ ပြောကြားခဲ့သည်။ သံသယရှိသူတွေကိုဖမ်းဆီးနိုင်ခဲ့ပါသည်။

“Fake Monster” ဟုအမည်ပေးထားသည့် ဖောက်ခွဲရန် ကြံစည်မှုအတွက် တာဝန်ရှိသူ အရွယ်ရောက်ပြီးသူတစ်ဦးနှင့် ဆယ်ကျော်သက်တစ်ဦးကို ဖမ်းဆီးနိုင်ခဲ့ခြင်းဖြစ်သည်။ “Fake Monster” ဟု ခေါ်ဆိုခြင်းမှာ လေဒီဂါဂါက၎င်း၏ပရိသတ်များကို ချစ်စနိုးဖြင့်ခေါ်ဆိုသည့် သူ၏အိမ်မွေးတိရစ္ဆာန်အမည်ဖြစ်သည့် “Little Monsters” ကို ရည်ညွှန်း၍ ခေါ်ဆိုခြင်းဖြစ်ကြောင်း ရဲတပ်ဖွဲ့က ထပ်လောင်းပြောကြားခဲ့သည်။

သံသယရှိသူများသည် ဆိုရှယ်မီဒီယာတွင် အာရုံစိုက်မှုရစေရန် ရည်ရွယ်၍ “ဖောက်ခွဲရေးပစ္စည်းများကို အသုံးပြု၍ တိုက်ခိုက်မှုများကို လုပ်ဆောင်ရန်” အွန်လိုင်းတွင် လူများကို စုဆောင်းခဲ့သည်ဟု ဆိုသည်။ ရီယိုဒီဂျနေရိုပြည်နယ်တစ်ဝန်းနှင့် ဆော်ပေါ်လို၊ ရီယိုဂရန်ဒီဒိုဆူးလ်နှင့် မာတိုဂရော့ဆိုပြည်နယ်များတွင် တရားရေးဝန်ကြီး ဌာနနှင့် ရဲများပူးပေါင်းဆောင်ရွက်၍ စစ်ဆင်ရေးကို လုပ်ဆောင် ခဲ့ကြသည်။

ရီယိုဒီဂျနေရိုးမြို့ပြရဲတပ်ဖွဲ့ အတွင်းဝန် ဖီလီပီ ကူရီ က ၎င်းတို့သည် LGBT များကို မလိုလားသောကြောင့် တိုက်ခိုက်ခြင်းဖြစ်ပြီး သံသယရှိသူများသည် ဘရာဇီးလ် LGBT အသိုင်းအဝိုင်းကို ပစ်မှတ်ထားရန် ကြိုးပမ်းနေသည်ဟု အာဏာပိုင်များက ယုံကြည်ကြောင်း တနင်္ဂနွေနေ့တွင် ပြောကြားခဲ့သည်။

ရီယိုဒီဂျနေရိုးမြို့ပြရဲတပ်ဖွဲ့ အကြီးအကဲ လူဝီ လီမာ က “လုပ်ကြံမှုနောက်ကွယ်က အဖွဲ့ဟာ အမုန်းစကားနဲ့ ကြမ်းတမ်းတဲ့ အကြောင်းအရာတွေကို အွန်လိုင်းမှာ ဖြန့်ချီခဲ့ပြီး ကြည့်ရှုသူ ပိုမိုများပြားပြီး ပါဝင်သူတွေ အများစုဟာ ဆယ်ကျော်သက်တွေ၊ အများစုဟာ ကလေးတွေပါ” ဟု ဆိုသည်။

ရီယိုမြို့တော်ခန်းမ၌ လူပေါင်း ၂.၁ သန်း ရှိသည်။ အဆိုပါဖျော်ဖြေပွဲ၌ ပွဲမစခင် နာရီပိုင်းအတွင်း သံသယရှိသူများကို ဖမ်းဆီးထား‌ေကြာင်း ဘရာဇီးအာဏာပိုင်များက ပြောကြားခဲ့ သော်လည်း အနှောင့်အယှက်မရှိဘဲ ပွဲကိုဆက်လက်ကျင်းပ နိုင်ခဲ့သည်။

လေဒီဂါဂါ၏ ပြောရေးဆိုခွင့်ရှိသူ တစ်ဦးက ဂါဂါနှင့် သူ၏အဖွဲ့သည် ဖျော်ဖြေပွဲမတိုင်မီနှင့် ဖျော်ဖြေစဉ်ကာလအတွင်း ဘေးကင်းရေးဆိုင်ရာ ကိစ္စရပ်များကို မသိရှိခဲ့ကြောင်း၊ နောက်နေ့နံနက်တွင် သာခြိမ်းခြောက်မှုအကြောင်း ကို သိရှိခဲ့ရခြင်းဖြစ်ကြောင်း ကြေညာချက်တွင် ဖော်ပြထားသည်။

အဆိုပါ ကြေငြာချက်တွင် “သူ၏အဖွဲ့သည် ဖျော်ဖြေပွဲစီစဉ်ခြင်းနှင့် ဖျော်ဖြေပွဲစဉ်တစ်လျှောက်လုံး ရဲတပ်ဖွဲ့နှင့် အနီးကပ် လုပ်ကိုင်ခဲ့ပြီး ဘေးကင်းရေးအစီအမံများ၊ လုံခြုံရေးများ ကိုလည်း စိတ်ချယုံကြည်ကြသည်”ဟု ထပ်မံဖော်ပြခဲ့ပါသည်။

၂၀၁၁ ခုနှစ်ကထွက်ရှိခဲ့သော LGBTQ သီချင်းဖြစ်လာသည့် ပေါ့ပ်အဆိုတော်လေဒီဂါဂါ၏ ဂန္တဝင်သီချင်းဖြစ်သည့် Born This Way သီချင်းကို ပရိသတ်များက သဘောကျနှစ်ခြိုက်ခဲ့ကြသည်။ အဆိုပါ စနေနေ့ဖျော်ဖြေပွဲတွင် စစ်တပ်နှင့် ရဲအရာရှိပေါင်း ၅,၂၀၀ ဖြင့် လုံခြုံရေးတင်းကျပ်ထားခဲ့သည်။

Ref: အယ်လ်ဂျာဇီယား