အာဆီယံ ဘောလုံးအဖွဲ့ချုပ် (AFF)သည်
ပရီးမီးယားလိဂ်ကလပ်မန်ချက်စတာယူနိုက်တက်အသင်းနှင့် အာဆီယံညွန့်ပေါင်းအသင်း (ASEAN- All Stars) တို့ ခြေစမ်းပွဲကစားမည်ဖြစ်ရာ၊ မြန်မာ့လက်ရွေးစင် ကွင်းလယ်ကစားသမားမောင်မောင်လွင်အား ရွေးချယ်ခေါ်ယူခဲ့ကြောင်း မြန်မာနိုင်ငံဘောလုံးအဖွဲ့ချုပ်က ယနေ့တွင် အသိပေးထားသည်။
ခြေစမ်းပွဲကို လာမည့် မေလ (၂၈) ရက်၌
မလေးရှားနိုင်ငံ ဘူကစ်ဂျာလီကွင်းတွင် ကျင်းပသွားမည်ဖြစ်ကာ၊ မောင်မောင်လွင်အား ခေါ်ယူမှုအတွက် မြန််မာနိုင်ငံဘောလုံးအဖွဲ့ချုပ်သို့ AFF က တရားဝင် ဆက်သွယ် အကြောင်းကြားလာခြင်းဖြစ်သည်ဟု ဆိုသည်။
မောင်မောင်လွင်သည် လက်ရှိအချိန်တွင် မြန်မာ့လက်ရွေးစင်အသင်းအတွက် ခြေစွမ်းပြ ပါဝင်ကစားနေသလို ထိုင်း ပရီးမီးယားလိဂ်ကလပ် Lamphun Warriors FC တွင်လည်းပရော်ဖက်ရှင်နယ်ပီပီ ခြေစွမ်းပြ ကစားနေခြင်းကြောင့် အာဆီယံညွန့်ပေါင်းအသင်းအတွက် မြန်မာကိုယ်စားပြု ရွေးချယ်ခြင်း ဖြစ်ကြောင်း AFF ကလည်းထုတ်ပြန်ထားသည်။
အာဆီယံ ညွန့်ပေါင်းအသင်းနည်းပြချုပ်အဖြစ် ဗီယက်နမ်လက်ရွေးစင် အသင်းနည်းပြ MR. Kim Sang-Sik ကတာဝန်ယူ ကိုင်တွယ်ဆောင်ရွက်မည်ဖြစ်ကြောင်း သိရသည်။