မြန်မာနိုင်ငံဒီဂျစ်တယ်စီးပွားရေးဆိုင်ရာလုပ်ငန်းရှင်များအသင်း(MDEA)သည် ငလျင်ဘေးသင့်ဒေသများရှိပြည်သူများအား ကူညီထောက်ပံ့ပေးနိုင်ရန်အတွက် ပစ္စည်းများထုတ်လုပ်ဖြန့်ဖြူးရောင်းချသူနှင့် လှူဒါန်းလိုသောစေတနာရှင်များအား ချိတ်ဆက်၍ MDEA ၏ စီမံခန့်ခွဲမှုဖြင့် ဒေသအသီးသီးရှိ ဒေသအခြေစိုက် အဖွဲ့အစည်းများထံသို့ Royal Express နှင့် Ninja Van တို့မှ အခမဲ့ပေးပို့လှူဒါန်းပေးမည့် အစီအစဉ်တစ်ခုကို သင့်လျော်သော လုပ်ငန်းရှင်များသို့ ဖိတ်ခေါ်ထားကြောင်း သိရသည်။
ထိုအစီအစဉ်တွင် လုပ်ငန်းရှင်များက စားသောက်ကုန်၊ လူသုံးကုန်၊ အဝတ်အထည်၊ ဆေးဝါးနှင့် အခြားအထွေထွေပစ္စည်းထုတ်ကုန်များအား ဧပြီ ၈ ရက်နှင့် ၉ ရက်တွင် FORTUNE PLAZA (မင်းနန္ဒာလမ်းနှင့် သုမနလမ်းထောင့်၊ သာကေတ)၌ နံနက် (၉း၃၀) မှ ညနေ (၆း၃၀) ထိ လာရောက်ပြသစေ၍ အကျိုးအမြတ်မယူသော ဈေးနှုန်းဖြင့် ရောင်းချပေးနိုင်ရန် ဖိတ်ခေါ်ထားသည်။
လှူဒါန်းလိုသောစေတနာရှင်များမှ ပစ္စည်းများကို FORTUNE PLAZA တွင် လာရောက် ကြည့်ရှုဝယ်ယူပြီးပါက ဘောက်ချာကို MDEA ၏ ပစ္စည်းလက်ခံရာဌာန တွင် အပ်နှံရမည်ဖြစ်ပြီး ပစ္စည်းများကို ပြရောင်းချသည့်ဆိုင်များမှ MDEA ၏ ပစ္စည်းလက်ခံရာ ဌာနသို့ အပ်နှံပြီးပါက MDEA မှ အခမဲ့ပို့ဆောင်ပေးသွားမည်ဖြစ်သည်။
FORTUNE PLAZA တွင် ပြသမည့်ဆိုင်ခန်းနေရာ (9 m”) အတွက် ကုန်ကျစရိတ် ကျခံရန်မလိုဘဲ နေရာအကျယ်အဝန်း ညှိနှိုင်းလိုပါက ဦးအောင်ကိုကိုဦး ဖုန်း – ၀၉၂၆၂ ၃၇၇ ၇၇၉ ၊နန်းကလျာ ဖုန်း – ၀၉ ၄၂၀ ၁၂၆ ၁၅၈ သို့ဆက်သွယ်နိုင်ကြောင်းနှင့် သင့်လျော်သော လုပ်ငန်းရှင်များမှ ပါဝင်ခင်းကျင်းပြသရောင်းချပေးနိုင်ရေးအတွက် ပူးပေါင်းဆောင်ရွက်ပေးပါရန် မေတ္တာရပ်ခံထားကြောင်းသိရသည်။