တရုတ်ခရီးသွားများက ထိုင်းခရီးစဉ်များကို ဖျက်သိမ်းနေကြ

ထိုင်းနိုင်ငံတွင် လုံခြုံရေးကို စိုးရိမ်‌နေရမှုများကြောင့် လာမည့်တရုတ်နှစ်သစ်ကူးအားလပ်ရက်အတွက် တရုတ်ခရီးသွားအဖွဲ့များ၏ အစုအပြုံလိုက် ခရီးစဉ်ဖျက်သိမ်းမှုများကို ဟိုတယ်နှင့် လေကြောင်းလိုင်းများ က ကြုံတွေ့လာရသည်။

ပြီးခဲ့သည့် သီတင်းပတ်တွင် ဟောင်ကောင် သရုပ်ဆောင်အဆိုတော် Eason Chan သည် သူ့ဖျော်ဖြေပွဲသို့ လာရောက်မည့် တရုတ်ပရိသတ်များ၏ လုံခြုံဘေးကင်းမှုကို စိုးရိမ်ခြင်းကြောင့်ဆိုကာ ထိုင်းတွင်ပြုလုပ်မည့် ဖျော်ဖြေပွဲကို ဖျက်သိမ်းခဲ့သည်။ တဖန် ဟောင်ကောင်လုံခြုံရေးဗျူရိုသည် အရှေ့တောင်အာရှတွင် ၎င်းတို့နိုင်ငံသားများ အလိ–မ်အညာအလုပ်အကိုင်များဖြင့် မက်လုံးပေး ဖြားယောင်းခံနေရခြင်းကို စုံစမ်းထောက်လှမ်းရန် ယခုသီတင်းပတ်တွင် ထိုင်းနိုင်ငံသို့ အဖွဲ့တစ်ဖွဲ့ကို စေလွှတ်ခဲ့သည်။

ဟောင်ကောင်မှ ခရီးသွားများ ထိုင်းနိုင်ငံတွင် လိ–မ်ညာလှည့်ဖြားခံရခြင်း သို့မဟုတ် ပြ-န်ပေးဆွဲခံရခြင်းမရှိကြောင်း ဟောင်ကောင်လုံခြုံရေးအရာရှိများက အတည်ပြုခဲ့သည်ဟု ထိုင်းနိုင်ငံ ခရီးသွားလုပ်ငန်းနှင့် အားကစားဝန်ကြီးဌာန အမြဲတမ်းအတွင်းဝန် Natthriya Thaweevong က ပြောကြားခဲ့သည်။ ယင်းအဖြစ်မျိုးကြုံခဲ့ရသူများမှာ တောင်အာရှသို့ ကုန်စည်ပို့ဆောင်ရန် ငှားရမ်းထားသည့် နိုင်ငံသားများဖြစ်ပြီး သူတို့သည် ထိုင်းမှတဆင့် မြန်မာဘက်ခြမ်းသို့ ဝင်ရောက်ရန် သိမ်းသွင်းခံခဲ့ရသည်။

လစာများသော အလုပ်အကိုင်အခွင့်အလမ်းများကို မက်လုံးပေး၍ချဉ်းကပ်မှုများကို သတိထားကြရန် သူ့နိုင်ငံသားများကို ဟောင်ကောင်အာဏာပိုင်များက တိုက်တွန်းထားသည်ဟုလည်း သူက ပြောဆိုခဲ့သည်။

အဓိကအားဖြင့် တရုတ်ခရီးသွားအုပ်စုများကို ပစ်မှတ်ထားသော ခရီးသွားနေရာများရှိ ဟိုတယ်များ အထူးသဖြင့် ဘန်ကောက်ရှိ ဟိုတယ်များသည် ခရီးစဉ်ဖျက်သိမ်းမှုများနှင့် စတင်ကြုံတွေ့လာရသည်ဟု ထိုင်းဟိုတယ်အသင်း(THA) ဈေးကွက်ရှာဖွေရေး ဥက္ကဌ Prachoom Tantiprasertsuk က ပြောဆိုသည်။

ခရီးသွားကုမ္ပဏီများသည် ၎င်းတို့၏ ဟိုတယ်နှင့် လေယာဉ်လက်မှတ် ကြိုတင်မှာယူမှုများကို ပယ်ဖျက်နိုင်ဆဲအနေအထားဖြစ်သောကြောင့် ခရီးသွားအဖွဲ့များအပေါ် သက်ရောက်မှုသည် ပိုမိုသိသာထင်ရှားလာသည်ဟု သူက ပြောကြားခဲ့သည်။

တရုတ်မင်းသား ဝမ်ရှင်းကို လူကု-န်ကူး သောဖြစ်ရပ် မတိုင်မီက ထိုင်းနိုင်ငံရှိ ဟိုတယ်များသည် တရုတ်နှစ်ကူးအားလပ်ရက်များအတွင်း အခန်းကြိုတင်မှာယူမှုများအားကောင်းခဲ့ပြီး ယမန်နှစ် အလားတူကာလကထက် ဒေသတိုင်းတွင် မြင့်မား ခဲ့သည်ဟု မစ္စ Prachoom က ပြောဆိုသည်။

ဘန်ကောက်ရှိ ဟိုတယ်များသည် တည်းခိုခနှုန်း ၇၀-၈၀ ရာခိုင်နှုန်းနှင့် ဖူးခက်ကဲ့သို့ အပန်းဖြေနေရာများသည် တည်းခိုခနှုန်း ၈၀-၉၀ ရာခိုင်နှုန်းအထိ ရှိခဲ့သည်ဟု သူက ပြောကြားခဲ့သည်။

Thai Lion Air လေကြောင်းလိုင်းမှ လုပ်ငန်းပိုင်းဆိုင်ရာ အကြီးအကဲ Nuntaporn Komonsittivate က တရုတ်ခရီးသွားအဖွဲ့များသည် ခရီးစဉ်ဖျက်သိမ်းမှုကို အများအပြားလုပ်ထားခဲ့ကြသည်ဟု ပြောဆိုခဲ့သည်။

Ref: ဘန်ကောက်ပို့စ်