နိုင်ငံစီးပွားရေး တိုးတက်မှု ရည်မှန်းချက်များကို အထောက်အကူပြုမည့် အရေးပါသော အခြေခံအဆောက်အဦစီမံကိန်းများဆိုင်ရာ အစိုးရအစီအစဉ်များအရ ဗီယက်နမ်သည် ၂၀၂၇ ခုနှစ်တွင် နိုင်ငံတောင်ပိုင်းနှင့် မြောက်ပိုင်းကို ချိတ်ဆက်ပေးမည့် ဒေါ်လာ ၆၇ ဘီလျံတန် အမြန်ရထားလမ်းကွန်ရက် တည်ဆောက်မှုများကို စတင်တော့မည်ဖြစ်သည်။
တစ်နာရီ ၃၅၀ ကီလိုမီတာခန့်အမြန်နှုန်းဖြင့် ခုတ်မောင်းရန်ရည်ရွယ်ထားပြီး မြို့ကြီးများနှင့် ပြည်နယ် ၂၀ ကိုဖြတ်သန်းမည့် ၁,၅၄၁ ကီလိုမီတာအရှည်ရှိ အမြန်ရထားလမ်းတည်ဆောက်ရန် အစိုးရ၏ အဆိုပြုချက်ကို အမျိုးသားလွှတ်တော်က စနေနေ့တွင် အတည်ပြုပေးခဲ့သည်။ အဆိုပါ စီမံကိန်းသည် ၂၀၃၅ ခုနှစ်တွင် အလုံးစုံပြီးမြောက်မည်ဟု မျှော်မှန်းထားကြောင်း အစိုးရ၏ သတင်းထုတ်ပြန်ချက်တွင် ဖေါ်ပြထားသည်။
အဆိုပါ စီမံကိန်းသည် ဒေသတွင်း ချိတ်ဆက်မှုကို အားကောင်းစေပြီး စီးပွားရေး ယှဉ်ပြိုင်နိုင်စွမ်းကို တိုးမြင့်စေသကဲ့သို့ နိုင်ငံတော် ကာကွယ်ရေးနှင့် လုံခြုံရေးအတွက်လည်း မြှင့်တင်ပေးနိုင်မည်ဖြစ်ကြောင်း အစိုးရက ပြောဆိုခဲ့သည်။
ဗီယက်နမ်သည် အရှေ့တောင်အာရှ၏ တိုးတက်မှုအမြန်ဆုံး စီးပွားရေးနိုင်ငံတစ်ခုအဖြစ် ရှေ့သို့ဆက်လက်ချီတက်နေသောကြောင့် ၂၀၂၅ ခုနှစ်အတွက် ဂျီဒီပီတိုးတက်မှုကို ၆ ဒဿမ၅ ရာခိုင်နှုန်းနှင့် ၇ ရာခိုင်နှုန်းအကြားရောက်ရှိရေး ချမှတ်ထားသည်။
တောင်-မြောက် အမြန်ရထားလမ်းစီမံကိန်းကို ၂၀၁၀ ပြည့်နှစ်တွင် အမျိုးသားလွှတ်တော်သို့ ပထမဆုံးတင်ပြခဲ့ခြင်းဖြစ်သော်လည်း စီးပွားရေးအင်အားနည်းပြီး အစိုးရကြွေးမြီ များပြားမှုကြောင့် လုံလောက်သော ထောက်ခံမဲအရေအတွက် မရခဲ့ပေ။
ဗီယက်နမ်နိုင်ငံသည် တရုတ်နိုင်ငံ ယူနန်ပြည်နယ်နှင့် ဆက်သွယ်မည့် ခန့်မှန်းခြေ ဒေါ်လာ ၇ ဒဿမ ၂ ဘီလျံကုန်ကျမည့် ရထားလမ်းကိုတည်ဆောက်ရန် ပြင်ဆင်နေသည်ဟုလည်း နိုင်ငံပိုင်မီဒီယာက အောက်တိုဘာလအတွင်း သတင်းထုတ်ပြန်ခဲ့သည်။
Ref: ဘန်ကောက်ပို့စ်