တပ်မတော်(လေ)မှ အရာရှိ၊ စစ်သည်များစမ်းသပ်တီထွင်ထုတ်လုပ်ထားသည့် ကင်းထောက်လေယာဥ်အမျိုးအစားများဖြစ်သော MTX-1A နှင့် MTX-1B လေယာဉ်များသည် ဒီဇင်ဘာ ၁၅ ရက်နံနက်ပိုင်းကကျင်းပသည့် လေယာဥ်၊ ရဟတ်ယာဥ်များ တပ်တော်ဝင်ရာတွင်ပါဝင်ပျံသန်းခဲ့ကြောင်း သိရသည်။
တပ်မတော်(လေ)၏ (၇၇)နှစ်မြောက် နှစ်ပတ်လည်နေ့နှင့် လေယာဉ်၊ ရဟတ်ယာဉ်များတပ်တော်ဝင်ခြင်းအခမ်းအနားကို မိတ္ထီလာတပ်နယ်ရှိ လေကြောင်းအတက်သင်လေတပ်စခန်းဌာနချုပ်၌ကျင်းပခဲ့ခြင်းဖြစ်သည်။
ကင်းထောက်လေယာဉ်အမျိုးအစားဖြစ်သည့် အဆိုပါလေယာဉ်များကို Reverse Engineering နည်းလမ်းဖြင့် လေယာဉ်ထုတ်လုပ်မှုနည်းပညာနှင့် အတွေ့အကြုံများရရှိရန်ရည်ရွယ်၍ စမ်းသပ်ထုတ်လုပ် တပ်ဆင်ခဲ့ခြင်းဖြစ်ကြောင်း သိရသည်။
MTX-1A လေယာဥ်အား ၂၀၂၁ ခုနှစ်၊ မတ် ၂၅ ရက်တွင် အောင်မြင်စွာ စမ်းသပ်ပျံသန်းနိုင်ခဲ့ပြီး Turboprop အင်ဂျင်နှင့် Glass Cockpit System တို့တပ်ဆင်ထားသည့် MTX-1B လေယာဉ်အား ၂၀၂၄ ခုနှစ်၊ မတ်လတွင် စမ်းသပ်ပျံသန်းမှုများအောင်မြင်စွာပြီးစီးခဲ့ကြောင်း သိရသည်။
MTX-1B လေယာဉ်အား MTX-1A လေယာဉ်ထုတ်လုပ်မှုအတွေ့အကြုံများကိုအခြေခံ၍ ပိုမိုခေတ်မီအဆင့်မြင့်သည့် အဆင့်မြင့် Cockpit Display များ၊ ဆက်သွယ်ရေးစနစ်များနှင့် ကိုယ် ထည်ပိုင်းဆိုင်ရာ အဆင့်မြှင့်တင်မှုများပြုလုပ်ကာ ထပ်မံဆန်းသစ်တီထွင် ထုတ်လုပ်ခဲ့ကြခြင်းဖြစ်ကြောင်း သိရသည်။
ယင်း လေယာဥ်များအား စမ်းသပ်တီထွင်ရာတွင် လေယာဉ်ထုတ်လုပ်မှု ရည်ရွယ်ချက်များအတိုင်း ဒီဇိုင်းရေးဆွဲထုတ်လုပ်၍ တည်ဆောက်ခဲ့ခြင်းဖြစ်ပြီး လေယာဉ်ထုတ်လုပ်မှုအဆင့်တိုင်းတွင် အရည်အသွေးစစ်ဆေးခြင်းနှင့် Functional and Operational Test လုပ်ငန်းများဆောင်ရွက်ခဲ့ကြောင်း သိရသည်။