တူကီယေးလေယာဉ်ကွင်းအဆင်း ရုရှားလေယာဉ်တစ်စင်း မီးလောင်

လူ ၉၅ ဦး လိုက်ပါလာသော ရုရှားလေယာဉ်တစ်စင်းသည် တနင်္ဂနွေနေ့က တူကီယေးနိုင်ငံတောင်ပိုင်းရှိ အန်တဲလ်ယာလေဆိပ်သို့အဆင်းတွင် အင်ဂျင်မီးလောင်ခဲ့သည်ဟု တူကီယေး သယ်ယူပို့ဆောင်ရေးဝန်ကြီးဌာနက ပြောသည်။ ဖြစ်စဉ်တွင် ခရီးသည်နှင့် လေယာဉ်အမှုထမ်းအားလုံးကို လုံခြုံဘေးကင်းစွာ ကယ်ထုတ်နိုင်ခဲ့သည်ဟုဆိုသည်။

Azimuth လေကြောင်းလိုင်းပိုင် ဆူခွိုင်း စူပါဂျက်-၁၀၀ အမျိုးအစား လေယာဉ်သည် ခရီးသည် ၈၉ ဦး လေယာဉ်အမှုထမ်း ၆ ဦးနှင့်အတူ ဆိုချီမြို့မှ ပျံတက်ခဲ့ခြင်းဖြစ်သည်ဟု ဝန်ကြီးဌာနက ထုတ်ပြန်ချက်တွင် ပြောဆိုသည်။

ဒေသစံတော်ချိန် ည ၉း၃၄ နာရီတွင် လေယာဉ်ပြေးလမ်းသို့ ဆင်းသက်ခဲ့ပြီးနောက် လေယာဉ်မှူးက အရေးပေါ်ခေါ်ဆိုမှုလုပ်ခဲ့ပြီး လေဆိပ်ရှိ ကယ်ဆယ်ရေးနှင့် မီးငြိမ်းသတ်ရေးအဖွဲ့ဝင်များက အလျင်အမြန် မီးငြိမ်းသတ်ခဲ့ကြောင်းနှင့် ဒဏ်ရာရသူ တစ်ဦးမျှ မရှိခဲ့ကြောင်း ထုတ်ပြန်ချက်တွင် ဆိုခဲ့သည်။

မီးလောင်မှုဖြစ်ရသည့် အကြောင်းအရင်းကို လတ်တလောတွင် သိရခြင်း မရှိသေးပေ။ Haber လေဆိပ်၏ ပျံသန်းရေးသတင်းဝက်ဘ်ဆိုက်တွင် တင်ခဲ့သော အခင်းဖြစ်ဗီဒီယိုဖိုင်တွင် လေယာဉ်၏ ဘယ်ဘက်ခြမ်းမှ မီးတောက်များထွက်နေခဲ့ကာ အရေးပေါ်တုန့်ပြန်ရေးအဖွဲ့များက လေယာဉ်ကို ဝိုင်းဝန်းမီးငြိမ်းသတ်နေကြသည်ကို တွေ့ရသည်။ ခရီးသည်များကို လေယာဉ်၏ အရေးပေါ်လျှောမှတဆင့် ကယ်ထုတ်ပေးခဲ့သည်ကိုလည်း တွေ့ရသည်။

အခင်းဖြစ်လေယာဉ်ကို ပြေးလမ်းကြောင်းမှ ဖယ်ရှားရေးအတွက် လုပ်ဆောင်လျက်ရှိသည်ဟု သယ်ယူပို့ဆောင်ရေးဝန်ကြီးဌာနက ပြောဆိုခဲ့သည်။ လေဆိပ်သို့ ဆိုက်ရောက်မည့် လေယာဉ်ခရီးစဉ်များကို ယာယီဆိုင်းငံ့ထားပြီး ထွက်ခွာခရီစဉ်များအတွက်မှု စစ်ဘက်သုံး လေယာဉ်ပြေးလမ်းကို အသုံးပြုစေခဲ့သည်ဟု ဆိုခဲ့သည်။

Ref: အေပီ