မွန်ပြည်နယ်၊ ကျိုက်မရောမြို့နယ်၊ ငပူအင်းကျေးရွာတွင် နှစ်စဉ်ကျင်းပမြဲဖြစ်သည့် ဒေါင်ဒင်အင်း ငါးဖမ်းပွဲတော်ကို ဖေဖော်ဝါရီ (၁၄)ရက် နံနက်(၉) နာရီအချိန်၌ ဒုတိယ ရက်မြောက်အဖြင့်
စည်ကားသိုက်မြိုက်စွာကျင်းပပြုလုပ်လျှက်ရှိကြောင်း ဒေသခံများထံက သိရသည်။
အဆိုပါ ငါးဖမ်းပွဲတော်ကို ဖေဖော်ဝါရီ (၁၃)ရက်၌ စတင်ကျင်းပပြုလုပ်ခြင်းဖြစ်ပြီး၊ ဒေါင်ဒင်အင်းအနီးကျေးရွာများဖြစ်သည့် ငပူအင်း၊ ကော့စပ်၊ ကျုံကွယ်စသည့်ကျေးရွာများအပြင် ကျိုက်မရော၊ မုဒုံ၊ ကော့ကရိတ်၊ ကြာအင်းဆိပ်ကြီး မြို့နယ်အတွင်းရှိ ဒေသခံများ လာရောက်ဆင်နွှဲလျက်ရှိကြောင်း သိရသည်။
ယခုနှစ်ကျင်းပပြုလုပ်သည့် ဒေါင်ဒင်အင်းငါးဖမ်းပွဲတော်တွင် ကရင်ရိုးရာဒုံးယိမ်းအကများ၊ ကရင်ရိုးရာမုန့်များ ကျွေးမွေးခြင်းအစီအစဉ်များထည့်သွင်းပြုလုပ်ခဲ့ကြောင်း သိရသည်။
အဆိုပါ ပွဲတော်ကျင်းပမည့်ရက်ကို ယခုနှစ်အတွက် တပို့တွဲလဆုတ် (၉)ရက်နေ့ အား သတ်မှတ်ပေးခဲ့ပြီး၊ အင်းရေခမ်းခြောက်သည့် တန်ခူးလအထိ ငါးဖမ်းကြသူများလည်းရှိကြောင်း သိရသည်။
ထိုပွဲတော်ကျင်းပရခြင်းသည် ဒေသတွင်းရိုးရာအစဉ်အလာဓလေ့ထုံးစံအရ နတ်စာကျွေးပူဇော်ပသသည့် ပွဲတော်တစ်ခုဖြစ်ကာ၊ ရှေးလူကြီးများ၏ အဆိုအရ ဒေါင် ဒင်အင်းနေရာ၌ နန်းတော်တစ်ခုတည်ရှိခဲ့ပြီး ယင်းမြို့အား အုပ်ချုပ်ခဲ့သည့် ဘုရင်နှင့် မြို့သူမြို့သားတို့မှာ ဘာသာရေးအယူလွှဲ၍ ရဟန္တာတစ်ပါးအားစော်ကားမိရာမှ ယင်းအရပ်၌ ရေလွှမ်းမိုးကာ ငါးများဘဝသို့ရောက်ရှိခဲ့ရခြင်းဖြစ်ကြောင်း ဒေသခံများ၏ ပြောကြားချက်အရ သိရသည်။
ဓာတ်ပုံ- Kyaw Photography