မနီလာ ဆင်းရဲသားရပ်ကွက်တွင် မီးအကြီးအကျယ်လောင်

ဖိလစ်ပိုင်နိုင်ငံ မြို့တော်မနီလာအနီးဝန်းကျင်တွင်ရှိသည့် ဆင်းရဲသားရပ်ကွက်တစ်ခုတွင် နိုဝင်ဘာ ၂၄ ရက်က မီးအကြီးအကျယ်လောင်ကျွမ်းမှုဖြစ်ခဲ့သောကြောင့် လိမ္မော်ရောင် မီးတောက်မီးလျှံများနှင့် အမည်းရောင် မီးခိုးလုံးများ ကောင်းကင်သို့ ထိုးတက်ခဲ့သည်။

နေအိမ်တစ်လုံး၏ ဒုတိယထပ်မှ စတင်ခဲ့သော မီးလောင်ကျွမ်းမှုတွင်နေအိမ်ပေါင်း ၁,၀၀၀ ခန့် မီးလောင်ခဲ့သည်ဟု မနီလာခရိုင်မီးသတ်ရုံးက ပြောဆိုခဲ့သည်။

မနီလာမြို့ Isla Putting Bato ခရိုင်ရှိ နေအိမ်များ မြေပြင်သို့ ပြားပြားဝပ်ပြိုလဲပျက်စီးသွားခဲ့သည်ကို မြို့တော် သဘာဝဘေးအေဂျင်စီက အွန်လိုင်းပေါ်တင်ခဲ့သော ဒရုန်းမှရိုက်ယူခဲ့သည့် ဗီဒီယိုဖိုင်တွင် တွေ့ရသည်။ မိသားစုပေါင်း ၂,၀၀၀ ခန့်စုဝေးနေထိုင်ကြသည့် ရပ်ကွက်တစ်ခုဖြစ်သည်ဟု မီးသတ်ဌာနက ပြောဆိုသည်။

ရှိသမျှပစ္စည်းအားလုံးပါသွားသော်လည်း ကွယ်လွန်သူ ခင်ပွန်း၏ အရိုးပြာအိုးကိုမူ ယူဆောင်နိုင်ခဲ့သည်ဟု အသက် ၆၅ နှစ်အရွယ် ဒေသခံ လီယွန်နီလာ အဘီယာတက်စ်က ပြောဆိုခဲ့သည်။

မီးသတ်နှင့် သဘာဝဘေးဌာနက မီးလောင်မှုဖြစ်စဉ်သို့ မီးသတ်ယာဉ် ၃၆ စင်း နှင့် မီးသတ်ရေယာဉ် လေးစင်း စေလွှတ်ခဲ့သကဲ့သို့ နိုင်ငံ၏ လေတပ်ကလည်း ရဟတ်ယာဉ် နှစ်စင်းစေလွှတ်ကာ မီးငြိမ်းသတ်ရာတွင် ကူညီခဲ့သည်။

အခင်းဖြစ်ပွားရာ ဧရိယာရှိ နေအိမ်အများစုသည် မီးလောင်လွယ်သော ပစ္စည်းများကို အသုံးပြု ၍တည်ဆောက်ထားသောကြောင့် မီးဘေးသင့်ဧရိယာတစ်ခုဖြစ်သည်ဟု မီးသတ်သမားတစ်ဦးက အေအက်ဖ်ပီကို ပြောကြားခဲ့သည်။

Ref: သည်စထရိတ်တိုင်းမ်စ်