(၄)နိုင်ငံ အမျိုးသမီး ဘောလုံးဖိတ်ခေါ်ပြိုင်ပွဲ နောက်ဆုံးဗိုလ်လုပွဲစဉ်အား ဖေဖော်ဝါရီ(၂၆)ရက် ၊ ညနေ (၆)နာရီ (၄၅) မိနစ်အချိန်တွင် အိမ်ရှင်နီပေါအသင်းနှင့် မြန်မာအသင်းတို့ ယှဉ်ပြိုင်ကစားသွားကြရမည်ဖြစ်သည်။
အိမ်ရှင် နီပေါအသင်း နှင့် မြန်မာအသင်းတို့သည် အုပ်စုတွင်းယှဉ်ပြိုင်အပြီး ရမှတ်(၆)မှတ်စီဖြင့် ဗိုလ်လုပွဲတွင် ထိပ်တိုက်တွေ့ဆုံကြရခြင်းဖြစ်သည်။
ယနေ့တွင် ပွဲကြိုသတင်းစာရှင်းလင်းပွဲပြုလုပ်ခဲ့ရာ မြန်မာအမျိုးသမီးအသင်း နည်းပြချုပ် ယုကီတက်ဆုရို က “ပထမဆုံးအနေနဲ့ ကျွန်တော်တို့ကို ဒီပြိုင်ပွဲကို ဖိတ်ခေါ်ပေးတဲ့ အိမ်ရှင်နီပေါနိုင်ငံကို ကျေးဇူးတင်ကြောင်း ပြောလိုပါတယ်။ ဖိုင်နယ်ပွဲမှာ အိမ်ရှင်နီပေါအသင်းနဲ့ ထပ်မံကစားခွင့်ရတဲ့အပေါ်မှာလည်း အရမ်းကို ကျေနပ်မိပါတယ်။ ဖိုင်နယ်ပွဲမှာ ကျွန်တော်တို့ မြန်မာအသင်းရော အိမ်ရှင်နီပေါအသင်းရော သန့်သန့်ရှင်းရှင်းနဲ့ အကောင်းဆုံး ကြိုးစားယှဉ်ပြိုင် ကစားသွားမှာဖြစ်လို့ ပရိတ်သတ်တွေအနေနဲ့ စောင့်ကြည့်အားပေး စေချင်ပါတယ်။”ဟု ပြောကြားသည်။
ယင်းအပြင် မြန်မာအမျိုးသမီးအသင်း တိုက်စစ်မှူး ဝင်းသိင်္ဂီထွန်းကလည်း “ပထမဦးဆုံး ပြောချင်တာက ဖိတ်ခေါ်ပေးတဲ့အတွက်လည်း ကျေးဇူးတင်ပါတယ်။ မတူညီတဲ့ အသင်းတွေနဲ့ ကစားခွင့်ရတာလည်း ကျေနပ်မိပါတယ်။ ဖိုင်နယ်ပွဲကို သန့်သန့်ရှင်းရှင်းနဲ့ လေးလေးစားစား ယှဉ်ပြိုင်ကစားသွားမှာပါ”ဟု ဆိုသည်။
မြန်မာအမျိုးသမီး လက်ရွေးစင် ဘော လုံးအသင်းသည် ပွဲ ဦးထွက် လက်ဘနွန်အမျိုး သမီးအသင်းဖြင့် ယှဉ်ပြိုင်ရာ တွင် (၃)ဂိုးပြတ်ဖြင့် အနိုင်ရရှိထားသလို ဒုတိယအကျော့ကာဂျစ္စတန် လက်ရွေးစင် အမျိုးသမီးအသင်းနှင့် ယှဉ်ပြိုင်ကရာ၌ (၅)ဂိုးပြတ်ဖြင့် အနိုင်ရလဒ် ထွက်ပေါ်ခဲ့ပြီး အိမ်ရှင်နီပေါအသင်းနှင့် ပထမအကြိမ်ယှဉ်ပြိုင်မှုတွင် (၂)ဂိုးစီဖြင့် သရေရလဒ်ထွက်ပေါ်ခဲ့ကြသည်။
ထို့ကြောင့် လေးနိုင်ငံဖိတ်ခေါ်ပြိုင်ပွဲ၏ စည်းမျဉ်အရ နော က်ဆုံး အမှတ်အများဆုံးရရှိခဲ့သည့် နီပေါနှင့် မြန်မာအသင်းတို့ ဗိုလ်လုပွဲတက်ရောက်ခဲ့ခြင်းဖြစ်သည်။
ပြိုင်ပွဲကို နီပေါနိုင်ငံ၊ ခတ္တမန္ဒုမြို့၊ Dasharath ကွင်း၌ ဖေ ဖော်ဝါရီ(၂၃)ရက်မှ (၂၆)ရက်အထိ ယှဉ်ပြိုင်ကစားနေခြင်းဖြစ်သည်။