ဧရာဝတီတိုင်းဒေသကြီးရှိ ဆံတော်ရှင်မြတ်မော်တင်စွန်း စေတီတော်မြတ်ကြီး၏ ဗုဒ္ဓပူဇနိယပွဲတော်ကို ယခုလအတွင်း (၁၅) ရက်ကြာကျင်းပသွားမည်ဖြစ်ကြောင်း တိုင်းဒေသကြီးအစိုးရအဖွဲ့မှ သိရသည်။
ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ ဟိုင်းကြီးကျွန်းမြို့၊ ဇီးချိုင်ကျေးရွာအုပ်စုတွင် တည်ထားကိုးကွယ်တော်မူသည့် ဆံတော်ရှင်မြတ်မော်တင်စေတီတော်မြတ်ကြီး ၂၀၂၅ ခုနှစ်၊ ဗုဒ္ဓပူဇနိယပွဲတော်ကျင်းပနိုင်ရေး လုပ်ငန်းညှိနှိုင်းအစည်းအဝေးကို ဖေဖော်ဝါရီ (၁၃) ရက်၌ တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ(၁)တွင် ကျင်းပပြုလုပ်ခဲ့သည်။
မဟာမကုဋရံသီဆံတော်ရှင် မြတ်မော်တင်စေတီတော်မြတ်ကြီး၏ နှစ်စဉ်ကျင်းပမြဲဖြစ်သော ဗုဒ္ဓပူဇနိယပွဲတော်အား ဖေဖော်ဝါရီလ(၂၇) ရက်မှ မတ်လ (၁၃) ရက်အထိ (တပေါင်းလဆန်း (၁) ရက်မှ လပြည့်နေ့အထိ) (၁၅)ရက်ကြာ စည်ကားသိုက်မြိုက်စွာ ကျင်းပသွားမည်ဖြစ်ကြောင်း သိရသည်။
အဆိုပါပွဲတော် ကျင်းပနေစဉ်ကာလအတွင်း ဘုရားဖူးပြည်သူများအား ရောင်းချသည့် အစားအစာများ သန့်ရှင်းလတ်ဆတ်မှုရှိစေရေး၊ ဒေသထွက်အမှတ်တရ လက်ဆောင်ပစ္စည်းများ ဝယ်ယူနိုင်ရေး၊ စားသောက်ဆိုင်များနှင့် ဆိုင်ခန်းများ စနစ်တကျရှိစေရေးအတွက် စီစဉ်ဆောင်ရွက်ကြရန် တိုင်းဒေသကြီး ဝန်ကြီးချုပ်က ဆိုသည်။
ထို့ပြင် ဘုရားဖူးလာပြည်သူများ နားနေတည်းခိုနိုင်ရေးအတွက် တည်းခိုခန်းများ ပြည့်စုံရေး၊ သောက်ရေ၊ သုံးရေများ လုံလောက်စွာရရှိရေး ကိစ္စရပ်များကိုလည်း ပြင်ဆင်ကြရမည်ဖြစ်ကြောင်း၊ ငွေတောင်ကမ်းခြေ၊ ကျောက်ကလပ်ကဲ့သို့ အထင်ကရနေရာဒေသများသို့ ဘုရားဖူးလာပြည်သူများ သွားရောက်အပန်းဖြေနိုင်အတွက် ယာဉ်များစနစ်တကျပြေးဆွဲရေး၊ ယာဉ်အန္တရာယ်၊ လမ်းအန္တရာယ်ကင်းရှင်းရေး၊ ရေ လမ်းခရီးဖြင့် ဘုရားဖူးလာရောက်မည့်ပြည်သူများအတွက်လည်း ရေယာဉ်များပေါ်တွင် အသက်ကယ်အင်္ကျီနှင့် လိုအပ်သည့် လုံခြုံရေးကိစ္စရပ်များလည်း ဆောင်ရွက်ကြရမည်ဖြစ်ပါကြောင်း တိုင်းဒေသကြီးဝန်ကြီးချုပ်ကပြောသည်။