ထိုင်ဝမ်တွင်ရစ်ခ်တာစကေး ၆ ဒဿမ ၄ အဆင့်ရှိ ငလျင် လှုပ်ခတ်

ထိုင်ဝမ်တောင်ပိုင်း တောင်ပေါ်ကျေးလက်ဒေသတွင် ဇန်နဝါရီ ၂၁ ရက်က ရစ်ခ်တာစကေး ၆ ဒဿမ ၄ အဆင့်ရှိ ငလျင်တစ်ခု လှုပ်ခတ်ခဲ့ကြောင်း ကျွန်း၏ မိုးလေဝသဌာနက ပြောကြားခဲ့ပြီး ငလျင်ကြောင့် ဒဏ်ရာရသူ ၂၇ ဦးရှိကာ နေအိမ်များ ထိခိုက်ပျက်စီးမှုရှိခဲ့သည်ဟု ဒေသဆိုင်ရာ အာဏာပိုင်များက ပြောသည်။

ငလျင်သည် ချီယာယီစီရင်စု ဒါပူမြို့နယ်တွင် အနက် ၉ ဒဿမ ၄ မီတာခန့်မှ ဗဟိုပြုလှုပ်ခတ်ခဲ့သည်ဟု မိုးလေဝသဌာနက ပြောကြားခဲ့သည်။

အမေရိကန်ဘူမိဗေဒတိုင်းတာရေးဌာနကမူ ငလျင်ပြင်းအားသည် ၆ ဒဿမ ၀ ရှိခဲ့သည်ဟု ဖော်ပြသည်။

ထိုင်ဝမ်တောင်ပိုင်း သရက်စိုက်ပျိုးရေးခရိုင် ယူကျင်း၏ မြောက်ဘက် ၁၂ ကီလိုမီတာအကွာတွင် ဒေသစံတော်ချိန် ၁၂း၂၇ က လှုပ်ခတ်ခဲ့သော ငလျင်ကြောင့် မြို့တော်တိုင်ပေရှိ အဆောက်အအုံများ လှုပ်ခါခဲ့သည်။

ဖေ့စ်ဘွတ်ခ်ပေါ်တင်ခဲ့သော ဗီဒီယိုဖိုင်တစ်ခုတွင် အနီးရှိ နန်ရှီခရိုင်၌ ပြိုကျခဲ့သော နေအိမ်အတွင်း ပိတ်မိသွားခဲ့သည့် ကလေးတစ်ဦးအပါအဝင် လူ သုံးဦးကို မီးသတ်တပ်ဖွဲ့ဝင်များက ကယ်ဆယ်ပေးခဲ့သည်ကို တွေ့ရသည်။ ယင်းခရိုင်ရှိ အခြားနေအိမ်များ၏ မျက်နှာကျက်များလည်း ပြိုကျခဲ့သည်။

အခြားနေရာများတွင် ပြိုကျ ပျက်စီးမှုများကြောင့် လူတစ်ဦး ဒဏ်ရာရခဲ့သကဲ့သို့ ဓါတ်လှေခါးအတွင်း လူနှစ်ဦး ပိတ်မိခဲ့သည်။

ငလျင်ကြောင့် စုစုပေါင်း လူ ၂၇ ဦးဒဏ်ရာရခဲ့သည်ဟု ကျန်းမာရေးဝန်ကြီးဌာနက ပြောကြားခဲ့ပြီး နန်ရှီခရိုင် မီးသတ်တပ်ဖွဲ့က ထိခိုက်မှု ကြီးကြီးမားမားမရှိခဲ့ဟု သတင်းထုတ်ပြန်ခဲ့သည်။

Ref: သည်စထရိတ်တိုင်းမ်စ်