၂၀၂၄-ခုနှစ်၊ ပဉ္စမအကြိမ် အမျိုးသားအားကစားပြိုင်ပွဲတွင် စစ်ကိုင်းတိုင်းဒေသကြီးမှ ရွှေတံဆိပ် (၂၁) ဆု၊ ငွေတံဆိပ် (၂၀) ခု၊ ကြေးတံဆိပ် (၂၁) ဆုရရှိခဲ့ပြီး တိုင်းဒေသကြီးနှင့်ပြည်နယ် (၁၅) ခုတွင် အဆင့် (၄) ရရှိခဲ့ကြောင်း သိရသည်။
ပဉ္စမအကြိမ် အမျိုးသားအားကစားပြိုင်ပွဲတွင် အားကစား နည်း (၂၃) နည်းဖြင့် ကျင်းပခဲ့ရာ စစ်ကိုင်းတိုင်းဒေသကြီးအနေဖြင့် အားကစားနည်း (၂၁) နည်း၌ ပြိုင်ပွဲဝင်အားကစားသမား ကျား/မစုစုပေါင်း (၃၄၁) ဦးဖြင့် ဝင်ရောက်ယှဉ်ပြိုင်ခဲ့ခြင်းဖြစ်သည်။
မုံရွာမြို့ချင်းတွင်းခန်းမတွင် ဒီဇင်ဘာလ (၂၈) ရက်၊ နံနက်ပိုင်းက၂၀၂၄ -၂၀၂၅ ခုနှစ်အတွင်း စစ်ကိုင်းတိုင်းဒေသကြီးမှ နိုင်ငံ့ဂုဏ်ဆောင် ထူးချွန် အားကစားသမားများ၊ ပဉ္စမအကြိမ် အမျိုးသားအားကစားပွဲတော်၊ တိုင်းဒေသကြီးနှင့် ပြည်နယ် အားကစားပြိုင်ပွဲများတွင် ဆုတံဆိပ်များရရှိခဲ့သော အားကစားသမားများ/ အုပ်ချုပ်/နည်းပြများအား ဂုဏ်ပြုပွဲကျင်းပခဲ့သည်။
“ကျင်းပပြီးသွားတဲ့ ပဉ္စမအကြိမ်အမျိုးသား အားကစားပွဲတော်ဟာပြည်တွင်းမှာကျင်းပတဲ့ အားကစားပြိုင်ပွဲတွေထံက အဆင့်အမြင့်ဆုံး ပြိုင်ပွဲကြီးတစ်ခုဖြစ်သလို တိုင်းဒေသကြီးနဲ့ ပြည်နယ် အလိုက်တာဝန်ရှိသူတွေ အုပ်ချုပ်/နည်းပြတွေ အားကစားသမားတွေ အားလုံးအတွက် ပြိုင်ဆိုင်မှုပြင်းထန်ပြီး အစွမ်းကုန်ကြိုးစားအားထုတ် ယှဉ်ပြိုင်ခဲ့ကြတဲ့ ပြိုင်ပွဲကြီးတစ်ပွဲ ဖြစ်ခဲ့ပါတယ်။ ပဉ္စမအကြိမ် အမျိုးသားအားကစားပွဲတော်ကြီးက စစ်ကိုင်းတိုင်းဒေသကြီး အနေနဲ့ မြန်မာ့လက်ရွေးစင်ပဏာမအဖြစ် ဘတ်စကက်ဘော အမျိုးသား(၅)ဦး၊ ကာယကြံ့ခိုင်မှု အမျိုးသား (၄)ဦး၊ အမျိုးသမီး(၁)ဦး ရွေးချယ်ခံခဲ့ရပြီး အလေးမပြိုင်ပွဲမှာလည်း အမျိုးသား(၁)ဦးနဲ့ အမျိုးသမီး(၂)ဦးဟာ တိုင်းဒေသကြီးနှင့်ပြည်နယ် စံချိန်ချိုးပြီး ရွှေတံဆိပ်ဆု ထိုက်ထိုက်တန်တန် ရယူနိုင်ခဲ့ပါတယ်။ အခုပဉ္စမအကြိမ် အမျိုးသားအားကစားပွဲတော်မှာ ရွှေ/ငွေ/ကြေး ဆုတံဆိပ်တွေ ရရှိအောင် ကြိုးစားအားထုတ်ပေးခဲ့ကြတဲ့ အုပ်ချုပ်/နည်းပြတွေနဲ့ အားကစားသမားတွေကို အခုလိုထပ်မံဂုဏ်ပြု ချီးမြှင့်ပေးရတာဖြစ်ပါတယ်”ဟု စစ်ကိုင်းတိုင်းဒေသကြီး ဝန်ကြီးချုပ်ဦးမြတ်ကျော်က ပြောသည်။
တိုင်းဒေသကြီး ဝန်ကြီးချုပ်ထံ ပြည်နယ်နှင့်တိုင်းဒေသကြီး အားကစားပြိုင်ပွဲတွင် အမျိုးသားတံခွန်စိုက်ဆုဖလားနှင့် စုပေါင်းတံခွန်စိုက်ဆုဖလား ရရှိခဲ့ကြသည့် ပြေးခုန်ပစ်အသင်းမှ အသင်းအုပ်ချုပ်သူနှင့် အသင်းခေါင်းဆောင်များ က တံခွန်စိုက် ဆုဖလားများ အပ်နှံကြသည်။
ဆက်လက်၍ တိုင်းဒေသကြီး ဝန်ကြီးချုပ်နှင့်ဇနီး၊ တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီးတို့က ၂၀၂၄ – ၂၀၂၅ ခုနှစ်အတွင်း စစ်ကိုင်းတိုင်းဒေသကြီးမှ နိုင်ငံ့ ဂုဏ်ဆောင် ထူးချွန်အားကစားသမားများ၊ ပဉ္စမအကြိမ် အမျိုးသားအားကစားပွဲတော် နှင့် တိုင်းဒေသကြီးနှင့် ပြည်နယ် အားကစားပြိုင်ပွဲများတွင် ဆုတံဆိပ်များရရှိအောင် စွမ်းဆောင်ပေးခဲ့ကြသည့် အုပ်ချုပ်/နည်းပြများနှင့် ရွှေတံဆိပ်ဆုရ ထူးချွန်အားကစားသမားများအား ဂုဏ်ပြုချီးမြှင့်ငွေများ ပေးအပ်ချီးမြှင့်ကြသည်။
ထို့နောက် တိုင်းဒေသကြီး အစိုးရအဖွဲ့ဝင်များနှင့် ဇနီးများ၊ တိုင်းဒေသကြီး အဆင့်ဌာနဆိုင်ရာများက ၂၀၂၄-၂၀၂၅ ခုနှစ်အတွင်း စစ်ကိုင်းတိုင်းဒေသကြီးမှ နိုင်ငံ့ဂုဏ်ဆောင်ထူးချွန်အားကစားသမားများ၊ ပဉ္စမအကြိမ် အမျိုးသား အားကစားပွဲတော်နှင့်တိုင်း ဒေသကြီးနှင့်ပြည်နယ် အားကစားပြိုင်ပွဲများတွင် ငွေတံဆိပ်/ကြေးတံဆိပ်ဆုများ ရရှိခဲ့ကြသည့် ထူးချွန်အားကစားသမားများအား ဂုဏ်ပြုချီးမြှင့်ငွေများ အသီးသီးပေးအပ်ချီး မြှင့်ကြသည်။