အလောင်းအစားဖြင့် အရက်စိန်ခေါ်သောက်သည့် ထိုင်းလူငယ် သေဆုံး

ဆိုရှယ်မီဒီယာတွင် လူသိများသော ထိုင်းလူငယ်တစ်ဦးသည် ဘတ် ၃၀,၀၀၀ အလောင်းအစားကြေးခေါ်မှုအတွက် ၃၅၀ မီလီလီတာ ဝီစကီပုလင်းကို တကြိုက်တည်းသောက်ခဲ့ပြီးနောက် မကြာမီတွင် သေဆုံးခဲ့ကြောင်း သိရသည်။

ပန်းကုံးများရောင်းချ၍ အသက်မွေးဝမ်းကျောင်းပြုသော အဆိုပါလူငယ်သည် ရက်ပ်သီချင်းများဆိုကာ ဖောက်သည်များကို ဆွဲဆောင်လေ့ရှိသူဖြစ်သည်။ သူသည် ငွေကြေးအတွက် အရက်ကို တကြိုက်တည်း အမြန်သောက်ပြသည့် အလောင်းအစားဗီဒီယိုများစွာတွင် ပါဝင်ခဲ့သည်။

ပါတီပွဲတစ်ခုတွင် အားပေးအားမြှောက်လုပ်နေသည့် လူအုပ်ကြား၌ ထာနာကမ်က ဝီစကီပုလင်းသေးတစ်လုံးကို အမြန်မော့သောက်ပြနေသည့် ဗီဒီယိုဖိုင်သည် အင်တာနက်တွင် ပျံ့နှံ့ခဲ့သည်။ ပါတီပွဲတက်သူအချို့က မိုဘိုင်းလ်ဖုန်းများဖြင့် သူ့ကို ဗီဒီယိုရိုက်နေခဲ့ကြသည်။

အလောင်းအစားဖြင့် အရက်သောက်ပြခဲ့ပြီးနောက် ထာနာကမ်သည် နာမကျန်းဖြစ်ကာ အော့အန်ခဲ့သည်။ ယင်းနောက်သူ့ကို ဆေးရုံတင်ပေးခဲ့သော်လည်း နောက်ပိုင်းတွင် ဆေးရုံ၌ပင် အသက်ဆုံးရှုံးခဲ့သည်။

ကယ်ဆယ်ရေးသမားများက ထာနာကမ်ကို ထမ်းစဉ်ဖြင့် လူနာတင်ယာဉ်ဆီ ပို့ဆောင်နေစဉ်တွင် ပါတီပွဲတက်သူအချို့ ရယ်မောနေခဲ့ကြသည်ကို ဖေ့စ်ဘုတ်ပေ့ချ်တစ်ခုတွင် ဖော်ပြခဲ့သည်။ မှတ်ချက်ပေးသူများက ထိုသူများကို စာနာစိတ်မရှိသူများဟု ပြစ်တင်ဝေဖန်ခဲ့ကြသည်။

အဆိုပါလူငယ်သည် သူ နှစ်လသားအရွယ်ကပင် မိဘနှစ်ပါးကွဲကွာသွားခဲ့သောကြောင့် ဘန်ကောက်မြို့ ဆင်းရဲသားရပ်ကွက်တစ်ခုတွင် အဖွားဖြစ်သူအုပ်ထိန်းမှုအောက်၌ ကြီးပြင်းခဲ့သူဖြစ်သည်။ သူ အသက် ခုနစ်နှစ်အရွယ်တွင် Ram Intra လမ်းပေါ်ရှိ Liab Duan သားငါးဈေးတွင် ပန်းကုံးများစတင်ရောင်းချကာ အဖွားနှင့် သူ့အတွက် ဝင်ငွေရှာခဲ့သည်။

သူသေဆုံးခဲ့ပြီးနောက် လူသေစေသော ကြေးဖွင့်စိန်ခေါ်သည့် လုပ်ရပ်ကို မိုက်မဲသော အကြောင်းအရာအဖြစ် အင်တာနက်အသုံးပြုသူအများအပြားက ရှုတ်ချခဲ့ကြပြီး ထိုအကြောင်းအရာဗီဒီယိုများကို ပို့စ်တင်ခြင်းမလုပ်ကြရန် တောင်းဆိုခဲ့ကြသည်။

Ref: ဘန်ကောက်ပို့စ်